ಬಿಎಸ್‌ಎಫ್ ಯೋಧರಿಂದ ಭಾರತ-ಪಾಕ್‌ ಗಡಿ ಸಮೀಪ 4 ಕಿಲೋ ಹೆರಾಯಿನ್‌ ವಶ

ಅಮೃತ್‌ಸರ : ಪಾಕಿಸ್ಥಾನದಿಂದ ಭಾರತಕ್ಕೆ ಕಳ್ಳಸಾಗಣೆ ಮಾಡಲ್ಪಡುತ್ತಿದ್ದ ನಾಲ್ಕು ಕಿಲೋ ಹೆರಾಯಿನ್‌ ಮಾದಕ ದ್ರವ್ಯವನ್ನು ಗಡಿ ರಕ್ಷಣಾ ಪಡೆ ಸಿಬಂದಿಗಳು ಭಾರತ-ಪಾಕ್‌ ಗಡಿ ಸಮೀಪ ಇಂದು ಬೆಳಗ್ಗೆ ವಶಪಡಿಸಿಕೊಂಡಿದ್ದಾರೆ.

ಅತ್ತಾರಿ – ವಾಘಾ ಗಡಿ ಸಮೀಪದ ಅಮೃತ್‌ಸರ ವಲಯದ ಪುಲ್‌ಮೋರಾನ್‌ ಹೊರ ಠಾಣೆ ಬಳಿ 4 ಕಿಲೋ ಹೆರಾಯಿನ್‌ ಅನ್ನು ವಶಪಡಿಸಿಕೊಳ್ಳಲಾಯಿತು ಎಂದು ಬಿಎಸ್‌ಎಫ್ ಡಿಐಜಿ ಆರ್‌ ಕೆ ಕಟಾರಿಯಾ ತಿಳಿಸಿದ್ದಾರೆ. 

ಗಡಿ ಬೇಲಿಯ ಆಚೆಯಿಂದ ನಸುಕಿನ ವೇಳೆ ಯಾವುದೋ ಶಂಕಾಸ್ಪದ ಸದ್ದು ಕೇಳಿ ಬಂದಾಗ ಜಾಗೃತರಾದ ಬಿಎಸ್‌ಎಫ್ ಯೋಧರು ವಿಶೇಷ ಶೋಧ ಕಾರ್ಯಾಚರಣೆ ನಡೆಸಿದರು. ಆಗ ಒಂದು ಕಿಲೋ ತೂಕದ ನಾಲ್ಕು ಹೆರಾಯಿನ್‌ ಪೊಟ್ಟಣಗಳು ಗಡಿ ಬೇಲಿಯಾಚೆ ಬಿದ್ದುಕೊಂಡಿರುವುದು ಕಂಡು ಬಂತು. ಒಡನೆಯೇ ಅದನ್ನು ಯೋಧರು ವಶಪಡಿಸಿಕೊಂಡರು ಎಂದು ಕಟಾರಿಯಾ ತಿಳಿಸಿದರು.