ಅಪ್ಪನಿಗೆ ಹೆದರಿ ಬಾಂಗ್ಲಾದಿಂದ ಭಾರತಕ್ಕೆ ಓಡಿ ಬಂದ ಬಾಲಕಿ!

ಕೋಲ್ಕತ: ಅಪ್ಪನಿಗೆ ಹೆದರಿ ಬಾಂಗ್ಲಾದೇಶದ 15 ವರ್ಷದ ಬಾಲಕಿಯೊಬ್ಬಳು ಗುರುವಾರ ಬಾಂಗ್ಲಾ-ಭಾರತ ಅಂತಾರಾಷ್ಟ್ರೀಯ ಗಡಿ ದಾಟಿ ಪಶ್ಚಿಮ ಬಂಗಾಳಕ್ಕೆ ಬಂದಿದ್ದಾಳೆ. ಆಕೆಯನ್ನು ಗಡಿ ಭದ್ರತಾ ಪಡೆಯ(ಬಿಎಸ್‌ಎಫ್) ಯೋಧರು ರಕ್ಷಿಸಿದ್ದು, ಚೈಲ್ಡ್‌ಲೈನ್‌ ಇಂಡಿಯಾ ಫೌಂಡೇಷನ್‌ ಹೆಸರಿನ ಎನ್‌ಜಿಒಗೆ ಹಸ್ತಾಂತರಿಸಿದ್ದಾರೆ.

“ಪ್ರತಿ ದಿನ ಅಪ್ಪ ಹೊಡೆಯುತ್ತಾನೆ. ಅದಕ್ಕೆ ಮನೆ ಬಿಟ್ಟು ಓಡಿ ಬಂದಿದ್ದೇನೆ. ನನ್ನನ್ನು ಮನೆಗೆ ಕಳುಹಿಸಬೇಡಿ’ ಎಂದು ಬಾಲಕಿ ಮನವಿ ಮಾಡಿದ ಹಿನ್ನೆಲೆ ಆಕೆಯನ್ನು ಎನ್‌ಜಿಒಗೆ ಹಸ್ತಾಂತರಿಸಿರುವುದಾಗಿ ಬಿಎಸ್‌ಎಫ್ ಅಧಿಕಾರಿಗಳು ತಿಳಿಸಿದ್ದಾರೆ.

ಬಾಲಕಿಯು ಬಾಂಗ್ಲಾದ ಜೆನಯ್ದಾಹ ಜಿಲ್ಲೆಯ ಬನ್ಸಬೇರಿಯಾ ಗ್ರಾಮದ ನಿವಾಸಿಯಾಗಿದ್ದಾಳೆ. ಆಕೆಯ ಮನೆ ಅಂತಾರಾಷ್ಟ್ರೀಯ ಗಡಿಯಿಂದ 3ಕಿ.ಮೀ ದೂರವಿದ್ದು, ಆಕೆ ಮನೆಯಿಂದ ನಡೆದು ಬಂದು ಗಡಿ ದಾಟಿರುವುದಾಗಿ ಅಧಿಕಾರಿಗಳು ಮಾಹಿತಿ ಕೊಟ್ಟಿದ್ದಾರೆ.