ಹೆಚ್ಚಿದ ರಫ್ತು : ಗರಿಗೆದರಿದ ಮುಂಬಯಿ ಶೇರು, 107 ಅಂಕ ಜಿಗಿತ

ಮುಂಬಯಿ : ಮೇ ತಿಂಗಳ ರಫ್ತು ಅಂಕಿ ಅಂಶಗಳು ಉತ್ತೇಜನಕಾರಿಯಾಗಿರುವ ಕಾರಣಕ್ಕೆ ಗರಿಗೆದರಿರುವ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ ಇಂದು ಶುಕ್ರವಾರದ ಆರಂಭಿಕ ವಹಿವಾಟಿನಲ್ಲಿ 107 ಅಂಕಗಳ ಜಿಗಿತವನ್ನು ಸಾಧಿಸಿತು.

ಏಶ್ಯನ್‌ ಶೇರು ಪೇಟೆಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ತೋರಿ ಬಂದಿರುವ ಹೊರತಾಗಿಯೂ ಮುನ್ನಡೆ ಕಂಡ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಬೆಳಗ್ಗೆ 11.30ರ ಹೊತ್ತಿಗೆ 47.22 ಅಂಕಗಳ ಮುನ್ನಡೆಯನ್ನು ಕಾಯ್ದುಕೊಂಡು 31,122.95 ಅಂಕಗಳ ಮಟ್ಟದಲ್ಲೂ, ರಾಷ್ಟ್ರೀಯ ಶೇರು ಪೇಟೆಯ ನಿಫ್ಟಿ ಸೂಚ್ಯಂಕ 16.90 ಅಂಕಗಳ ಮುನ್ನಡೆಯನ್ನು ಕಾಯ್ದುಕೊಂಡು 9,594.95 ಅಂಕಗಳ ಮಟ್ಟದಲ್ಲೂ ವ್ಯವಹಾರ ನಿರತವಾಗಿತ್ತು.

ರಿಲಯನ್ಸ್‌, ಅರಂಬಿಂದೋ ಫಾರ್ಮಾ, ಎಸ್‌ ಬಿ ಐ, ಬಿಪಿಸಿಎಲ್‌, ಲೂಪಿನ್‌ ಶೇರುಗಳು ಇಂದು ಆರಂಭಿಕ ವಹಿವಾಟಿನಲ್ಲಿ ಅತ್ಯಂತ ಕ್ರಿಯಾಶೀಲವಾಗಿದ್ದವು. 

ಭಾರ್ತಿ ಇನ್‌ಫ್ರಾಟೆಲ್‌, ಐಟಿಸಿ, ಐಡಿಯಾ ಸೆಲ್ಯುಲರ್‌, ಅರಬಿಂದೋ ಫಾರ್ಮಾ, ಟಾಟಾ ಮೋಟರ್‌ ಶೇರುಗಳು ಟಾಪ್‌ ಗೇನರ್‌ ಎನಿಸಿಕೊಂಡವು.  ಲೂಪಿನ್‌, ವಿಪ್ರೋ, ಡಾ. ರೆಡ್ಡಿ, ಸಿಪ್ಲಾ, ಸನ್‌ ಫಾರ್ಮಾ ಶೇರುಗಳು ಮಾರಾಟದ ಒತ್ತಡಕ್ಕೆ ಗುರಿಯಾಗಿ ಹಿಂದುಳಿದವು.