BRO: ಟನೆಲ್‌ ಕಾಮಗಾರಿ ಪೂರೈಸಿದ ಬಿಆರ್‌ಒ

ಜಮ್ಮು: ಜಮ್ಮು ಮತ್ತು ಪೂಂಛ್ ನಡುವೆ ರಾಷ್ಟ್ರೀಯ ಹೆದ್ದಾರಿಗೆ ಅಡ್ಡಲಾಗಿ ನಿರ್ಮಿಸಲಾಗುತ್ತಿರುವ 260 ಮೀಟರ್‌ ಉದ್ದದ ಕಂಡಿ ಟನೆಲ್‌ ಕಾಮಗಾರಿಯನ್ನು ಬಾರ್ಡರ್‌ ರೋಡ್‌ ಆರ್ಗನೈಸೇಶನ್‌ (ಬಿಆರ್‌ಒ) ಯಶಸ್ವಿಯಾಗಿ ಪೂರೈಸಿದೆ. ಪ್ರಸಕ್ತ ವರ್ಷದ ಮಾರ್ಚ್‌ನಲ್ಲಿ ಕಾಮಗಾರಿ ಆರಂಭಿಸಲಾಗಿತ್ತು ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಪ್ರತಿಕೂಲ ಹವಾಮಾನಗಳ ಹೊರತಾಗಿಯೂ ಕೂಡ ಬಿರುಸಿನ ಕಾಮಗಾರಿ ನಡೆಸಲಾಗಿದೆ. ರಾಷ್ಟ್ರೀಯ ಹೆದ್ದಾರಿ 144ಎ ನಿರ್ಮಾಣದ ವೇಳೆ ಈ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ ಎಂದು ಬಿಆರ್‌ಒ ಅಧಿಕಾರಿಗಳು ಜಮ್ಮುವಿನಲ್ಲಿ ತಿಳಿಸಿದ್ದಾರೆ.

ಮೊದಲ ಟನೆಲ್‌: ಇನ್ನೊಂದೆಡೆ ಹಿಮಾಚಲ ಪ್ರದೇಶದಲ್ಲಿ ಭೂಸೇನೆ ಲಂಬವಾಗಿ ಸಿದ್ಧ ಪಡಿಸಿರುವ ವಿಂಡ್‌ ಟನೆಲ್‌ನ ಕಾಮಗಾರಿ ಪೂರ್ತಿಯಾಗಿದ್ದು, ಅದನ್ನು ಭೂಸೇನಾ ಮುಖ್ಯಸ್ಥ ಜ| ಮನೋಜ್‌ ಪಾಂಡೆ ವರ್ಚುವಲ್‌ ಆಗಿ ಉದ್ಘಾಟಿಸಿದರು. ಹಿಮಾಚಲ ಪ್ರದೇಶದಲ್ಲಿ ಇರುವ ಭೂಸೇನೆಯ ತರಬೇತಿ ಕೇಂದ್ರದಲ್ಲಿರುವ ಟನೆಲ್‌ ದೇಶದಲ್ಲಿಯೇ ಮೊದಲನೇಯದ್ದಾಗಿದೆ.