BBL; ಬ್ರಿಸ್ಬೇನ್‌ ಹೀಟ್‌ಗೆ ಬಿಗ್‌ಬಾಶ್‌ ಪ್ರಶಸ್ತಿ

ಸಿಡ್ನಿ: ಬ್ರಿಸ್ಬೇನ್‌ ಹೀಟ್‌ 2ನೇ ಬಾರಿಗೆ ಬಿಗ್‌ ಬಾಶ್‌ ಲೀಗ್‌ ಪ್ರಶಸ್ತಿಯನ್ನೆತ್ತಿದೆ. ಬುಧವಾರದ ಫೈನಲ್‌ನಲ್ಲಿ ಅದು ಆತಿಥೇಯ ಸಿಡ್ನಿ ಥಂಡರ್ಗೆ 54 ರನ್ನುಗಳ ಭಾರೀ ಸೋಲುಣಿಸಿತು.

ಬ್ರಿಸ್ಬೇನ್‌ ಹೀಟ್‌ 8 ವಿಕೆಟಿಗೆ 166 ರನ್‌ ಗಳಿಸಿದರೆ, ಸಿಡ್ನಿ ಥಂಡರ್ 17.3 ಓವರ್‌ಗಳಲ್ಲಿ 112ಕ್ಕೆ ಕುಸಿಯಿತು. ಎಡಗೈ ವೇಗಿ ಸ್ಪೆನ್ಸರ್‌ ಜಾನ್ಸನ್‌ 4 ವಿಕೆಟ್‌ ಹಾರಿಸಿ ಸಿಡ್ನಿಗೆ ಕಂಟಕವಾದರು. ಬ್ರಿಸ್ಬೇನ್‌ ತಂಡದ ಆರಂಭಕಾರ ಜೋಶ್‌ ಬ್ರೌನ್‌ ಈ ಪಂದ್ಯದ ಏಕೈಕ ಅರ್ಧ ಶತಕಕ್ಕೆ ಸಾಕ್ಷಿಯಾದರು (53).ಬ್ರಿಸ್ಬೇನ್‌ ಹೀಟ್‌ 2012-13ರಲ್ಲಿ ಮೊದಲ ಸಲ ಚಾಂಪಿಯನ್‌ ಆಗಿತ್ತು. ಕಳೆದ ವರ್ಷದ ಫೈನಲ್‌ನಲ್ಲಿ ಪರ್ತ್‌ ಸ್ಕಾರ್ಚರ್ ವಿರುದ್ಧ ಸೋತಿತ್ತು.