ಬ್ರಝಿಲ್‌: ಕೋವಿಡ್ ಸೋಂಕಿಗೆ ಗರಿಷ್ಠ ಸಾವು

ಸಾವೊ ಪಾಲೊ: ಬ್ರಝಿಲ್‌ನಲ್ಲಿ ಮಂಗಳವಾರ ಒಂದೇ ದಿನ ಈವರೆಗಿನ ಅತ್ಯಧಿಕ ಕೋವಿಡ್‌ ಸಾವು ಹಾಗೂ ಸೋಂಕು ಪ್ರಕರಣಗಳು ವರದಿಯಾಗಿವೆ. 24 ತಾಸುಗಳ ಅವಧಿಯಲ್ಲಿ ದೇಶದಲ್ಲಿ 1,179 ಸಾವುಗಳು ಸಂಭವಿಸಿದರೆ 17,408 ಮಂದಿಗೆ ಹೊಸದಾಗಿ ಸೋಂಕು ತಗಲಿದೆ. ಇದರೊಂದಿಗೆ ಸಾವಿಗೀಡಾದವರ ಒಟ್ಟು ಸಂಖ್ಯೆ 17,971ಕ್ಕೆ ಹಾಗೂ ಸೋಂಕಿತರ ಸಂಖ್ಯೆ 2,71,628ಕ್ಕೆ ಏರಿಕೆಯಾಗಿದೆ.

ಬ್ರಝಿಲ್‌ನಲ್ಲಿ ಫೆಬ್ರವರಿಯಲ್ಲಿ ಮೊದಲ ಪ್ರಕರಣ ವರದಿಯಾದ ಬಳಿಕ ಒಂದು ದಿನದಲ್ಲಿ ಅತಿ ಹೆಚ್ಚು ಮಂದಿ ಸಾವಿಗೀಡಾದ ಮತ್ತು ಸೋಂಕಿಗೊಳಗಾದ ನಿದರ್ಶನ ಇದು. ಸಾವೊಪಾಲೊ ನಗರವೊಂದರಲ್ಲೇ ಮಂಗಳವಾರ 324 ಮಂದಿ ಸಾವಿಗೀಡಾಗಿದ್ದಾರೆ. ಬ್ರಝಿಲ್‌ ಈಗ ವಿಶ್ವದಲ್ಲಿ ಗರಿಷ್ಠ ಕೋವಿಡ್‌ ಪ್ರಕರಣಗಳನ್ನು ಹೊಂದಿರುವ ರಾಷ್ಟ್ರಗಳ ಸಾಲಿನಲ್ಲಿ ಮೂರನೆ ಸ್ಥಾನದಲ್ಲಿದೆ. ಅಮೆರಿಕ ಮತ್ತು ರಶ್ಯ ಮೊದಲ ಎರಡು ಸ್ಥಾನಗಳಲ್ಲಿವೆ.