ಅಪಘಾತಗಳಿಗೆ ಕಾರಣವಾಗುತ್ತಿದ್ದ ಟಾಪ್‌ ಪ್ರಯಾಣಕ್ಕೆ ಬ್ರೇಕ್‌

ಕೆಂಭಾವಿ: ಅಪಘಾತಗಳಿಗೆ ಕಾರಣವಾಗುತ್ತಿದ್ದ ಟಾಪ್‌ ಪ್ರಯಾಣಕ್ಕೆ ನೂತನ ಪಿಎಸ್‌ಐ ವಿಶ್ವನಾಥ ಮುದರೆಡ್ಡಿ ನೇತೃತ್ವದ ಪೊಲೀಸ್‌ ತಂಡ ಬುಧವಾರ ಕಾಯಂ ಅಂಕುಶ ಹಾಕಿದ್ದು, ಜೀಪ್‌ ಮತ್ತು ಟಂಟಂ ವಾಹನಗಳ ಮೇಲಿನ ಕ್ಯಾರಿಯರ್‌ ತೆಗಿಸಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.

ಬಹಳ ದಿನಗಳಿಂದ ಪಟ್ಟಣ ಸೇರಿದಂತೆ ವಲಯದ ಹಲವು ಗ್ರಾಮಾಂತರ ಪ್ರದೇಶಗಳಲ್ಲಿ ಟಾಪ್‌ ಪ್ರಯಾಣದಿಂದ ಹಲವು ಅಪಘಾತಗಳು ಸಂಭವಿಸಿದ್ದವು. ಇತ್ತೀಚೆಗಷ್ಟೆ ಪೊಲೀಸ್‌ ಠಾಣೆಯಲ್ಲಿ ನಡೆದ ಮಾಧ್ಯಮ ಹಾಗೂ ಪೊಲೀಸ್‌ ನಡುವಿನ ವಿಶೇಷ ಸಂವಾದ ಕಾರ್ಯಕ್ರಮದಲ್ಲಿ ಭರವಸೆ ನೀಡಿದ್ದ ಪಿಎಸ್‌ಐ ವಿಶ್ವನಾಥ ಅವರು, ಹಳೆ ಬಸ್‌ ನಿಲ್ದಾಣ ಪ್ರದೇಶದಲ್ಲಿ ಖುದ್ದು ನಿಂತು ಖಾಸಗಿ ವಾಹನಗಳ ಮೇಲಿನ ಟಾಪ್‌ ಕ್ಯಾರಿಯರ್‌ ತೆಗೆಸಿ ನಿಯಮದ ಪ್ರಕಾರ ಪ್ರಯಾಣಿಕರನ್ನು ತುಂಬುವಂತೆ ಎಲ್ಲ ಖಾಸಗಿ ವಾಹನಗಳ ಚಾಲಕರಿಗೆ ಸೂಚನೆ ನೀಡಿದರು. ನಿಯಮ ಉಲ್ಲಂಘಿಸಿದರೆ ನಿರ್ದಾಕ್ಷಿಣ್ಯ ಕ್ರಮ ಅನಿವಾರ್ಯ ಎಂದು ಹೇಳಿದರು.

ಅಪರಾಧ ವಿಭಾಗದ ಪಿಎಸ್‌ಐ ವೆಂಕಣ್ಣ ಶಹಾಪುರ, ಎಎಸ್‌ಐ ಬಲರಾಮ, ಎಚ್‌ಸಿ ಶಿವು ಪಾಟೀಲ, ನಿಂಗಪ್ಪ, ಪಿಸಿ ಮಾಳಪ್ಪ ಇದ್ದರು.