ಬಿಡುಗಡೆಗೆ ಮುನ್ನವೇ ಬಾಯ್ಕಾಟ್ ಬಿಸಿ ಅನುಭವಿಸಿದ್ದ, ಬಿಡುಗಡೆಯ ದಿನ ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಋಣಾತ್ಮಕ ಪ್ರಚಾರ ಕಂಡಿದ್ದ ಅಯಾನ್ ಮುಖರ್ಜಿ ನಿರ್ದೇಶನದ ‘ಬ್ರಹ್ಮಾಸ್ತ್ರ’ ಸಿನಿಮಾ ಇದೀಗ ದೊಡ್ಡ ದಾಖಲೆ ಬರೆದಿದೆ. ಬಿಡುಗಡೆಯಾದ ಮೂರೇ ದಿನಕ್ಕೆ ಭಾರತದಲ್ಲಿ ನೂರು ಕೋಟಿ ರೂ ಸಂಪಾದಿಸಿರುವ ಬ್ರಹ್ಮಾಸ್ತ್ರ ಚಿತ್ರವು ಬಾಲಿವುಡ್ ನ ಹಳೆಯ ದಾಖಲೆಯನ್ನು ಮುರಿದಿದೆ.
ವಾರಾಂತ್ಯದಲ್ಲಿ ಅತೀ ಹೆಚ್ಚು ಸಂಪಾದನೆ ಮಾಡಿದ ಬಾಲಿವುಡ್ ಚಿತ್ರ ಎಂಬ ದಾಖಲೆಗೆ ಬ್ರಹ್ಮಾಸ್ತ್ರ ಪಾತ್ರವಾಗಿದೆ. ಮೂರು ದಿನದಲ್ಲಿ 125 ಕೋಟಿ ರೂ ಗಳಿಕೆ ಮಾಡಿರುವ ಈ ಚಿತ್ರವು, ಈ ಹಿಂದೆ ‘ಸಂಜು’ ಚಿತ್ರದ (120 ಕೋಟಿ) ಹೆಸರಿನಲ್ಲಿದ್ದ ದಾಖಲೆಯನ್ನು ಮುರಿದಿದೆ.
ಇದನ್ನೂ ಓದಿ:ಗೇಟ್ ತೆರೆಯುವುದು ತಡವಾಗಿದ್ದಕ್ಕೆ ಸೆಕ್ಯುರಿಟಿ ಗಾರ್ಡ್ಗೆ ಕಪಾಳಮೋಕ್ಷ; ವಿಡಿಯೋ ವೈರಲ್
ರಣಬೀರ್ ಕಪೂರ್ ಮತ್ತು ಆಲಿಯಾ ಭಟ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಬ್ರಹ್ಮಾಸ್ತ್ರ ಚಿತ್ರವು ಭಾರತೀಯ ಮಾರುಕಟ್ಟೆಯಲ್ಲಿ ಮೊದಲ ದಿನ 37 ಕೊಟಿ ರೂ ಸಂಪಾದಿಸಿತ್ತು. ಎರಡನೇ ದಿನ 42 ಕೋಟಿ ರೂ ಮತ್ತು ಮೂರನೇ ದಿನ 45 ಕೋಟಿ ರೂ ಸಂಪಾದನೆ ಮಾಡಿದೆ. ಈ ಮೂಲಕ ಮೂರು ದಿನದಲ್ಲಿ 125 ಕೋಟಿ ರೂ ಗಳಿಸಿದೆ.
ಟ್ರೇಡ್ ಎನಲಿಸ್ಟ್ ಸುಮಿತ್ ಕಡೆಲ್ ನೀಡಿದ ಮಾಹಿತಿಯಂತೆ, ಬ್ರಹ್ಮಾಸ್ತ್ರ ಚಿತ್ರವು ವಿಶ್ವಾದ್ಯಂತ ಮೂರು ದಿನದಲ್ಲಿ 225 ಕೋಟಿ ರೂ ಗಳಿಕೆ ಮಾಡಿದೆ. ಶುಕ್ರವಾರ 75 ಕೋಟಿ ರೂ, ಶನಿವಾರ 85 ಕೋಟಿ ರೂ ಮತ್ತು ರವಿವಾರ ಚಿತ್ರವು 65 ಕೋಟಿ ರೂ ಗಳಿಸಿದೆ.
‘ಬ್ರಹ್ಮಾಸ್ತ್ರ’ ಚಿತ್ರವು ಎರಡು ಭಾಗಗಳಲ್ಲಿ ತಯಾರಾಗುತ್ತಿದೆ. ಮೊದಲ ಭಾಗ ಶಿವದಲ್ಲಿ ರಣಬೀರ್, ಆಲಿಯಾ ಭಟ್ ಜೊತೆಗೆ ಅಮಿತಾಭ್ ಬಚ್ಚನ್, ನಾಗಾರ್ಜುನ, ಮೌನಿ ರಾಯ್, ಸೌರವ್ ಗುರ್ಜಾರ್ ಮುಂತಾದವರು ನಟಿಸಿದ್ದಾರೆ.
