Boxing World Qualifiers: ಸಚಿನ್‌, ಅಮಿತ್‌ ಮುನ್ನಡೆ

ಬ್ಯಾಂಕಾಕ್‌: ಭಾರತದ ಸಚಿನ್‌ ಸಿವಾಚ್‌ (57 ಕೆಜಿ), ಸಂಜೀತ್‌ ಕುಮಾರ್‌ (92 ಕೆಜಿ), ಅಮಿತ್‌  ಪಾಂಗಲ್‌ (51 ಕೆಜಿ) ಮತ್ತು ಜಾಸ್ಮಿನ್‌ (ವನಿತೆಯರ 57 ಕೆಜಿ) ಅವರು ವಿಶ್ವ ಬಾಕ್ಸಿಂಗ್‌ ಅರ್ಹತಾ ಕೂಟದಲ್ಲಿ ತಮ್ಮ ಎದುರಾಳಿಯೆದುರು ಜಯ ಸಾಧಿಸಿ ಮುನ್ನಡೆ ಪಡೆದು ಪ್ಯಾರಿಸ್‌ ಒಲಿಂಪಿಕ್ಸ್‌ ಅರ್ಹತೆ ಗಳಿಸುವ ಅವಕಾಶ ಹೆಚ್ಚಿಸಿಕೊಂಡರು.

ಸಚಿನ್‌ ಅವರು ಪ್ರೀ-ಕ್ವಾರ್ಟರ್‌ಫೈನಲ್‌ ಪಂದ್ಯದಲ್ಲಿ ಟರ್ಕಿಯ ಒಲಿಂಪಿಯನ್‌ ಆಟಗಾರ ಬತುಹಾನ್‌ ಸಿಫ್ಟಿಸಿ ಅವರನ್ನು 5-0 ಅಂತರದಿಂದ ಉರುಳಿಸಿದರು. ಇನ್ನೊಂದು ಪಂದ್ಯದಲ್ಲಿ ಲೂಯಿಸ್‌ ಸ್ಯಾಂಚೆಸ್‌ ವಿರುದ್ಧ ಸಂಜೀತ್‌ ಜಯ ಸಾಧಿಸಿದರು.

57 ಕೆ.ಜಿ. ವಿಭಾಗದಲ್ಲಿ ಕೇವಲ ಮೂವರು ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಆಯ್ಕೆ ಆಗಲಿದ್ದಾರೆ. ಹೀಗಾಗಿ ಸಚಿನ್‌ ಅವಕಾಶ ಗಳಿಸಬೇಕಾದರೆ ಇನ್ನೆರಡು ಪಂದ್ಯಗಳಲ್ಲಿ ಜಯ ಸಾಧಿಸಬೇಕಾಗಿದೆ. ಮೊದಲ ಸುತ್ತಿನಲ್ಲಿ ಬೈ ಪಡೆದಿರುವ ಸಂಜೀತ್‌ ಕೂಡ ಪ್ಯಾರಿಸ್‌ಗೆ ಅರ್ಹತೆ ಪಡೆಯಬೇಕಾದರೆ ಇನ್ನೆರಡು ಪಂದ್ಯಗಳಲ್ಲಿ ಎದುರಾಳಿಯನ್ನು ಮಣಿಸಬೇಕಾಗಿದೆ.