Botswana; 2,492 ಕ್ಯಾರಟ್‌ ವಜ್ರ ಪತ್ತೆ: ಬೆಲೆ ಎಷ್ಟು ಗೊತ್ತೇ?

ಹೊಸದಿಲ್ಲಿ: ವಿಶ್ವದಲ್ಲೇ 2ನೇ ಅತೀದೊಡ್ಡ ವಜ್ರ ಎನಿಸಿಕೊಂಡಿರುವ ವಜ್ರದ ಕಲ್ಲೊಂದು ಬೋಟ್ಸ್‌ವಾನಾದ ಗಣಿಯಲ್ಲಿ ಪತ್ತೆಯಾಗಿದೆ. 2,492 ಕ್ಯಾರಟ್‌ ಹೊಂದಿರುವ ಈ ವಜ್ರದ ಆರಂಭಿಕ ಬೆಲೆಯೇ 330 ಕೋಟಿ ರೂ. ಇರಲಿದೆ ಎಂದು ಮಾಧ್ಯಮ ವೊಂದು ವರದಿ ಮಾಡಿದೆ.

ಈಗಾಗಲೇ ಈ ವಜ್ರವನ್ನು ಕೊಂಡುಕೊಳ್ಳಲು ಹಲವು ಕಂಪೆನಿಗಳು ಸಿದ್ಧತೆ ನಡೆಸಿರುವುದರಿಂದ ಇದರ ಬೆಲೆ ಮತ್ತಷ್ಟು ಹೆಚ್ಚಳವಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಇದು ಬೋಟ್ಸ್‌ವಾನಾದಲ್ಲಿ ಈವರೆಗೆ ದೊರೆತ ಅತೀ ದೊಡ್ಡ ವಜ್ರದ ಕಲ್ಲು ಎನಿಸಿಕೊಂಡಿದ್ದು, ಕಳೆದ 100 ವರ್ಷಗಳಲ್ಲೇ ಪತ್ತೆಯಾದ ಬೃಹತ್‌ ವಜ್ರವಾಗಿದೆ. ಈ ವಜ್ರವನ್ನು ಪ್ರದರ್ಶನಕ್ಕೆ ಇಡಲಾಗುವುದು ಎಂದು ಬೋಟ್ಸ್‌ ವಾನಾ ಸರಕಾರ‌ ಘೋಷಿಸಿದೆ.

2019ರಲ್ಲಿ ಇದೇ ಗಣಿಯಲ್ಲಿ ಪತ್ತೆ ಯಾಗಿದ್ದ 1758 ಕ್ಯಾರಟ್‌ನ ವಜ್ರವನ್ನು 2ನೇ ಅತಿದೊಡ್ಡ ವಜ್ರ ಎಂದು ಗುರುತಿ­ಸಲಾಗಿತ್ತು. ಇದನ್ನು ಫ್ರೆಂಚ್‌ ಫ್ಯಾಷನ್‌ ಹೌಸ್‌ ಲೂಯಿ ವಿಟ್ಟಾನ್‌ ಸಂಸ್ಥೆ ಖರೀದಿ ಮಾಡಿತ್ತು, ಆದರೆ ಬೆಲೆಯನ್ನು ಬಹಿರಂ­ಗ­ಪಡಿಸಿರಲಿಲ್ಲ. 1905ರಲ್ಲಿ ದಕ್ಷಿಣ ಆಫ್ರಿ­ಕಾದ ಕಲ್ಲಿನಾಲ್‌ನಲ್ಲಿ 3106 ಕ್ಯಾರಟ್‌ನ ವಜ್ರ ಪತ್ತೆಯಾಗಿತ್ತು, ಇದು ವಿಶ್ವದ ಅತೀದೊಡ್ಡ ವಜ್ರ ಎನಿಸಿಕೊಂಡಿದೆ.