ಪರ್ತ್: ಶುಕ್ರವಾರ (ನ.22) ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಟೆಸ್ಟ್‌ ಸರಣಿಯ ಮೊದಲ ಪಂದ್ಯ ಆರಂಭವಾಗಲಿದೆ. ಪರ್ತ್ (Perth) ನಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳು ಮುಖಾಮುಖಿಯಾಗಲಿದೆ.
ಮೊದಲ ಪಂದ್ಯಕ್ಕೆ ನಾಯಕ ರೋಹಿತ್‌ ಶರ್ಮಾ (Rohit Sharma) ಅಲಭ್ಯರಾಗಲಿದ್ದಾರೆ. ಹೀಗಾಗಿ ಮೊದಲ ಪಂದ್ಯದಲ್ಲಿ ಜಸ್ಪ್ರೀತ್‌ ಬುಮ್ರಾ (Jasprit Bumrah) ಭಾರತ ತಂಡವನ್ನು ಮುನ್ನಡೆಸಲಿದ್ದಾರೆ. ತಮ್ಮ ತಂಡವು ನ್ಯೂಜಿಲ್ಯಾಂಡ್ ವಿರುದ್ಧ ತವರಿನಲ್ಲಿ ಅಭೂತಪೂರ್ವ 0-3 ಸೋಲಿನ ಭಾರವನ್ನು ಹೊತ್ತಿಲ್ಲ ಎಂದು ಬುಮ್ರಾ ಹೇಳಿದ್ದಾರೆ.
ನೀವು ಗೆದ್ದರೂ ಶೂನ್ಯದಿಂದಲೇ ಆರಂಭಿಸುತ್ತೀರಿ, ಸೋತರೂ ಹಾಗೆಯೇ. ಹೀಗಾಗಿ ನಾವು ಭಾರತದಿಂದ ಯಾವುದೇ ಸೋಲಿನ ಭಾರವನ್ನು ಹೊತ್ತು ತಂದಿಲ್ಲ. ನಾವು ಕಿವೀಸ್‌ ಸರಣಿಯಿಂದ ಒಂದಷ್ಟು ವಿಚಾರಗಳನ್ನು ಕಲಿತಿದ್ದೇವೆ. ಆದರೆ ಅಂದಿನ ಪರಿಸ್ಥಿತಿ ಬೇರೆ ಇತ್ತು ಎಂದರು ಬುಮ್ರಾ.
ತಂಡವು ತನ್ನ ಪ್ಲೇಯಿಂಗ್ ಇಲೆವೆನ್ ಅನ್ನು ಅಂತಿಮಗೊಳಿಸಿದೆ ಯಾದರೂ ಅದನ್ನು ಟಾಸ್‌ ಸಮಯದಲ್ಲೇ ಬಹಿರಂಗಪಡಿಸುವುದಾಗಿ ಬುಮ್ರಾ ಹೇಳಿದರು.
“ನಾವು ನಮ್ಮ ಆಡುವ ಬಳಗವನ್ನು ಅಂತಿಮಗೊಳಿಸಿದ್ದೇವೆ ಮತ್ತು ಪಂದ್ಯದ ಆರಂಭದ ಮೊದಲು ನಾಳೆ ಬೆಳಿಗ್ಗೆ ನಿಮಗೆ ತಿಳಿಯುತ್ತದೆ” ಎಂದು ನಾಯಕ ಹೇಳಿದರು.
