ಮೋದಿ- ಟ್ರಂಪ್‌ ಭೇಟಿ ವೇಳೆ ವೀಸಾ ಚರ್ಚೆ ಇಲ್ಲ?

ವಾಷಿಂಗ್ಟನ್‌/ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಭಾನುವಾರದಿಂದ 2 ದಿನಗಳ ಕಾಲ ಅಮೆರಿಕ ಪ್ರವಾಸ ಕೈಗೊಳ್ಳಲಿದ್ದಾರೆ. ಈ ಸಂದರ್ಭದಲ್ಲಿ ಭಾರತದ ಮಾಹಿತಿ ತಂತ್ರಜ್ಞಾನ ಕ್ಷೇತ್ರಕ್ಕೆ ಮಾರಕ ಎಂದೇ ಬಣ್ಣಿಸಲಾಗುತ್ತಿರುವ ಎಚ್‌1ಬಿ ವೀಸಾ ವಿಚಾರದ ಬಗ್ಗೆ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಜತೆ ಪ್ರಸ್ತಾಪ ಮಾಡಲಾರರು ಎಂದು ಹೇಳಲಾಗುತ್ತಿದೆ. ಕೆಲ ದಿನಗಳ ಹಿಂದೆ ಎರಡೂ ನಾಯಕರೂ ಮೊದಲ ಬಾರಿಗೆ ನಡೆ ಸುವ ಭೇಟಿ-ಮಾತುಕತೆಯಲ್ಲಿ ವೀಸಾ ವಿಚಾರ ಪ್ರಸ್ತಾಪವಾಗಲಿದೆ ಎಂದು ಹೇಳಲಾಗಿತ್ತು. ಇದರ ಹೊರತಾಗಿಯೂ ದೇಶದ ಮಾಹಿತಿ ತಂತ್ರಜ್ಞಾನ ಸಂಸ್ಥೆ ಮುಖ್ಯಸ್ಥರು ಪ್ರಧಾನಿ ಈ ವಿಚಾರ ಪ್ರಸ್ತಾಪಿಸುವರು ಎಂಬ ವಿಶ್ವಾಸದಲ್ಲಿದ್ದಾರೆ. 

ಮೋದಿ ಪ್ರವಾಸದ ವೇಳೆ ಆ್ಯಪಲ್‌ ಸಿಇಒ ಟಿಮ್‌ ಕುಕ್‌, ವಾಲ್‌ಮಾರ್ಟ್‌ ಮುಖ್ಯಸ್ಥ ಡಾಗ್‌ ಮ್ಯಾಕ್‌ಮಿಲನ್‌, ಮ್ಯಾರಿಯಟ್‌ ಇಂಟರ್‌ನ್ಯಾಷ ನಲ್‌ ಆರ್ನೆ ಸೊರೆನ್ಸನ್‌ ಸೇರಿ ಹಲವು ಕೈಗಾರಿಕೆ ಮತ್ತು ಉದ್ದಿಮೆ ಕ್ಷೇತ್ರದ ಮುಖ್ಯಸ್ಥರನ್ನು ಭೇಟಿ ಯಾಗಿ ದೇಶದಲ್ಲಿ ಹೆಚ್ಚಿನ ಉದ್ಯೋಗ ಸೃಷ್ಟಿ ಬಗ್ಗೆ ಮಾತುಕತೆ ನಡೆಸಲಿದ್ದಾರೆ. ನೋಟು ಅಮಾನ್ಯ ಘೋಷಣೆ, ಜು.1ರಿಂದ ಜಾರಿಯಾಗುವ ಜಿಎಸ್‌ಟಿಯಿಂದಾಗಿ ಉಂಟಾಗಲಿರುವ ಪರಿಣಾ ಮಗಳ ಬಗ್ಗೆಯೂ ಪಿಎಂ ಚರ್ಚಿಸಲಿದ್ದಾರೆ.

26ಕ್ಕೆ ಟ್ರಂಪ್‌ ಭೇಟಿ 
ಪ್ರಧಾನಿ ನರೇಂದ್ರ ಮೋದಿ ಸೋಮವಾರ ಅಧ್ಯಕ್ಷ ಟ್ರಂಪ್‌ರನ್ನು ಮೊದಲ ಬಾರಿಗೆ ಭೇಟಿಯಾಗಲಿದ್ದಾರೆ. ಈ ಸಂದರ್ಭದಲ್ಲಿ ನೌಕಾಪಡೆಗೆ ಅಗತ್ಯವಾಗಿರುವ 22 ಗೂಢಚಾರ ಡ್ರೋನ್‌ಗಳ ಖರೀದಿ ಬಗ್ಗೆ ಹೆಚ್ಚಿನ ಒತ್ತು ನೀಡಲಿದ್ದಾರೆ ಎಂದು ಹೇಳಲಾಗುತ್ತಿದೆ.