ಇಂದಿನಿಂದ ರೈಲ್ವೆ ಇ-ಟಿಕೆಟ್ ದರ ದುಬಾರಿ

ನವದೆಹಲಿ: ಐಆರ್‌ಸಿಟಿಸಿ ಮೂಲಕ ಖರೀದಿಸುವ ರೈಲ್ವೆ ಇ-ಟಿಕೆಟ್ ದರ ಭಾನುವಾರದಿಂದ ತುಟ್ಟಿಯಾಗಲಿದೆ. ನೋಟು ಅಮಾನ್ಯದ ನಂತರ ಡಿಜಿಟಲ್ ವಹಿವಾಟನ್ನು ಪ್ರೋತ್ಸಾಹಿಸುವ ಸಂಬಂಧ ಹಿಂಪಡೆದಿದ್ದ ಸೇವಾಶುಲ್ಕವನ್ನು ಮರು ಜಾರಿ ಮಾಡಲು ಐಆರ್‌ಸಿಟಿಸಿ ನಿರ್ಧರಿಸಿರುವ ಹಿನ್ನೆಲೆಯಲ್ಲಿ ಟಿಕೆಟ್ ದರ ದುಬಾರಿಯಾಗಲಿದೆ.

ಎಸಿ ರಹಿತ ದರ್ಜೆಗಳ, ಅಂದರೆ ಸಾಮಾನ್ಯ ಟಿಕೆಟ್‌ಗೆ 15 ರೂ. ಮತ್ತು ಫ‌ಸ್ಟ್‌ ಕ್ಲಾಸ್‌ ಒಳಗೊಂಡಂತೆ ಎಸಿ ದರ್ಜೆಯ ಟಿಕೆಟ್‌ಗೆ 30 ರೂ. ಸೇವಾ ಶುಲ್ಕ ವಿಧಿಸಲಾಗುತ್ತದೆ. ಇದಷ್ಟೇ ಅಲ್ಲ, ಜಿಎಸ್‌ಟಿ ಕೂಡ ಪ್ರತ್ಯೇಕವಾಗಿ ಬೀಳಲಿದೆ. ಆ.30 ರಂದು ಐಆರ್‌ಸಿಟಿಸಿ ಈ ಸಂಬಂಧ ಆದೇಶ ಹೊರಡಿಸಿದೆ.

ಡಿಜಿಟಲ್ ಪಾವತಿಗೆ ಉತ್ತೇಜನ ನೀಡಲು 3 ವರ್ಷಗಳ ಹಿಂದೆ ಈ ಶುಲ್ಕಗಳನ್ನು ಹಿಂಪಡೆಯುವ ಮುನ್ನ ಎಸಿ ರಹಿತ ಇ-ಟಿಕೆಟ್‌ಗೆ 20, ಎಸಿ ದರ್ಜೆಯ ಟಿಕೆಟ್‌ಗಳಿಗೆ 40 ರೂ. ಸೇವಾಶುಲ್ಕ ವಿಧಿಸಲಾಗುತ್ತಿತ್ತು.