ಶಗ್ರೀ ಬೈನ್‌ ಕಾದಂಬರಿಗೆ ಬುಕರ್‌ ಪ್ರಶಸ್ತಿಯ ಗರಿ

ಲಂಡನ್‌: ನ್ಯೂಯಾರ್ಕ್‌ ಮೂಲದ ಸ್ಕಾಟಿಷ್‌ ಲೇಖಕ ಡಗ್ಲಸ್‌ ಸ್ಟುವರ್ಟ್‌ ಅವರ “ಶಗ್ಗೀ ಬೈನ್‌’ ಕಾದಂಬರಿಗೆ ಪ್ರಸಕ್ತ ಸಾಲಿನ ಪ್ರತಿಷ್ಠಿತ ಬುಕರ್‌ ಪ್ರಶಸ್ತಿ ಸಂದಿದೆ. ಈ ಮೂಲಕ ತೀವ್ರ ಪೈಪೋಟಿ ನೀಡಿದ್ದ ಭಾರತೀಯ ಮೂಲದ ಅವನಿ ದೋಷಿಗೆ ಪ್ರಶಸ್ತಿ ಕೈತಪ್ಪಿದೆ. ಅವನಿ ಅವರ “ಬರ್ನ್r ಶುಗರ್‌’ ಕೃತಿ ಸೇರಿದಂತೆ ಒಟ್ಟು 6 ಲೇಖಕರ ಕೃತಿಗಳು ಅಂತಿಮ ಸುತ್ತಿಗೆ ಆಯ್ಕೆಯಾಗಿದ್ದವು.

ಆದರೆ, ಪ್ರೀತಿ ಮತ್ತು ಮದ್ಯಸೇವನೆಗೆ ಸಂಬಂಧಿಸಿದ ಕಥೆಯುಳ್ಳ “ಶಗ್ಗೀ ಬೈನ್‌’ ತೀರ್ಪುಗಾರರ ಮನ ಗೆದ್ದಿದೆ. ಲೇಖಕ ಸ್ಟುವರ್ಟ್‌ ಅವರು “ಶಗ್ಗೀ ಬೈನ್‌’ ಕಾದಂಬರಿಯನ್ನು ತಮ್ಮ ತಾಯಿಗೆ ಅರ್ಪಿಸಿದ್ದಾರೆ. ಸ್ಟುವರ್ಟ್‌ಗೆ 16 ವರ್ಷವಿದ್ದಾಗ ಅವರ ತಾಯಿ ಆಲ್ಕೋಹಾಲ್‌ ಚಟಕ್ಕೆ ಬಲಿಯಾಗಿದ್ದರು. ತಾಯಿ-ಮಗನ ನಡುವಿನ ಬೇಷರತ್‌ ಪ್ರೀತಿಗೆ ಸಂಬಂಧಿಸಿದ ಕಾದಂಬರಿ ಇದಾಗಿದ್ದು, ನೋವು, ನಗು, ಅಳು ಸೇರಿದಂತೆ ವಿವಿಧ ಭಾವನೆಗಳು ಸಮ್ಮಿಳಿತಗೊಂಡ ಕೃತಿಯಾಗಿದೆ ಎಂದು ತೀರ್ಪುಗಾರರು ಅಭಿಪ್ರಾಯಪಟ್ಟಿದ್ದಾರೆ.