Mumbai: ಮತ್ತೆ 9 ವಿಮಾನಗಳಿಗೆ ಹುಸಿ ಬಾಂಬ್‌ ಬೆದರಿಕೆ!

ಮುಂಬಯಿ: ಈ ವಾರ ಪೂರ್ತಿ ಭಾರತೀಯ ವಿಮಾನಯಾನ ಸಂಸ್ಥೆಗಳು ಹುಸಿ ಬಾಂಬ್‌ ಬೆದರಿಕೆಯನ್ನು ಎದುರಿಸಿದವು. ಅಂತೆಯೇ ಗುರುವಾರ ಕೂಡ 5 ಏರ್‌ ಇಂಡಿಯಾ, ವಿಸ್ತಾರ ಮತ್ತು ಇಂಡಿಗೋ ತಲಾ 2 ವಿಮಾನಗಳಿಗೆ ಬಾಂಬ್‌ ಬೆದರಿಕೆ ಎದುರಾಯಿತು.

ಈ ಮಧ್ಯೆ, ಹುಸಿ ಬಾಂಬ್‌ ಬೆದರಿಕೆಯೊಡ್ಡುತ್ತಿದ್ದ ಸಾಮಾಜಿಕ ಜಾಲತಾಣಗಳ ಏಳೆಂಟು ಖಾತೆಗಳನ್ನು ಸೈಬರ್‌ ಭದ್ರತಾ ಅಧಿಕಾರಿಗಳು ಬ್ಲಾಕ್‌ ಮಾಡಿದ್ದಾರೆ. ಮತ್ತೊಂದೆಡೆ, ಬುಧವಾರ ಜರ್ಮನಿಯ ಫ್ರಾಂಕ್‌ಫ‌ರ್ಟ್‌ನಿಂದ ಹೊರಟ ವಿಸ್ತಾರ ವಿಮಾನಕ್ಕೆ ಬಾಂಬ್‌ ಬೆದರಿಕೆ ಹಿನ್ನೆಲೆಯಲ್ಲಿ ಮುಂಬಯಿ ಯಲ್ಲಿ ಗುರುವಾರ ಸಂಜೆ ತುರ್ತು ಭೂಸ್ಪರ್ಶ ಮಾಡಿತು. ಈ ವಿಮಾನದಲ್ಲಿ 147 ಪ್ರಯಾಣಿಕರಿದ್ದರು. ಮುಂಬಯಿ ಗೆ ಬರುತ್ತಿದ್ದ ಮತ್ತೂಂದು ವಿಮಾನಕ್ಕೂ ಬಾಂಬ್‌ ಬೆದರಿಕೆ ಒಡ್ಡಲಾಗಿತ್ತು.

ಲಂಡನ್‌, ಜರ್ಮನಿ ಐಪಿ ಅಡ್ರೆಸ್‌:
ಹುಸಿ ಬಾಂಬ್‌ ಬೆದರಿಕೆಯ ಮೂಲ ವನ್ನು ಕೇಂದ್ರೀಯ ತನಿಖಾ ಸಂಸ್ಥೆಗಳು ಪತ್ತೆ ಹಚ್ಚಿವೆ. ಜರ್ಮನಿ, ಲಂಡನ್‌ ಐಪಿ ಅಡ್ರೆಸ್‌ಗಳ ಮೂಲಕ ಬೆದರಿಕೆಯ ಪೋಸ್ಟ್‌ಗಳನ್ನು ಮಾಡಿದ್ದು ಗೊತ್ತಾಗಿದೆ. ಈ ವಾರ ಸುಮಾರು 20 ದೇಶೀಯ ಮತ್ತು ಅಂತಾರಾಷ್ಟ್ರೀಯ ವಿಮಾನಗಳು ಬಾಂಬ್‌ ಬೆದರಿಕೆಯನ್ನು ಸ್ವೀಕರಿಸಿವೆ.

ಮುಂಬಯಿ: 6 ಗಂಟೆ ವಿಮಾನ ಹಾರಾಟ ಸ್ಥಗಿತ
ಛತ್ರಪತಿ ಶಿವಾಜಿ ಮಹಾರಾಜ್‌ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ದಲ್ಲಿ ರನ್‌ವೇ ನಿರ್ವಹಣೆ ಕಾಮಗಾರಿ ಕೈಗೈತ್ತಿಕೊಂಡಿದ್ದು, ಗುರುವಾರ ಆರು ಗಂಟೆಗಳ ಕಾಲ ವಿಮಾನ ಹಾರಾಟವನ್ನು ಸ್ಥಗಿತಗೊಳಿಸಲಾಯಿತು.

ಮುಂಬಯಿ ಇಂಟರ್‌ನ್ಯಾಶನಲ್‌ ಏರ್‌ಪೋರ್ಟ್‌ ಲಿಮಿಟೆಡ್‌ ರನ್‌ವೇಗಳು ಮತ್ತು ವಿಮಾನ ನಿಲ್ದಾಣದ ಇತರೆಡೆಗಳಲ್ಲಿ ನಿರ್ವಹಣೆ ಕೆಲಸ ನಡೆಸುವ ಸಲುವಾಗಿ ವಿಮಾನ ನಿಲ್ದಾಣದ ಅಧಿಕಾರಿಗಳು ಗುರುವಾರ ಬೆಳಗ್ಗೆ 11ರಿಂದ ಸಂಜೆ 5ರ ವರೆಗೆ ವಿಮಾನ ಹಾರಾಟ ಸ್ಥಗಿತಗೊಳಿಸಿದರು.