ಕೆಟ್ಟು ನಿಂತ ಬೋಟ್‌: 45 ಕನ್ನಡಿಗರ ರಕ್ಷಣೆ

ಪಣಜಿ: ಕರ್ನಾಟಕದ ಬೆಂಗಳೂರು ಮತ್ತು ಇತರ ಭಾಗಗಳಿಂದ ಸೋಮವಾರ ಗೋವಾಕ್ಕೆ ಆಗಮಿಸಿದ್ದ 45 ಪ್ರವಾಸಿಗರ ತಂಡ ಮಾಂಡೋವಿ ನದಿ ಮಧ್ಯದಲ್ಲಿ ಬೋಟ್‌ ಹಾಳಾಗಿ ನಿಂತು ಸುಮಾರು 4 ಗಂಟೆಗಳಾದರೂ ಯಾರೂ ರಕ್ಷಣೆಗೆ ಬಾರದ ಘಟನೆ ರಾಯಬಂದರ ಸಮೀಪ ನಡೆದಿದೆ.

ಬೆಂಗಳೂರು ಸೇರಿ ವಿವಿಧ ಭಾಗಗಳಿಂದ 55 ಪ್ರವಾಸಿಗರು ಪಣಜಿಗೆ ಆಗಮಿಸಿದ್ದರು. ಸೋಮವಾರ ಮಧ್ಯಾಹ್ನ ಖಾಸಗಿ ಬೋಟ್‌ವೊಂದರಲ್ಲಿ 45 ಜನ ತೆರಳಿದ್ದರು. ಮಾಂಡೋವಿ ನದಿಯಲ್ಲಿ ರಾಯಬಂದರ ಸಮೀಪ ಆಗಮಿಸುತ್ತಿದ್ದಂತೆ ಬೋಟ್‌ ಕೆಟ್ಟು ನಿಂತಿತು.

ಕರ್ನಾಟಕದ ಪ್ರವಾಸಿಗರು ಈ ಖಾಸಗಿ ಬೋಟ್‌ ಕಂಪನಿಗೆ ಫೋನ್‌ ಮಾಡಿದರೆ ಇದೀಗ ಬರುತ್ತೇವೆ ಎಂದು ಹೇಳುತ್ತಲೇ 4 ಗಂಟೆ ಕಳೆದರು. ಆತಂಕಗೊಂಡ ಪ್ರವಾಸಿಗರು ಬೇರೆಯವರಿಗೆ ಪೋನ್‌ ಮಾಡಿದರೂ ಪ್ರಯೋಜನವಾಗಲಿಲ್ಲ. ಬಳಿಕ ಬೇರೆ ಬೋಟ್‌ ಸಹಾಯದೊಂದಿಗೆ ಈ ಪ್ರವಾಸಿಗರೆಲ್ಲರನ್ನೂ ರಕ್ಷಣೆ ಮಾಡಲಾಯಿತು.