ತಮಿಳುನಾಡು ಬಿಜೆಪಿ ಸಾಧನೆ: ರಾಹುಲ್‌ ಕಾಲೆಳೆದ ಬಿಜೆಪಿ

ನವದೆಹಲಿ: “ತಮಿಳುನಾಡಿನಲ್ಲಿ ಎಂದೂ ನೀವು ಆಳ್ವಿಕೆ ಮಾಡಲು ಸಾಧ್ಯವಿಲ್ಲ’ ಎಂದು ಇತ್ತೀಚೆಗೆ ಲೋಕಸಭೆಯಲ್ಲಿ ಹೇಳಿದ್ದ ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿಯವರಿಗೆ ಬಿಜೆಪಿ ತಿರುಗೇಟು ನೀಡಿದೆ.

ಮಂಗಳವಾರ ಪ್ರಕಟಗೊಂಡ ಫ‌ಲಿತಾಂಶದ ಪ್ರಕಾರ, ತಮಿಳುನಾಡಿನ 230 ಪಟ್ಟಣ ಪಂಚಾಯ್ತಿಗಳಲ್ಲಿ ಬಿಜೆಪಿ ಗೆಲುವು ಸಾಧಿಸಿದೆ. ಇದಲ್ಲದೆ, ನಗರಸಭೆಗಳಲ್ಲಿ 56 ಸ್ಥಾನ, ಮಹಾನಗರ ಪಾಲಿಕೆಗಳಲ್ಲಿ 22 ಸ್ಥಾನಗಳನ್ನು ಗೆದ್ದುಕೊಂಡಿದೆ.

ಈ ಕುರಿತಾಗಿ ಟ್ವೀಟ್‌ ಮಾಡಿರುವ ಬಿಜೆಪಿಯ ಮಾಹಿತಿ ತಂತ್ರಜ್ಞಾನ ವಿಭಾಗದ ಮುಖ್ಯಸ್ಥ ಅಮಿತ್‌ ಮಾಳವಿಯಾ, “”ತಮಿಳುನಾಡಿನಲ್ಲಿ ಬಿಜೆಪಿ, ಡಿಎಂಕೆ, ಎಐಎಡಿಎಂಕೆ ನಂತರ ಮೂರನೇ ಅತಿ ದೊಡ್ಡ ಪಕ್ಷವಾಗಿ ಹೊರಬಂದಿದೆ. ಹಿಂದೆ ಒಂದೂ ಸ್ಥಾನಗಳನ್ನು ಗೆಲ್ಲದ ಕಡೆಯೆಲ್ಲಾ ಬಿಜೆಪಿ ಈ ಬಾರಿ ಗೆದ್ದು ತೋರಿಸಿದೆ. ಈ ಜಯ ರಾಹುಲ್‌ ಗಾಂಧಿಯವರು ತಮ್ಮ ತಪ್ಪು ಕಲ್ಪನೆಯಿಂದ ಹೊರಬರಲು ಸಹಾಯವಾಗಬಹುದು’ ಎಂದು ಬರೆದುಕೊಂಡಿದ್ದಾರೆ.