ಎಂ.ಬಿ.ಪಾಟೀಲ್‌ ನಿವಾಸಕ್ಕೆ ಬಿಜೆಪಿ ಶಾಸಕ ಶಿವರಾಜ್‌ ಪಾಟೀಲ್‌ ಭೇಟಿ !

ಬೆಂಗಳೂರು: ಸಚಿವ ಸ್ಥಾನ ಸಿಗದೆ ತೀವ್ರ ಅಸಮಾಧಾನಗೊಂಡು ಉಪ ಮುಖ್ಯಮಂತ್ರಿ ಪಟ್ಟದ ಬೇಡಿಕೆ ಇರಿಸಿದ್ದ ಎಂ.ಬಿ. ಪಾಟೀಲ್‌ ನಿವಾಸಕ್ಕೆ ಹಲವು ಮುಖಂಡರು ಭೇಟಿ ನೀಡುತ್ತಿದ್ದು ಭಾನುವಾರ ರಾಯಚೂರಿನ ಬಿಜೆಪಿ ಶಾಸಕ ಶಿವರಾಜ್‌ ಪಾಟೀಲ್‌ ಭೇಟಿ ನೀಡಿದ್ದು ಕುತೂಹಲಕ್ಕೆ ಕಾರಣವಾಯಿತು. 

ಸದಾಶಿವನಗರದಲ್ಲಿರುವ ಎಂ.ಬಿ.ಪಾಟೀಲ್‌ ಅವರ ನಿವಾಸಕ್ಕೆ  ಆಗಮಿಸಿದ ಶಿವರಾಜ್‌ ಪಾಟೀಲ್‌ ಕೆಲ ಕಾಲ ಚರ್ಚೆ ನಡೆಸಿದರು. 

ಶಿವರಾಜ್‌ ಪಾಟೀಲ್‌ ಅವರು ಸುದ್ದಿಗಾರರೊಂದಿಗೆ ಮಾತನಾಡಿ ಇದೊಂದು ಔಪಚಾರಿಕ ಭೇಟಿ. ನಮ್ಮ ಹಳೇ ಸಂಬಂಧದ ಹಿನ್ನಲೆಯಲ್ಲಿ ಭೇಟಿ ಹೊರತು ಯಾವುದೇ ರಾಜಕೀಯ ಇಲ್ಲ. ಪ್ರಸಕ್ತ ನಡೆಯುತ್ತಿರುವ ಬೆಳವಣಿಗೆಗೂ ಈ ಭೇಟಿಗೂ ಯಾವುದೇ ಸಂಬಂಧ ಇಲ್ಲ ಎಂದಿದ್ದಾರೆ.