ಮಹಿಳಾ ಆಯೋಗಕ್ಕೆ ಬಿಗ್‌ಬಾಸ್‌ ಸ್ಪರ್ಧಿ ದೂರು

ಬೆಂಗಳೂರು: ಬಿಗ್‌ಬಾಸ್‌ ಸೀಸನ್‌-6ರ ಮಹಿಳಾ ಸ್ಪರ್ಧಿಯೊಬ್ಬರು ಮತ್ತೂಬ್ಬ ಸ್ಪರ್ಧಿ ಆ್ಯಂಡಿ ವಿರುದ್ಧ ಮಾನಸಿಕ ಕಿರುಕುಳ ಆರೋಪಿಸಿ ಮಹಿಳಾ ಆಯೋಗಕ್ಕೆ ಸೋಮವಾರ ದೂರು ನೀಡಿದ್ದಾರೆ. ಈ ಸಂಬಂಧ ಮಹಿಳಾ ಆಯೋಗದ ಅಧ್ಯಕ್ಷೆ ನಾಗಲಕ್ಷ್ಮೀಬಾಯಿ, ಬಿಗ್‌ಬಾಸ್‌ನ ಮಹಿಳಾ ಸ್ಪರ್ಧಿಯ ದೂರು ಸ್ವೀಕರಿಸಿದ್ದು, ಆರೋಪಿತ ಆ್ಯಂಡಿ ಹಾಗೂ ಬಿಗ್‌ಬಾಸ್‌ ಕಾರ್ಯಕ್ರಮದ ನಿರ್ವಾಹಕ ಗುರುದಾಸ್‌ ಶೆಣೈ ಅವರಿಗೆ ಆಯೋಗದ ಎದುರು ಹಾಜರಾಗುವಂತೆ ಸೂಚಿಸಲಾಗುವುದು ಎಂದು ಹೇಳಿದರು.

ನಂತರ ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ ದೂರುದಾರೆ, ಬಿಗ್‌ಬಾಸ್‌ ಶೋ ಮುಗಿದ ನಂತರವೂ ಆ್ಯಂಡಿ ತಮ್ಮ ಬಗ್ಗೆ ಆಕ್ಷೇಪಾರ್ಹ ಹೇಳಿಕೆಗಳನ್ನು ನೀಡುತ್ತಿದ್ದ. ಕಾರ್ಯಕ್ರಮದ ಟಾಸ್ಕ್ಗಳ ಹೊರತಾಗಿಯೂ ಆ್ಯಂಡಿ ನಡೆದುಕೊಂಡ ರೀತಿ ತಮಗೆ ಇಷ್ಟವಾಗಲಿಲ್ಲ. ಆದರೂ ಎಲ್ಲವನ್ನು ಸಹಿಸಿಕೊಂಡಿದ್ದೆ. ಆದರೆ, ಇತ್ತೀಚೆಗೆ ಖಾಸಗಿ ವಾಹಿನಿಯ ಕಾಮಿಡಿ ಶೋ ಒಂದರಲ್ಲಿ ಆತ ನಡೆದುಕೊಂಡ ರೀತಿ ಸರಿ ಇರಲಿಲ್ಲ. ಹೀಗಾಗಿ ದೂರು ನೀಡುತ್ತಿದ್ದೇನೆ ಎಂದು ಹೇಳಿದರು.

ಪ್ರಮುಖವಾಗಿ ಸೂಪರ್‌ ಹೀರೋ, ಸೂಪರ್‌ ವಿಲನ್‌ ಟಾಸ್ಕ್ನಲ್ಲಿ ತಮ್ಮ ವಿರುದ್ಧ ಅತೀರೇಕವಾಗಿ ನಡೆದುಕೊಂಡಿದ್ದಾನೆ. ಬಿಗ್‌ಬಾಸ್‌ಗೂ ಆ್ಯಂಡಿ ವಿರುದ್ಧ ದೂರು ನೀಡಲಾಗಿತ್ತು. ಆದರೆ, ಆ್ಯಂಡಿ ವಿರುದ್ಧ ಕ್ರಮಕೈಗೊಂಡಿದ್ದಾರೋ ಇಲ್ಲವೋ ಗೊತ್ತಿಲ್ಲ. ಆ್ಯಂಡಿಯ ಕಿರುಕುಳಗಳಿಂದ ಬೇಸತ್ತು ಮಹಿಳಾ ಆಯೋಗಕ್ಕೆ ದೂರು ನೀಡುತ್ತಿದ್ದೇನೆ. ಕ್ರಮಕೈಗೊಳ್ಳುವ ವಿಶ್ವಾಸವಿದೆ ಎಂದು ಆಕೆ ಹೇಳಿದರು.