NIA ಅಧಿಕಾರಿಗಳನ್ನು 6 ಗಂಟೆ ಬಾಗಿಲಲ್ಲೇ ಕಾಯಿಸಿದ ಭೂಪ.!

ಮುಂಬೈ: ನಿಷೇಧಿತ ಸಂಘಟನೆ ಪಾಪ್ಯುಲರ್‌ ಫ್ರಂಟ್‌ ಆಫ್ ಇಂಡಿಯಾ (ಪಿಎಫ್ಐ) ಸಂಬಂಧಿತ ಶೋಧ ಕಾರ್ಯಾಚರಣೆಗೆ ಮುಂದಾಗಿದ್ದ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ)ಯ ಸಿಬ್ಬಂದಿಯನ್ನು ವ್ಯಕ್ತಿಯೊಬ್ಬ ಬಾಗಿಲು ತೆರೆಯದೇ 6 ಗಂಟೆಗಳ ಕಾಲ ಸತಾಯಿಸಿರುವ ಘಟನೆ ವರದಿಯಾಗಿದೆ.

ಕಳೆದ ವರ್ಷ ಪ್ರಧಾನಿ ನರೇಂದ್ರ ಮೋದಿ ಅವರು ಬಿಹಾರಕ್ಕೆ ಭೇಟಿ ನೀಡುವ ಸಂದರ್ಭದಲ್ಲಿ ಅಲ್ಲಿನ ಶಾಂತಿ ಹದಗೆಡಿಸಿ, ಗಲಭೆ ಸೃಷ್ಟಿಸಲು ಪಿಎಫ್ಐ ಸಂಚು ರೂಪಿಸಿತ್ತು. 2022ರ ಜುಲೈನಲ್ಲಿ ಎನ್‌ಐಎ ಈ ಸಂಬಂಧ ಪ್ರಕರಣ ದಾಖಲಿಸಿತ್ತು. ಈಗ ಅದೇ ತನಿಖೆಯ ಭಾಗವಾಗಿ ಮಹಾರಾಷ್ಟ್ರ, ರಾಜಸ್ಥಾನ, ತಮಿಳುನಾಡು ಸೇರಿದಂತೆ 6 ರಾಜ್ಯಗಳಲ್ಲಿನ ಶಂಕಿತ ಪಿಎಫ್ಐ ಕಾರ್ಯಕರ್ತರ ನಿವಾಸಗಳಲ್ಲಿ ಶೋಧ ಕಾರ್ಯಾಚರಣೆ ನಡೆಸಿದೆ.

ಈ ವೇಳೆ 7/11 ಮುಂಬೈ ರೈಲ್ವೆ ಸ್ಫೋಟ ಪ್ರಕರಣದ ಆರೋಪಿಯಾಗಿದ್ದ ಅಬ್ದುಲ್‌ ವಹೀದ್‌ ಶೇಖ್‌ನ ಮುಂಬೈನ ನಿವಾಸದಲ್ಲೂ ಅಧಿಕಾರಿಗಳು ಶೋಧ ನಡೆಸಲು ಮುಂದಾದಾಗ ವಹೀದ್‌ ಬಾಗಿಲು ತೆರೆಯದೆ ಸತಾಯಿಸಿದ್ದಾನೆ. ಸ್ಥಳಕ್ಕೆ ಆತನ ವಕೀಲರು ಬಂದ ಬಳಿಕ ಬಾಗಿಲು ತೆರೆದಿದ್ದಾನೆಂದು ಅಧಿಕಾರಿಗಳು ಹೇಳಿದ್ದಾರೆ.