ತಾಯಿ ಪ್ರಾಣ ಕಳೆದುಕೊಂಡ ಬಗ್ಗೆ ತಿಳಿಯದೆ ಮನೆಯಲ್ಲಿ ಎರಡು ದಿನ ಕಳೆದ 14 ರ ಬಾಲಕ

ಬೆಂಗಳೂರು: ಹದಿಹರೆಯದ ಬಾಲಕನೊಬ್ಬ ತನ್ನ ತಾಯಿಯ ಶವದೊಂದಿಗೆ ಎರಡು ದಿನ ಕಳೆದಿರುವ ಮನಕಲಕುವ ಘಟನೆ ಬೆಂಗಳೂರಿನ ಆರ್‌ಟಿ ನಗರದಲ್ಲಿ ನಡೆದಿದೆ.

ಪೊಲೀಸರ ಪ್ರಕಾರ ಬಾಲಕನಿಗೆ ತನ್ನ ತಾಯಿ ಸತ್ತಿರುವುದು ಗೊತ್ತಿರಲಿಲ್ಲ. ಹುಡುಗ ತನ್ನ ತಾಯಿ ಮಲಗಿದ್ದಾಳೆ ಮತ್ತು ಅವಳು ತನ್ನ ಮೇಲೆ ಕೋಪಗೊಂಡಿದ್ದರಿಂದ ಅವನೊಂದಿಗೆ ಮಾತನಾಡಲಿಲ್ಲ ಎಂದು ಭಾವಿಸಿದ್ದ.

44 ವರ್ಷದ ಅಣ್ಣಮ್ಮ ಅವರು ಫೆಬ್ರವರಿ 26 ರಂದು ಕಡಿಮೆ ಶುಗರ್ ಮತ್ತು ರಕ್ತದೊತ್ತಡದ ಕಾರಣ ತಮ್ಮ ಮನೆಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಮಲಗಿದ್ದಾಗಲೇ ಸಾವನ್ನಪ್ಪಿದ್ದರಿಂದ, ತನ್ನ ತಾಯಿ ಮಲಗಿದ್ದಾಳೆ ಎಂದು ಹುಡುಗ ಭಾವಿಸಿದ್ದಾನೆ.

ಅಣ್ಣಮ್ಮ ಅವರ ಪತಿ ಒಂದು ವರ್ಷದ ಹಿಂದೆ ಕಿಡ್ನಿ ವೈಫಲ್ಯದಿಂದ ಮೃತಪಟ್ಟಿದ್ದರು. ಮನೆಯಲ್ಲಿ ತಾಯಿ ಮತ್ತು ಹುಡುಗ ಮಾತ್ರ ವಾಸಿಸುತ್ತಿದ್ದರು. ಹುಡುಗ ಮನೆಯಿಂದ ಹೊರಗೆ ಬರುತ್ತಿದ್ದ, ಹೊರಗೆ ತನ್ನ ಸ್ನೇಹಿತರೊಂದಿಗೆ ಆಟವಾಡಿ ಮನೆಗೆ ಹಿಂತಿರುಗುತ್ತಿದ್ದ. ಅವನು ತನ್ನ ಸ್ನೇಹಿತರೊಂದಿಗೆ ಆಹಾರವನ್ನು ಸೇವಿಸುತ್ತಿದ್ದ.

ಎರಡು ದಿನಗಳ ಕಾಲ ಇದೇ ರೀತಿ ಮಾಡಿದ್ದು, ಫೆಬ್ರವರಿ 28 ರಂದು ಅಣ್ಣಮ್ಮ ತನ್ನೊಂದಿಗೆ ಎರಡು ದಿನ ಮಾತನಾಡದಿರುವ ಬಗ್ಗೆ ತನ್ನ ತಂದೆಯ ಸ್ನೇಹಿತರಿಗೆ ತಿಳಿಸಿದ್ದಾನೆ. ಅಪಾಯವನ್ನು ಅರಿತ ಅವರು ಭೇಟಿ ನೀಡಿ ಪರಿಶೀಲಿಸಿದಾಗ ಆಕೆ ಮೃತಪಟ್ಟಿರುವುದು ತಿಳಿದು ಬಂದಿದೆ. ಆರ್‌ಟಿ ನಗರ ಪೊಲೀಸರು ಪ್ರಕರಣವನ್ನು ಕೈಗೆತ್ತಿಕೊಂಡು ತನಿಖೆ ನಡೆಸುತ್ತಿದ್ದಾರೆ.