Belve ಕೆನರಾ ಬ್ಯಾಂಕ್‌ ಪ್ರಬಂಧಕರಿಂದ ವಂಚನೆ: ದೂರು ದಾಖಲು

ಸಿದ್ದಾಪುರ: ಬೆಳ್ವೆ ಕೆನರಾ ಬ್ಯಾಂಕ್‌ನಲ್ಲಿ ಮಾಡಿದ್ದ 50 ಸಾವಿರ ರೂಪಾಯಿ ಸಾಲವನ್ನು ತೀರಿಸಿದರೂ ಬ್ಯಾಂಕ್‌ ಪ್ರಬಂಧಕ ದಿನೇಶ್‌ ಕೋಟ್ಯಾನ್‌ 5 ಲಕ್ಷ ರೂ. ಸಾಲ ಬಾಕಿ ಇದೆ ಎಂದು ಪಹಣಿ ಪತ್ರದಲ್ಲಿ ನಮೂದು ಮಾಡಿ ವಂಚಿಸಿದ್ದಾರೆ ಎಂದು ಉಡುಪಿ ಕೆಮ್ಮಣ್ಣು ಗುಜ್ಜರಬೆಟ್ಟು ಕೆ. ಸಕುಬಾಯಿ (74) ಪೊಲೀಸರಿಗೆ ದೂರು ನೀಡಿದ್ದಾರೆ.

ಸಕುಬಾಯಿ ಅವರು ಉಡುಪಿ ತಾಲೂಕು ಪಡುತೋನ್ಸೆ ಗ್ರಾಮದ ಸರ್ವೇ ನಂಬರ್‌ 203/6ಎ ಯಲ್ಲಿರುವ 0.40 ಎಕರೆ ಜಾಗದ ಮೇಲೆ ಕಿಸಾನ್‌ ಕ್ರೆಡಿಟ್‌ ಕಾರ್ಡ್‌ ಮೂಲಕ 2013-14ನೇ ಸಾಲಿನಲ್ಲಿ ಬೆಳ್ವೆ ಕೆನರಾ ಬ್ಯಾಂಕ್‌ನಲ್ಲಿ 50 ಸಾವಿರ ರೂ. ಸಾಲ ಮಾಡಿದ್ದು, ಬಳಿಕ ಮರುಪಾವತಿ ಮಾಡಿದ್ದರು. ಇತ್ತೀಚೆಗೆ ಪಹಣಿ ಪತ್ರ ತೆಗೆಸಿದಾಗ 50 ಸಾವಿರ ರೂ. ಜತೆಯಲ್ಲಿ 5 ಲಕ್ಷ ರೂ. ಹೆಚ್ಚುವರಿಯಾಗಿ ಋಣಭಾರ ಇರುವುದಾಗಿ ದಾಖಲಾಗಿರುವುದು ತಿಳಿದು ಬಂದಿತು.

ಪ್ರಬಂಧಕ ದಿನೇಶ್‌ ಕೋಟ್ಯಾನ್‌ ಅವರು ತನ್ನ ಸಹೋದರ ಮತ್ತು ಸಹೋದರಿಯ ಸಹಿ ಫೋರ್ಜರಿ ಮಾಡಿ, ಫಾರಂ ನಂಬರ್‌ 3 ಡಿಕ್ಲರೇಶನ್‌ ಫಾರಂ ಸೃಷ್ಟಿಸಿ ಅದನ್ನು ಉಡುಪಿಯ ಸಬ್‌ ರಿಜಿಸ್ಟ್ರಾರ್‌ ಕಚೇರಿಗೆ ನೀಡಿ ಪಹಣಿಯಲ್ಲಿ ಸಾಲ ನಮೂದಿಸುವ ಮೂಲಕ ವಂಚಿಸಿದ್ದಾರೆ ಎಂದು ಕೆ. ದೂರಿನಲ್ಲಿ ತಿಳಿಸಲಾಗಿದೆ.

ಶಂಕರನಾರಾಯಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.