ಬೆಳ್ತಂಗಡಿ: ಪ್ರಸ್ತುತ ಶಿಕ್ಷಣ ಕ್ಷೇತ್ರವು ಅಮೂಲಾಗ್ರ ಬದಲಾವಣೆ ಕಂಡಿದ್ದು, ವಿದ್ಯಾರ್ಥಿಗಳಿಗೆ ಆಯ್ಕೆ ವಿಪುಲ ಅವಕಾಶಗಳಿವೆ. ಹಿಂದೆ ಇಂತಹ ಅವಕಾಶ ಕಡಿಮೆ ಇತ್ತು. ಹೀಗಾಗಿ ವಿದ್ಯಾರ್ಥಿಗಳು ಉತ್ತಮ ಕೋರ್ಸನ್ನು ಆಯ್ಕೆ ಮಾಡುವ ಜತೆಗೆ ಉದ್ಯೋಗ ಪಡೆಯುವ ಕೌಶಲವನ್ನೂ ಬೆಳೆಸಿಕೊಳ್ಳಬೇಕು ಎಂದು ವಿಧಾನ ಪರಿಷತ್‌ ಸದಸ್ಯ ಕೆ. ಹರೀಶ್‌ಕುಮಾರ್‌ ಹೇಳಿದರು.
ಶನಿವಾರ ಬೆಳ್ತಂಗಡಿ ತಾ| ಕ್ರೀಡಾಂಗಣದಲ್ಲಿ ಯುವ ಸಂಕಿರಣ ಬೆಳ್ತಂಗಡಿಯು ಬಹುಜನ ವಿದ್ಯಾರ್ಥಿ ಸಂಘ, ಜಿಲ್ಲಾ ಉದ್ಯೋಗ ವಿನಿಮಯ ಕೇಂದ್ರದ ಸಹಯೋಗದೊಂದಿಗೆ ಆಯೋಜಿಸಿದ ಬೃಹತ್‌ ಉದ್ಯೋಗ ಮೇಳವನ್ನು ಉದ್ಘಾಟಿಸಿ ಅವರು ಮಾತನಾಡಿದರು. ಬೆಳ್ತಂಗಡಿ ತಹಶೀಲ್ದಾರ್‌ ಗಣಪತಿ ಶಾಸ್ತ್ರಿ ಮಾತನಾಡಿ, ಪ್ರಸ್ತುತ ಸರಕಾರಿ ಹುದ್ದೆಗಳಿಗೆ ದಕ್ಷರ ಆವಶ್ಯಕತೆಯಿದ್ದು, ಹೀಗಾಗಿ ಯುವಕರಿಗೆ ಹೆಚ್ಚಿನ ಅವಕಾಶಗಳಿವೆ ಎಂದು ತಿಳಿಸಿದರು. ಬೆಳ್ತಂಗಡಿ ಪೊಲೀಸ್‌ ಸರ್ಕಲ್‌ ಇನ್ಸ್‌ ಸ್ಪೆಕ್ಟರ್‌ ಸಂದೇಶ್‌ ಪಿ.ಜಿ. ಮಾತನಾಡಿ, ಉದ್ಯೋಗ ಇಲ್ಲ ಎನ್ನುವುದು ಯಾರ ಮನಸ್ಸಿನಲ್ಲಿಯೂ ಬರಬಾರದು. ಉತ್ತಮ ಸಮಾಜದ ಗುರಿ ಇದ್ದಾಗ ಉತ್ತಮ ಉದ್ಯೋಗವೂ ನಮ್ಮದಾಗುತ್ತದೆ. ಕರಾವಳಿ ಭಾಗದಲ್ಲಿ ಉದ್ಯಮಕ್ಕೆ ಹೆಚ್ಚಿನ ಮಹತ್ವವಿದೆ ಎಂದರು.
ಯುವ ಸಂಕಿರಣ ತಾಲೂಕು ಅಧ್ಯಕ್ಷ ಲಕ್ಷ್ಮಣ್‌ ಜಿ.ಎಸ್‌. ಅಧ್ಯಕ್ಷತೆ ವಹಿಸಿದ್ದರು. ಬೆಂಗಳೂರಿನ ಚಾರ್ಟೆಡ್‌ ಅಕೌಟೆಂಟ್‌ ಭರತ್‌ ಕುಮಾರ್‌, ಬಿಎಸ್‌ಪಿ ಮೈಸೂರು ವಿಭಾಗ ಉಸ್ತುವಾರಿ ಅತ್ರಾಡಿ ಅಮೃತ ಶೆಟ್ಟಿ, ಬಿಎಸ್‌ಪಿ ಜಿಲ್ಲಾಧ್ಯಕ್ಷ ಸಾಣೂರು ಸತೀಶ್‌ ಸಾಲ್ಯಾನ್‌, ಬಿಎಸ್‌ಪಿ ಬೆಳ್ತಂಗಡಿ ಉಸ್ತುವಾರಿ ಸಂಜೀವ ಆರ್‌., ಬಹುಜನ ಚಿಂತಕ ಮೋನಪ್ಪ ಕಣಿಯೂರು, ಬಿವಿಎಸ್‌ ಸಂಯೋಜಕ ಸುಕೇಶ್‌ ಕೆ. ಮಾಲಾಡಿ, ಡಿಎಸ್‌ಪಿ ಸಂಚಾಲಕ ರಮೇಶ್‌ ಮಡಂತ್ಯಾರು, ಬಿವಿಎಸ್‌ ಅಧ್ಯಕ್ಷ ಅಕ್ಷತ್‌ ಪಾಲೇದು, ಉದ್ಯೋಗ ವಿನಿಮಯ ಕೇಂದ್ರದ ಅಧಿಕಾರಿ ದಯಾನಂದ್‌ ಮತ್ತಿತರರಿದ್ದರು. ಸುಕೇಶ್‌ ಕೆ. ಮಾಲಾಡಿ ಸ್ವಾಗತಿಸಿ, ಚಿರಂಜೀವಿ ವಂದಿಸಿದರು. ಯೋಗಿನಿ ನಿರೂಪಿಸಿದರು. ಸುಮಾರು 40ಕ್ಕೂ ಅಧಿಕ ಕಂಪೆನಿಗಳುª, ಸುಮಾರು ಎರಡು ಸಾವಿರ ಉದ್ಯೋಗಾಕಾಂಕ್ಷಿಗಳು ಭಾಗವಹಿಸಿದ್ದರು.
ಉದ್ಯೋಗ ಅವಶ್ಯ
ಹಿಂದೆ ಕರಾವಳಿಯ ಭಾಗಗಳಲ್ಲಿ ಬಹುತೇಕ ಯುವ ಜನತೆ ಬ್ಯಾಂಕ್‌, ವೈದ್ಯ, ಎಂಜಿನಿಯರ್‌ಗೆ ಮಾತ್ರ ಆಸಕ್ತಿ ತೋರಿಸುತ್ತಿದ್ದರು. ಆದರೆ ಈಗ ಉನ್ನತ ಸರಕಾರಿ ಉದ್ಯೋಗ ಪಡೆಯುವುದಕ್ಕೆ ಕೆಎಎಸ್‌, ಐಎಎಸ್‌ ಪರೀಕ್ಷೆಗಳನ್ನು ಬರೆಯುತ್ತಿದ್ದಾರೆ. ಒಬ್ಬ ಯುವಕ ಉತ್ತಮ ಉದ್ಯೋಗ ಪಡೆದಾಗ ಒಂದು ಕುಟುಂಬ ಬೆಳೆಯುತ್ತದೆ.
- ಕೆ. ಹರೀಶ್‌ಕುಮಾರ್‌
ವಿಧಾನ ಪರಿಷತ್‌ ಸದಸ್ಯರು
