ಮತ್ತೆ 89 ಜನರಿಗೆ ಕೋವಿಡ್ ಸೋಂಕು

ಬಳ್ಳಾರಿ: ಗಣಿನಾಡು ಬಳ್ಳಾರಿ ಜಿಲ್ಲೆಯಲ್ಲಿ ಕೋವಿಡ್‌ ಸೋಂಕು ಮತ್ತೊಮ್ಮೆ ಸ್ಫೋಟಗೊಂಡಿದೆ. ಗುರುವಾರ ಒಂದೇ ದಿನ 89 ಮಂದಿಯಲ್ಲಿ ಸೋಂಕು ದೃಢಪಡುವ ಮೂಲಕ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ ಸಾವಿರದ ಗಡಿದಾಟಿದ್ದು, 1019ಕ್ಕೆ ಏರಿಕೆಯಾಗಿದೆ. ಸೋಂಕಿನಿಂದ ನಾಲ್ವರು ಮೃತಪಟ್ಟಿದ್ದು, ಸಾವಿನ ಸಂಖ್ಯೆ 33ಕ್ಕೆ ಏರಿಕೆಯಾಗಿದೆ.

ಜಿಲ್ಲೆಯಲ್ಲಿ ಗುರುವಾರ ಹೊಸಪೇಟೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ 46 ಜನರಲ್ಲಿ ಸೋಂಕು ಪತ್ತೆಯಾಗಿದೆ. ಸಂಡೂರು ತಾಲೂಕು 19, ಬಳ್ಳಾರಿ 17, ಸಿರುಗುಪ್ಪ 5, ಹ.ಬೊ.ಹಳ್ಳಿ 1, ನೆರೆಯ ಆಂಧ್ರದ ಕರ್ನೂಲ್‌ ಜಿಲ್ಲೆಯ ಆಲೂಕು ಗ್ರಾಮದ 1 ಒಬ್ಬರು ಸೇರಿ ಒಟ್ಟು 89 ಮಂದಿಯಲ್ಲಿ ಕೋವಿಡ್‌ ಸೋಂಕು ದೃಢಪಟ್ಟಿದೆ. ಈ ಪೈಕಿ 32 ಐಎಲ್‌ಐ ಪ್ರಕರಣಗಳಾಗಿವೆ. 2 ದುರ್ಬಲ ವರ್ಗದ ಸಾರಿ ಪ್ರಕರಣಗಳಾಗಿವೆ. ಇಬ್ಬರು ಜಿಂದಾಲ್‌ ಉದ್ಯೋಗಿಯಾಗಿದ್ದು, ಮೂವರು ಜೈಪುರದಿಂದ ಹಿಂದಿರುಗಿದವರಿಗೆ ಸೋಂಕು ಪತ್ತೆಯಾಗಿದೆ. 17 ಜನರಿಗೆ ಸೋಂಕು ಹೇಗೆ ತಗುಲಿತು ಎಂಬುದನ್ನು ಪತ್ತೆಹಚ್ಚಲಾಗುತ್ತಿದೆ.

ಮತ್ತೊಬ್ಬ ಆರೋಗ್ಯ ಸಿಬ್ಬಂದಿಗೂ ಸೋಂಕು ಆವರಿಸಿದ್ದು, ಇನ್ನುಳಿದವರಿಗೆ ವಿವಿಧ ಸೋಂಕಿತರಿಂದ ಕೋವಿಡ್‌ ವೈರಸ್‌ ಆವರಿಸಿದೆ ಎಂದು ಡಿಸಿ ಎಸ್‌.ಎಸ್‌ .ನಕುಲ್‌ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಜಿಲ್ಲೆಯಲ್ಲಿ ಈವರೆಗೆ 1019 ಮಂದಿಗೆ ಕೋವಿಡ್‌ ಸೋಂಕು ಆವರಿಸಿದ್ದು, ಈವರೆಗೆ 457 ಜನರು ಸೋಂಕಿನಿಂದ ಗುಣಮುಖರಾಗಿ ಬಿಡುಗಡೆಯಾಗಿದ್ದಾರೆ. ಇನ್ನುಳಿದ 511 ಸಕ್ರಿಯ ಪ್ರಕರಣಗಳಾಗಿವೆ. 33 ಜನರು ಸೋಂಕಿಗೆ ಮೃತಪಟ್ಟಿದ್ದಾರೆ.