ಐಟಮ್‌ ಡ್ಯಾನ್ಸ್‌ , ಪೋಷಕ ಪಾತ್ರ, ಕಿರುತೆರೆ, ರಿಯಾಲಿಟಿ ಶೋ, ಮೋಡೆಲಿಂಗ್‌ ಹೀಗೆ ಎಲ್ಲದಕ್ಕೂ ಸೈ ಎನ್ನುವ ನಟಿಯೊಬ್ಬಳಿದ್ದರೆ ಅವಳು ಗೌಹರ್‌ ಖಾನ್. ಹದಿನಾಲ್ಕು ವರ್ಷಗಳ ಹಿಂದೆಯೇ ಗೌಹಾರ್‌ ಚಿಕ್ಕ ಪಾತ್ರವೊಂದರ ಮೂಲಕ ಬಾಲಿವುಡ್‌ಗೆ ಎಂಟ್ರಿ ಕೊಟ್ಟಳು. ಇದಾಗ ಬಳಿಕ ಕಿರುತೆರೆಗೆ ಹೋಗಿ ಹಲವು ರಿಯಾಲಿಟಿ ಶೋಗಳಲ್ಲಿ ಸ್ಪರ್ಧಿಯಾಗಿ, ಆ್ಯಂಕರ್‌ ಆಗಿ ಕಾಣಿಸಿಕೊಂಡಳು. ಬಿಚ್ಚಸ್‌ ಆ್ಯಂಡ್‌ ಮ್ಯೂಟಿ ಕ್ವೀನ್ಸ್‌, ಮೇಕಿಂಗ್‌ ಮಿಸ್‌ ಇಂಡಿಯಾ, ದ ಖಾನ ಸಿಸ್ಟರ್, ಖತ್ರೋಂ ಕಿ ಖೀಲಾಡಿ, ಇಂಡಿಯಾ ರಾ ಸ್ಟಾರ್‌, ಕಾಮೆಡಿ ನೈಟ್ಸ್‌ ವಿದ್‌ ಕಪಿಲ್‌ – ಹೀಗೆ ಹಲವು ರಿಯಾಲಿಟಿ ಶೋ ಮತ್ತು ಕಾಮೆಡಿ ಶೋಗಳಲ್ಲಿ ಭಾಗವಹಿಸಿದಳು. ಅವಳಿಗೆ ದೊಡ್ಡ ಮಟ್ಟದ ಹೆಸರು ತಂದುಕೊಟ್ಟದ್ದು ಬಿಗ್‌ಬಾಸ್‌ ರಿಯಾಲಿಟಿ ಶೋ. ಬಿಗ್‌ಬಾಸ್‌ 7ರ ವಿಜೇತೆ ಆಕೆ. ಅನಂತರ ಬಿಗ್‌ಬಾಸ್‌ 8 ಮತ್ತು 10ರಲ್ಲಿ ಅತಿಥಿಯಾಗಿ ಪಾಲ್ಗೊಂಡು ಮೆರೆದಳು.
ಆನ್‌-ಮೆನ್‌ ಎಟ್‌ ವರ್ಕ್‌, ಶಂಕರ್‌ ದಾದಾ ಎಂ.ಬಿ.ಬಿಎಸ್‌., ಕ್ಯಾ ಕೂಲ್‌ ಹೈ ಹಮ್‌ ಮುಂತಾದ ಚಿತ್ರಗಳಲ್ಲಿ ಐಟಮ್‌ ಹಾಡುಗಳಿಗೆ ಕುಣಿದು ಪಡ್ಡೆ ಹುಡುಗರ ನಿದ್ದೆಕೆಡಿಸಿದಳು. ರಾಕೆಟ್‌ ಸಿಂಗ್‌ : ಸೇಲ್ಸ್‌ಮ್ಯಾನ್‌ ಆಫ್ ದ ಇಯರ್‌, ಒನ್ಸ್‌ ಅಪಾನ್‌ ಎ ಟೈಮ್‌ ಇನ್‌ ಮುಂಬಯಿ, ಗೇಮ್‌, ಇಶಕ್‌ಝಾದೆ, ಓ ಯಾರಾ ಲೂಟ್‌ ಗಯಾ, ಫೀವರ್‌, ಫ‌ುದ್ದು, ಬದ್ರಿನಾಥ್‌ ಕಾ ದುಲ್ಹನಿಯಾ ಮುಂತಾದ ಚಿತ್ರಗಳಲ್ಲಿ ಪೋಷಕ ಪಾತ್ರಗಳಲ್ಲಿ ಮತ್ತು ನಾಯಕಿಯಾಗಿ ನಟಿಸಿದಳು. ಹೀಗೆ ಎಲ್ಲ ರೀತಿಯ ಪಾತ್ರಗಳಲ್ಲಿ ಮಿಂಚಿದ ಗೌಹಾರ್‌ ಈಗ ಬೇಗಮ್‌ ಜಾನ್‌ ಚಿತ್ರದಿಂದ ಮತ್ತೆ ಸುದ್ದಿಯಲ್ಲಿದ್ದಾಳೆ.
ಇದರಲ್ಲಿ ಪೋಷಕಿ ನಟಿಯೇ ಆಗಿದ್ದರೂ ಗೌಹಾರ್‌ ಅಭಿನಯ ಗಮನ ಸೆಳೆದಿದೆ. ಪುಣೆಯ ಸಂಪ್ರದಾಯಸ್ಥ ಕುಟುಂಬದಲ್ಲಿ ಜನಿಸಿದ ಗೌಹಾರ್‌ ಖಾನ್ ಚಿತ್ರರಂಗಕ್ಕೆ ಬಂದಿರುವುದು ಆಕಸ್ಮಿಕವಾಗಿ. ಅವಳ ಅಕ್ಕ ನಿಗಾರ್‌ ಖಾನ್ ಮೊದಲೇ ಚಿತ್ರರಂಗದಲ್ಲಿದ್ದರೂ ನಟಿಯಾಗಿ ದೊಡ್ಡ ಯಶಸ್ಸು ಕಂಡಿರಲಿಲ್ಲ. ಹೀಗಾಗಿ ಕಿರಿಯ ಮಗಳಾದ ಗೌಹಾರ್‌ ಸಿನೆಮಾಗಳಲ್ಲಿ ನಟಿಸುವುದು ಮನೆಯವರಿಗೆ ಇಷ್ಟವಿರಲಿಲ್ಲವಂತೆ. ಆದರೆ ಕುತೂಹಲಕ್ಕಾಗಿ ಮಾಡಿದ ಮಾಡೆಲಿಂಗ್‌ ಅವಳನ್ನು ಈ ಮಾಯಾಲೋಕಕ್ಕೆ ಕರೆತಂದಿತು. ಒಂದರ ಹಿಂದೆ ಇನ್ನೊಂದರಂತೆ ಅವಕಾಶಗಳು ಸಿಕ್ಕಿದ ಕಾರಣ ಮರಳಿ ಹೋಗುವ ಯೋಚನೆಯನ್ನೇ ಮಾಡಲಿಲ್ಲ. ಅಕ್ಕನಿಗೆ ಮರೀಚಿಕೆಯಾದ ಯಶಸ್ಸು ತನಗೆ ಸಿಕ್ಕಿದ ಹೆಮ್ಮೆಯಲ್ಲಿದ್ದಾಳೆ ಗೌಹಾರ್‌ ಖಾನ್.
