ಕಾರಹುಣ್ಣಿಮೆಗೆ ಕೋವಿಡ್ ಛಾಯೆ

ಬಸವನಬಾಗೇವಾಡಿ: ಕಾರಹುಣ್ಣಿಮೆ ಮೇಲೆ ಕೋವಿಡ್ ಕರಿನೆರಳು ಬಡಿದಿದ್ದು ದನ ಕರುಗಳಿಗೆ ಬೇಕಾಗಿರುವ ಹಗ್ಗ, ಬಾರಕೋಲ, ಗೆಜ್ಜೆಸರ, ಮುಗದಾನಿ ಸೇರಿದಂತೆ ಅಗತ್ಯ ಇರುವ ವಸ್ತುಗಳ ಖರೀದಿ ಮಂದಗತಿಯಲ್ಲಿ ನಡೆದಿದೆ.

ಯುಗಾದಿಯಿಂದ ಜಿಲ್ಲೆಯ ಅನೇಕ ಕಡೆಗಳಿಗೆ ಜಾತ್ರೆ ಹಾಗೂ ಕಾರುಹುಣ್ಣಿಮೆ ನಿಮಿತ್ತ ಕೃಷಿ ಚಟುವಟಿಕೆಗಳಿಗೆ ಅಗತ್ಯ ಇರುವ ವಸ್ತುಗಳ ಖರೀದಿ ಈ ಹಿಂದೆ ಜೋರಾಗಿ ನಡೆಯುತ್ತಿತ್ತು. ಈ ವರ್ಷ ಕೋವಿಡ್ ಭೀತಿಯಿಂದ ಜಾತ್ರೆಗಳು ರದ್ದಾಗಿದ್ದು ವ್ಯಾಪಾರಸ್ಥರು ಆತಂಕದಲ್ಲಿದ್ದಾರೆ.

ಯುಗಾದಿ ಜಾತ್ರೆಗೆ 2 ಲಕ್ಷ ಮೌಲ್ಯದ ಕೃಷಿ ಚಟುವಟಿಕೆಗಳ ವಸ್ತುಗಳನ್ನು ಮಾರಾಟಕ್ಕೆ ತಂದಿದ್ದೆ. ಜಾತ್ರೆ ರದ್ದಾಗಿದ್ದರಿಂದ ತಂದ ವಸ್ತುಗಳು ಹಾಗೇ ಉಳಿದಿವೆ. ಈ ವರ್ಷದ ವಸ್ತುಗಳು ಈ ವರ್ಷವೆ ಮಾರಿದಾಗ ನಮಗೆ ಲಾಭವಾಗುತ್ತದೆ. ಮುಂದಿನ ವರ್ಷ ಅರ್ಧ ಬೆಲೆಗೆ ಮಾರಾಟ ಮಾಡಬೇಕಾಗುತ್ತದೆ ಎನ್ನುತ್ತಾರೆ ಇಂಗಳೇಶ್ವರದ ವ್ಯಾಪಾರಸ್ಥ ರಫೀಕ್‌ ಅತ್ತಾರ.

ಹತ್ತಾರು ವರ್ಷಗಳ ಹಿಂದೆ ಕುಂಟೆ, ಕೂರಿಗೆ, ನೇಗಿಲು ಸೇರಿದಂತೆ ಅನೇಕ ಕೃಷಿ ವಸ್ತುಗಳನ್ನು ತಯಾರಿಕೆ ಮಾಡುತ್ತಿದ್ದೆ. ಆಗಿನ ರೈತರ ಸಂಖ್ಯೆಗೂ ಈಗಿನ ರೈತರ ಸಂಖ್ಯೆಗೂ ಅಜಗಜಾಂತರ ವ್ಯತ್ಯಾಸವಿದೆ ಎನ್ನುತ್ತಾರೆ ಕೃಷಿ ವಸ್ತುಗಳ ತಯಾರಿಕ ಸಂಗಣ್ಣ ಬಡಿಗೇರ.