ಬಾರ್ಟಿ ಕ್ವಾರ್ಟರ್‌ ಫೈನಲ್‌ಗೆೆ, ಗಾಫ್ ಮನೆಗೆ

ಆಸ್ಟ್ರೇಲಿಯನ್‌ ಓಪನ್‌ ವನಿತಾ ಸಿಂಗಲ್ಸ್‌ನಲ್ಲಿ ವಿಶ್ವದ ನಂ.1 ಆಟಗಾರ್ತಿ, ತವರಿನ ಆ್ಯಶ್ಲಿ ಬಾರ್ಟಿ ಕ್ವಾರ್ಟರ್‌ ಫೈನಲ್‌ಗೆ ಓಟ ಬೆಳೆಸಿದ್ದಾರೆ. ಆದರೆ ಹಾಲಿ ಚಾಂಪಿಯನ್‌ ನವೋಮಿ ಒಸಾಕಾಗೆ ಸೋಲುಣಿಸಿದ ಅಮೆರಿಕದ 15ರ ತಾರೆ ಕೋಕೊ ಗಾಫ್ ಅವರ ಓಟ 16ರ ಸುತ್ತಿನಲ್ಲಿ ಕೊನೆಗೊಂಡಿದೆ.

ಆ್ಯಶ್ಲಿ ಬಾರ್ಟಿ ಅಮೆರಿಕದ ಅಲಿಸನ್‌ ರಿಸ್ಕೆ ವಿರುದ್ಧ 3 ಸೆಟ್‌ಗಳ ಹೋರಾಟ ನಡೆಸಿ 6-3, 1-6, 6-4 ಅಂತರದ ಗೆಲುವು ಸಾಧಿಸಿದರು. ಬಾರ್ಟಿ ಅವರ ಮುಂದಿನ ಎದುರಾಳಿ, ಎರಡು ಬಾರಿಯ ವಿಂಬಲ್ಡನ್‌ ಚಾಂಪಿಯನ್‌ ಪೆಟ್ರಾ ಕ್ವಿಟೋವಾ. ಇನ್ನೊಂದು ಪ್ರಿ-ಕ್ವಾರ್ಟರ್‌ ಫೈನಲ್‌ನಲ್ಲಿ ಕ್ವಿಟೋವಾ ಗ್ರೀಸ್‌ನ ಮರಿಯಾ ಸಕ್ಕರಿ ವಿರುದ್ಧ 6-7 (4-7), 6-3, 6-2 ಅಂತರದ ಗೆಲುವು ಕಂಡರು.

ಒಸಾಕಾ ವಿರುದ್ಧ ಭಾರೀ ಜೋಶ್‌ ತೋರಿದ್ದ ಕೋಕೊ ಗಾಫ್ ಅವರನ್ನು ಅಮೆರಿಕದವರೇ ಆದ ಸೋಫಿಯಾ ಕೆನಿನ್‌ 6-7 (5-7), 6-3, 6-0 ಅಂತರದಿಂದ ಪರಾಭವಗೊಳಿಸಿದರು. ಕೆನಿನ್‌ ಅವರಿನ್ನು ಟ್ಯುನೀಶಿಯಾದ ಒನ್ಸ್‌ ಜೇಬರ್‌ ವಿರುದ್ಧ ಆಡಲಿದ್ದಾರೆ. ಜೇಬರ್‌ 7-6 (7-4), 6-1ರಿಂದ ಚೀನದ ವಾಂಗ್‌ ಕ್ವಿಯಾಂಗ್‌ ಆಟಕ್ಕೆ ತೆರೆ ಎಳೆದರು.