ಆಡಳಿತ ಅಸ್ತಿತ್ವದಲ್ಲಿಲ್ಲ; ಮುಖ್ಯಾಧಿಕಾರಿ ಹುದ್ದೆಯೂ ಖಾಲಿ

ಬಂಟ್ವಾಳ: ಒಂದೆಡೆ ಬಂಟ್ವಾಳ ಪುರಸಭೆಗೆ ಚುನಾವಣೆ ನಡೆದು ಒಂದು ವರ್ಷ ಕಳೆದರೂ ಇನ್ನೂ ಆಡಳಿತ ಅಸ್ತಿತ್ವಕ್ಕೆ ಬಂದಿಲ್ಲ. ಇನ್ನೊಂದೆಡೆ ಈಗ ಪುರಸಭಾ ಮುಖ್ಯಾಧಿಕಾರಿ ವರ್ಗಾವಣೆಗೊಂಡು 10 ದಿನಗಳು ಕಳೆದರೂ ಇನ್ನೂ ನೂತನ ಮುಖ್ಯಾಧಿಕಾರಿ ಬಂದಿಲ್ಲ. ಹೀಗಾಗಿ ಪುರಸಭೆಯಲ್ಲಿ ಆಡಳಿತದ ಜತೆಗೆ ಅಧಿಕಾರಿಯೂ ಇಲ್ಲ ದಂತಾಗಿದೆ.

ಬಂಟ್ವಾಳ ಪುರಸಭೆ ಯಲ್ಲಿ ಕಳೆದ ಎರಡೂ ವರೆ ವರ್ಷಗಳಿಂದ ಮುಖ್ಯಾಧಿಕಾರಿಯಾಗಿ ಕಾರ್ಯ ನಿರ್ವಹಿಸು ತ್ತಿದ್ದ ರೇಖಾ ಜೆ. ಶೆಟ್ಟಿ ಅವರು ಕಾರ್ಕಳಕ್ಕೆ ವರ್ಗಾವಣೆಗೊಂಡು, ಸೆ. 26ರಂದು ಬಂಟ್ವಾಳ ಪುರಸಭೆಯಿಂದ ನಿರ್ಗಮಿಸಿದ್ದಾರೆ. ಅವರು ನಿರ್ಗಮಿಸುವ ಸಂದರ್ಭದಲ್ಲಿ ಪುರಸಭೆಯ ವ್ಯವಸ್ಥಾಪಕಿ ಲೀಲಾವತಿಯವರಿಗೆ ಚಾರ್ಜ್‌ ನೀಡಿದ್ದು, ಬೇರೆಡೆಯಿಂದ ಯಾರೂ ಪ್ರಭಾರ ನೆಲೆಯಲ್ಲಿಯೂ . ಆಗಮಿಸಿಲ್ಲ.

ಆಡಳಿತ ವ್ಯವಸ್ಥೆ ಯಿಲ್ಲದೆ ಅಧ್ಯಕ್ಷರು ಇಲ್ಲದಿದ್ದು, ಪ್ರಸ್ತುತ ಆಡಳಿತಾಧಿಕಾರಿಯಾಗಿ ಮಂಗಳೂರು . ಸಹಾಯಕ ಕಮಿಷನರ್‌ ಜವಾಬ್ದಾರಿ ನಿರ್ವಹಿಸುತ್ತಿದ್ದಾರೆ. ಈಗ ಮುಖ್ಯಾ ಧಿಕಾರಿ ಹುದ್ದೆಯನ್ನೂ ಇತರರು ನಿರ್ವಹಿಸುವಂತಾಗಿದೆ.

ಪ್ರಭಾರ ನೇಮಕದ ಜವಾಬ್ದಾರಿಯನ್ನು ಜಿಲ್ಲಾ ನಗರ ಯೋಜನ ನಿರ್ದೇಶಕರ ಕಚೇರಿ ನಿರ್ವಹಿಸುತ್ತದೆ. ಆದರೆ ಪ್ರಸ್ತುತ ರೇಖಾ ಜೆ. ಶೆಟ್ಟಿ ಅವರೇ ಚಾರ್ಜ್‌ ನೀಡಿರುವ ಲೀಲಾವತಿ ಪ್ರಭಾರ ನೆಲೆಯಲ್ಲಿದ್ದಾರೆ. ಅವರೇ ಪ್ರಭಾರ ಅಧಿಕಾರಿಗೆ ಜವಾಬ್ದಾರಿ ನೀಡಿರುವುದರಿಂದ ನಾವು ಬೇರೆ ಅಧಿಕಾರಿಗೆ ಜವಾಬ್ದಾರಿ ನೀಡಬೇಕಿಲ್ಲ ಎಂದು ನಗರ ಯೋಜನ ನಿರ್ದೇಶಕರ ಕಚೇರಿ ಅಧಿಕಾರಿಗಳು ಹೇಳುತ್ತಾರೆ.

ಒಂದು ಮೂಲದ ಪ್ರಕಾರ ಬಂಟ್ವಾಳದಲ್ಲಿ ಕೆಲವು ಸಮಯಗಳ ಹಿಂದೆ ಕಾರ್ಯ ನಿರ್ವಹಿಸಿದ್ದ, ಪ್ರಸ್ತುತ ಪುತ್ತೂರಿನಲ್ಲಿ ವ್ಯವಸ್ಥಾಪಕಿಯಾಗಿರುವ ಅಧಿಕಾರಿಯೊಬ್ಬರು ಬಂಟ್ವಾಳ ಪುರಸಭೆಗೆ ಮುಖ್ಯಾಧಿಕಾರಿಯಾಗಿ ಆಗಮಿಸುತ್ತಾರೆ ಎನ್ನಲಾಗುತ್ತಿದೆ. ಜತೆಗೆ ಇತರ ಅಧಿಕಾರಿಗಳ ಹೆಸರು ಗಳೂ ಕೇಳಿಬರುತ್ತಿವೆ. ಮುಖ್ಯಾಧಿಕಾರಿ ಯವರ ನೇಮಕವು ಸರಕಾರಿ ಮಟ್ಟದಲ್ಲಿ ನಡೆಯುತ್ತಿರುವುದರಿಂದ ಸ್ಥಳೀಯ ಅಧಿಕಾರಿಗಳಿಗೆ ಈ ಕುರಿತುಹಿತಿ ಇಲ್ಲ.

ಹೊಸ ಮುಖ್ಯಾಧಿಕಾರಿಯವರು ಬರುವವರೆಗೆ ಹಿಂದಿನವರನ್ನೇ ನಿಲ್ಲಿಸುವ ಕುರಿತು ಮನವಿ ಮಾಡಲಾಗಿತ್ತಾದರೂ ಒತ್ತಡ ಬರುತ್ತದೆ ಎಂಬ ಕಾರಣಕ್ಕೆ ಅವರು ಬೇರೆಯವರಿಗೆ ಚಾರ್ಜ್‌ ನೀಡಿ ತೆರಳಿದ್ದಾರೆ. ರೇಖಾ ಶೆಟ್ಟಿ ಅವರು ಈ ಹಿಂದೆ ಚುನಾವಣೆ ಸಂದರ್ಭದಲ್ಲಿ ಕಾರ್ಕಳ ಪುರಸಭೆಯಲ್ಲಿ ಕಾರ್ಯ ನಿರ್ವಹಿಸಿದ್ದು, ಹೀಗಾಗಿ ಮತ್ತೆ ಅವರನ್ನು ಕಾರ್ಕಳ ಪುರಸಭೆಗೆ ಮುಖ್ಯಾಧಿಕಾರಿಯನ್ನಾಗಿ ನೇಮಿಸಲಾಗಿದೆ.

ಎರಡೂ ಕಡೆ ರೇಖಾ ಶೆಟ್ಟಿ!
ಬಂಟ್ವಾಳದ ಹಿಂದಿನ ಮುಖ್ಯಾಧಿಕಾರಿ ಕಾರ್ಕಳಕ್ಕೆ ವರ್ಗಾವಣೆಗೊಂಡು ತೆರಳಿದ್ದರೂ ಬಂಟ್ವಾಳ ಹಾಗೂ ಕಾರ್ಕಳ ಪುರಸಭೆಗಳ ವೆಬ್‌ಸೈಟ್‌ಗಳಲ್ಲಿ ಮಾತ್ರ ರೇಖಾ ಜೆ. ಶೆಟ್ಟಿ ಅವರೇ ಮುಖ್ಯಾಧಿಕಾರಿ ಆಗಿದ್ದಾರೆ. ಇದೂ ಗೊಂದಲಕ್ಕೆ ಕಾರಣವಾಗಲಿದೆ.

ಅ. 20ರ ಬಳಿಕ ಬರುತ್ತಾರೆ?
ಪುರಸಭೆಯ ಮೂಲಗಳ ಪ್ರಕಾರ ನೂತನ ಮುಖ್ಯಾಧಿಕಾರಿಯವರು ಅ. 20ರ ಬಳಿಕ ಆಗಮಿಸುತ್ತಾರೆ ಎಂದು ಹೇಳಲಾಗುತ್ತಿದ್ದು, ಆದರೆ ಇದು ಖಚಿತ ಮಾಹಿತಿಯಲ್ಲ. ಪ್ರಸ್ತುತ ಹಿಂದಿನ ಮುಖ್ಯಾಧಿಕಾರಿ ನಿರ್ಗಮಿಸಿ 10 ದಿನಗಳು ಕಳೆದಿದ್ದು, ಬೇರೆ ಮುಖ್ಯಾಧಿಕಾರಿ ಆಗಮಿಸಲು ಹೆಚ್ಚಿನ ಅಂತರ ಇದ್ದಾಗ ಬೇರೆ ಅಧಿಕಾರಿಗಳನ್ನು ಪ್ರಭಾರ ನೆಲೆಯಲ್ಲಿ ನೇಮಿಸಲಾಗುತ್ತದೆ.

 ನಮ್ಮ ಗಮನಕ್ಕೆ ಬಂದಿಲ್ಲ
ಬಂಟ್ವಾಳ ಪುರಸಭೆಗೆ ಮುಖ್ಯಾಧಿಕಾರಿ ಯವರ ನೇಮಕ ವಿಚಾರ ಸರಕಾರಿ ಮಟ್ಟ ದಲ್ಲಿ ನಡೆಯುವ ಪ್ರಕ್ರಿಯೆ. ಹೀಗಾಗಿ ಅದರ ಕುರಿತು ನಮ್ಮ ಗಮನಕ್ಕೆ ಯಾವುದೇ ವಿಚಾರ ಬಂದಿಲ್ಲ.
 ಡಾ| ಜಿ. ಸಂತೋಷ್‌ಕುಮಾರ್‌, ಪ್ರಭಾರ ಯೋಜನ ನಿರ್ದೇಶಕರು, ದ.ಕ.

 ಚಾರ್ಜ್‌ ನೀಡಿದ್ದಾರೆ
ಪ್ರಸ್ತುತ ಹಿಂದಿನ ಮುಖ್ಯಾಧಿಕಾರಿಯವರು ನನಗೆ ಚಾರ್ಜ್‌ ನೀಡಿ ಹೋಗಿದ್ದಾರೆ. ಹೊಸ ಮುಖ್ಯಾಧಿಕಾರಿಯವರು ಆಗಮಿಸುವ ಕುರಿತು ನಮಗೆ ಮಾಹಿತಿಯಿಲ್ಲ. ಆದರೆ ಚೆಕ್ಕಿನ ವ್ಯವಹಾರಗಳನ್ನು ಬೇರೆ ಮುಖ್ಯಾಧಿಕಾರಿಯವರೇ ಮಾಡಬೇಕಾಗುತ್ತದೆ.
– ಲೀಲಾವತಿ, ವ್ಯವಸ್ಥಾಪಕಿ, ಬಂಟ್ವಾಳ ಪುರಸಭೆ

-  ಕಿರಣ್‌ ಸರಪಾಡಿ