Bangladesh ಹಿಂಸಾಚಾರ: ಕೋಲ್ಕತಾ ಹಿಂದೂ ಸಂಘಟನೆಗಳ ಭಾರೀ ಪ್ರತಿಭಟನೆ

ಕೋಲ್ಕತಾ: ನೆರೆಯ ಬಾಂಗ್ಲಾದೇಶದಲ್ಲಿನ ಹಿಂಸಾಚಾರ ಹಾಗೂ ಹಿಂದೂ ಧಾರ್ಮಿಕ ಮುಖಂಡ ಚಿನ್ಮಯಿ ಕೃಷ್ಣದಾಸ್‌ ಅವರನ್ನು ಬಂಧಿಸಿರುವುದನ್ನು ಖಂಡಿಸಿ, ಕೋಲ್ಕತಾದ ಬಂಗೀಯ ಹಿಂದೂ ಜಾಗರಣ್‌ ಮಂಚ್‌ ಗುರುವಾರ ರ್ಯಾಲಿ ನಡೆಸಿದೆ. ಕೋಲ್ಕತಾದ ಸೀಲ್ಡಾ ರೈಲು ನಿಲ್ದಾಣದಿಂದ ಬಾಂಗ್ಲಾದ ಡೆಪ್ಯೂಟಿ ಹೈಕಮಿಷನ್‌ ಕಚೇರಿ ವರೆಗೆ ಮೆರವಣಿಗೆ ನಡೆಸಲು ಯೋಜಿಸಿದ್ದ ಪ್ರತಿಭಟ­ನಾಕಾರರನ್ನು ಮಾರ್ಗ ಮದ್ಯೆ ಪೊಲೀಸರು ತಡೆದಿದ್ದಾರೆ.

ಅಮೆರಿಕದಲ್ಲೂ ಆಕ್ರೋಶ: ಹಿಂದೂ ನಾಯಕ ಚಿನ್ಮಯಿ ಕೃಷ್ಣದಾಸ್‌ ಸೆರೆ ಬಂಧನ ಖಂಡಿಸಿದ್ದನ್ನು ಅಮೆರಿಕದಲ್ಲಿನ ಹಿಂದೂ ಸಂಘಟನೆಗಳೂ, ಭಾರತೀಯ ಸಂಘಟನೆ­ಗಳೂ ಧ್ವನಿಯೆತ್ತಿವೆ. ಈ ಹಿಂಸಾಚಾರಗಳನ್ನು ತಡೆಯಲು ಅಮೆರಿಕ ಮಧ್ಯಪ್ರವೇಶಿಸಬೇಕು ಎಂದು ಬೇಡಿಕೆಯಿಟ್ಟಿವೆ. ಫೌಂಡೇಶನ್‌ ಫಾರ್‌ ಇಂಡಿಯಾ ಆ್ಯಂಡ್‌ ಇಂಡಿಯನ್‌ ಡಯಾ­ಸ್‌ಪೋರಾ ಸ್ಟಡೀಸ್‌­ (ಎಫ್ಐಐಡಿಎಸ್‌) ಅಮೆರಿಕ ಅಧ್ಯಕ್ಷ ಜೋ ಬೈಡನ್‌, ನಿಯೋಜಿತ ಅಧ್ಯಕ್ಷ ಟ್ರಂಪ್‌ಗೆ ಪ್ರತ್ಯೇಕ ಪತ್ರಗಳನ್ನು ಬರೆದಿದ್ದು, ಬಾಂಗ್ಲಾ­ದಲ್ಲಿನ ಅಲ್ಪಸಂಖ್ಯಾತ ಸಮುದಾಯಗಳ ಪರಿಸ್ಥಿತಿ ಬಗ್ಗೆ ಕಳವಳ ವ್ಯಕ್ತಪಡಿಸಿದೆ.

ಶೇಖ್‌ ಹಸೀನಾ ಖಂಡನೆ
ಚಿನ್ಮಯಿ ಕೃಷ್ಣದಾಸ್‌ ಅವರನ್ನು ದೇಶದ್ರೋಹದ ಆರೋಪದಲ್ಲಿ ಬಾಂಗ್ಲಾದೇಶ ಬಂಧಿಸಿರುವುದನ್ನು ಅಲ್ಲಿನ ಮಾಜಿ ಪ್ರಧಾನಿ ಶೇಖ್‌ ಹಸೀನಾ ಖಂಡಿಸಿದ್ದು, ತಕ್ಷಣ ಅವರನ್ನು ಬಿಡುಗಡೆ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ. “ಸನಾತನ ಧರ್ಮದ ಪ್ರಮುಖ ನಾಯಕ­ರೊಬ್ಬರನ್ನು ಅನ್ಯಾಯವಾಗಿ ಬಂಧಿಸಲಾಗಿದೆ. ದೇಶದಲ್ಲಿ ಧಾರ್ಮಿಕ ಸ್ವಾತಂತ್ರ್ಯ ಹಾಗೂ ಜನರ ಜೀವಕ್ಕೆ ಸುರಕ್ಷತೆ ನೀಡಬೇಕು’ ಎಂದು ಹಸೀನಾ ಹೇಳಿದ್ದಾರೆ.