ಬಾಲ್‌ಬ್ಯಾಡ್ಮಿಂಟನ್‌: ಆಳ್ವಾಸ್‌ಗೆ ಪ್ರಶಸ್ತಿ

ಉಡುಪಿ: ಹಿರಿಯಡ್ಕದ ಸರಕಾರಿ ಪ್ರಥಮ ದರ್ಜೆ ಕಾಲೇಜಿನ ಆಶ್ರಯದಲ್ಲಿ ನಡೆದ ಮಂಗಳೂರು ವಿವಿ ಅಂತರ್‌ ಕಾಲೇಜ್‌ ವನಿತೆಯರ ಬಾಲ್‌ ಬ್ಯಾಡ್ಮಿಂಟನ್‌ ಪಂದ್ಯಾಟದಲ್ಲಿ ಮೂಡಬಿದಿರೆಯ ಆಳ್ವಾಸ್‌ ಪ್ರಶಸ್ತಿ ಗೆದ್ದುಕೊಂಡಿದೆ.

ಫೈನಲ್‌ ಹೋರಾಟದಲ್ಲಿ ಉಜಿರೆಯ ಎಸ್‌ಡಿಎಂ ಕಾಲೇಜ್‌ ತಂಡವನ್ನು 35-5, 35-14 ನೇರ ಸೆಟ್‌ಗಳಿಂದ ಕೆಡಹಿದ ಆಳ್ವಾಸ್‌ ಸತತ 12ನೇ ವರ್ಷ ಪ್ರಶಸ್ತಿ ಗೆದ್ದ ಸಾಧನೆಗೈದು ಫಾಬಿಯನ್‌ ಬಿ ಕುಲಾಸೊ ಸ್ಮರಣಾರ್ಥ ಟ್ರೋಫಿಯನ್ನು ತನ್ನದಾಗಿಸಿಕೊಂಡಿತು. ಆಳ್ವಾಸ್‌ನ ಕಾವ್ಯಾ ಎಂಆರ್‌ ಉತ್ತಮ ಆಕ್ರಮಣಕಾರ್ತಿ, ರಂಜಿತಾ ರಕ್ಷಣಾತ್ಮಕ ಆಟಗಾರ್ತಿ ಹಾಗೂ ಎಸ್‌ಡಿಎಂನ ಅಕ್ಷತಾ ಸರ್ವಾಂಗೀಣ ಆಟಗಾರ್ತಿ ಪ್ರಶಸ್ತಿ ಪಡೆದರು.

ಈ ಮೊದಲು ನಡೆದ ಸೆಮಿಫೈನಲ್‌ ಪಂದ್ಯಗಳಲ್ಲಿ ಆಳ್ವಾಸ್‌ ತಂಡವು ವಾಮದಪದವಿನ ಪ್ರಥಮ ದರ್ಜೆ ಕಾಲೇಜ್‌ ತಂಡವನ್ನು ಹಾಗೂ ಎಸ್‌ಡಿಎಂ ತಂಡವು ಕಾರ್ಕಳದ ಶ್ರೀ ಭುವನೇಂದ್ರ ಕಾಲೇಜ್‌ ತಂಡವನ್ನು ಸೋಲಿಸಿದ್ದವು.