ಬಜಪೆ: ಹಳೆಯ ವಿದ್ಯುತ್‌ ಕಂಬ ತೆರವು

ಬಜಪೆ: ಬಜಪೆ ಪಟ್ಟಣ ಪಂಚಾಯತ್‌ಗೆ ಹೋಗುವ ಮಾರುಕಟ್ಟೆ ಬಳಿ ಉಪಯೋಗ ಮಾಡದ ಹಳೆಯ ವಿದ್ಯುತ್‌ ಕಂಬವು ಪಾದಚಾರಿ ಹಾಗೂ ವಾಹನ ಸಂಚಾರಕ್ಕೆ ಅಡ್ಡಿಯಾಗುವ ಬಗ್ಗೆ ಉದಯವಾಣಿ ಸುದಿನ ವರದಿ ಮೂಲಕ ಮೆಸ್ಕಾಂ ಇಲಾಖೆಯ ಗಮನವನ್ನು ಸೆಳೆದಿತ್ತು.

ಮೆಸ್ಕಾಂ ಇಲಾಖೆಯು ಕ್ರೇನ್‌ ಮೂಲಕ ಆ ಕಬ್ಬಿಣದ ವಿದ್ಯುತ್‌ ಕಂಬವನ್ನು ಅಲ್ಲಿಂದ ತೆಗೆದಿದೆ. ಈ ಕಬ್ಬಿಣದ ಹಳೆಯ ವಿದ್ಯುತ್‌ ಕಂಬ ಉಪಯೋಗಕ್ಕಿಲ್ಲದೇ ವಾಹನ ಸಂಚಾರ ಹಾಗೂ ಪಾದಚಾರಿಗಳಿಗೆ ತೊಂದರೆಯಾಗುತ್ತಿತ್ತು. ಮಳೆಯ ನೀರು ಸರಾಗವಾಗಿ ಹರಿಯಲು ಇದು ಅಡ್ಡಿಯಾಗುತ್ತಿತ್ತು.

ರಸ್ತೆಯ ಬದಿಯಲ್ಲಿ ಸೀಯಾಳದ ಸಿಪ್ಪೆಗಳು, ಸೋಡಾ ಬಾಟಲಿಗಳು ಇನ್ನೂ ರಾಶಿ ಉಳಿದಿವೆ. ಬಜಪೆ ಪಟ್ಟಣ ಪಂಚಾಯತ್‌ ಸ್ವಚ್ಛತೆಗೆ ತೊಂದರೆಯಾಗಿದೆ. ಈ ಬಗ್ಗೆ ಬಜಪೆ ಪಟ್ಟಣ ಪಂಚಾಯತ್‌ ಕಾರ್ಯವೆಸಗಬೇಕಾಗಿದೆ.