ಬಾಗೇಗೌಡ ಪ್ರಚಾರ ಬಿರುಸು

ಬೆಂಗಳೂರು: ಬಸವನಗುಡಿ ವಿಧಾನಸಭಾ ಕ್ಷೇತ್ರದ ಜೆಡಿಎಸ್‌ ಅಭ್ಯರ್ಥಿ ಬಾಗೇಗೌಡ ಮತಯಾಚನೆ ಚುರುಕುಗೊಳಿಸಿದ್ದು, ಮಂಗಳವಾರ ಗಿರಿನಗರ ಹಾಗೂ ಸುತ್ತಮುತ್ತಲಿನ ಭಾಗಗಳಲಿ ಬಿರುಸಿನ ಮತಯಾಚನೆ ನಡೆಸಿದರು.

ಗಿರಿನಗರ ವಿಶ್ವಭಾರತಿ ಬಡಾವಣೆಯ ಸಮಸ್ಯೆಗಳ ಕುರಿತಾಗಿ ಸಾರ್ವಜನಿಕ ಮನವಿ ಸ್ವೀಕರಿಸಿದ ಬಾಗೇಗೌಡ ಅವರು, ಈ  ಸಮಸ್ಯೆ ಹಲವು ವರ್ಷಗಳಿಂದ ಬಾಕಿ ಉಳಿದುಕೊಂಡಿದೆ. ತಾವು ಮತನೀಡಿ ಶಾಸಕನಾಗಿ  ಕಾರ್ಯನಿರ್ವಹಿಸಲು ಅವಕಾಶ ಮಾಡಿಕೊಟ್ಟರೆ, ನಿಯಮಾನುಸಾರವಾಗಿ ಸಮಸ್ಯೆಗಳನ್ನು  ಬಗೆಹರಿಸುವುದಾಗಿ ಭರವಸೆ ನೀಡಿದರು.

ಜತೆಗೆ 4 ತಿಂಗಳ ಹಿಂದೆ ಬಿಡಿಎ ಅಧಿಕಾರಗಳು 2 ಮತ್ತು 3ನೇ ಹಂತದ ಕೆಲವು ನಿವೇಶನದಾರರಿಗೆ ನಿವೇಶನ ತೆರವುಗೊಳಿಸುವಂತೆ ನೋಟಿಸ್‌ ನೀಡಿರುವುದು ಗಮನಕ್ಕೆ ಬಂದಿದ್ದು, ಚುನಾವಣೆಯ ನಂತರ ಸಮಸ್ಯೆ ಬಗೆಹರಿಸಲು ಪ್ರಾಮಾಣಿಕವಾಗಿ ಪ್ರಯತ್ನ ಮಾಡುವುದಾಗಿ ತಿಳಿಸಿದರು.

ಕ್ಷೇತ್ರದ ಅಭಿವೃದ್ಧಿಯ ದೃಷ್ಟಿಯಿಂದ ಈ ಬಾರಿ ತಮ್ಮ ಪರ ಮತ ಚಲಾಯಿಸಿ ಗೆಲ್ಲಿಸುವಂತೆ ಮನವಿ ಮಾಡಿದರು. ಮತಯಾಚನೆ ವೇಳೆ ಬಾಗೇಗೌಡ ಅವರಿಗೆ ಬಸವನಗುಡಿ ವಿಧಾನಸಭಾ ಕ್ಷೇತ್ರದ ಅಧ್ಯಕ್ಷ ಎಂ ರಾಜು, ಕಾರ್ಯದರ್ಶಿ ಸಿದ್ದೇಗೌಡ, ವಾರ್ಡ್‌ ಅಧ್ಯಕ್ಷ ಹನುಮಂತೇಗೌಡರು ಹಾಗೂ ಸಾಮಾಜಿಕ ಹೋರಾಟಗಾರ ಅನಿಲ್‌ ಕುಮಾರ್‌ ಸಾಥ್‌ ನೀಡಿದರು.