ಬಾಹುಬಲಿ: ಬಾಕ್ಸ್‌ ಆಫೀಸ್‌ ಚಿಂದಿ !

ಮುಂಬಯಿ: ಬಹುಕೋಟಿ ವೆಚ್ಚದ ಅದ್ದೂರಿಚಿತ್ರ ಬಾಹುಬಲಿ 2 ತೆರೆಕಂಡಿರುವಂತೆ ದೇಶಾದ್ಯಂತ ಭರ್ಜರಿ ಗಳಿಕೆ ಮಾಡಿದೆ. ಮೊದಲ ದಿನವೇ ಸಿನೆಮಾ ಗಳಿಕೆ 70 ಕೋಟಿ ರೂ. ದಾಟಿರಬಹುದು ಎಂದು ಅಂದಾಜಿಸಲಾಗಿದ್ದು, ಬಾಕ್ಸ್‌ ಆಫೀಸ್‌ನಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದೆ.

ಬಾಹುಬಲಿ 2 ವೀಕ್ಷಣೆಗೆ ಜನರು ಹೆಚ್ಚಿನ ಉತ್ಸಾಹ ತೋರುತ್ತಿದ್ದು, ಅಡ್ವಾನ್ಸ್‌ ಬುಕ್ಕಿಂಗ್‌ ಇದೆ. ಎಲ್ಲ ಭಾಷೆಯಲ್ಲಿ ಸೇರಿ 70 ಕೋಟಿ ರೂ. ಒಂದೇ ದಿನದಲ್ಲಿ ಗಳಿಸಿದೆ. ವಾರಾಂತ್ಯದಲ್ಲಿ ಚಿತ್ರ 230 ರಿಂದ 240 ಕೋಟಿ ರೂ. ಗಳಿಸುವ ನಿರೀಕ್ಷೆ ಇದೆ ಎಂದು ಚಿತ್ರ ಪ್ರದರ್ಶಕ ಅಕ್ಷಯ್‌ ರತಿ ಹೇಳಿದ್ದಾರೆ. ಹಿಂದಿ ಒಂದೇ ಭಾಷೆಯಲ್ಲಿ ಬಾಹುಬಲಿ ಚಿತ್ರದ ಗಳಿಕೆ ಮೊದಲ ದಿನವೇ 40 ಕೋಟಿ ರೂ. ದಾಟಿದೆ ಎಂದು ಚಲನಚಿತ್ರ ಉದ್ಯಮ ವಿಮರ್ಶಕ ಕೋಮಲ್‌ನಾಥ್‌ ಹೇಳಿದ್ದಾರೆ. ಸದ್ಯ ಬಾಕ್ಸ್‌ ಆಫೀಸ್‌ನಲ್ಲಿ ಸುಲ್ತಾನ್‌, ಪಿಕೆ, ದಂಗಲ್‌ ಚಿತ್ರ ಅತಿ ಹೆಚ್ಚು ಗಳಿಕೆಯ ದಾಖಲೆಯನ್ನು ಬರೆದಿದ್ದು, ಬಾಹುಬಲಿ ಅವುಗಳನ್ನು ಮೀರಿಸುವ ನಿರೀಕ್ಷೆ ಇದೆ. ಬಾಹುಬಲಿ- 2 ಜಗತ್ತಿನಾದ್ಯಂತ 8500 ಪರದೆಗಳಲ್ಲಿ ಪ್ರದರ್ಶನ ಕಂಡಿದೆ.