ಆಸ್ಟ್ರೇಲಿಯಾದಲ್ಲಿ ಭಾರೀ ಪ್ರವಾಹ : ಕೊಚ್ಚಿ ಹೋದ ಕಾರು!

ನವದೆಹಲಿ : ಆಸ್ಟ್ರೇಲಿಯಾದ ಪೂರ್ವ ಕರಾವಳಿಯಲ್ಲಿ ಭಾರೀ ಮಳೆಯಾಗುತ್ತಿದೆ. ಪ್ರವಾಹ ಸ್ಥಿತಿ ಮುಂದುವರಿದಿದ್ದು, 15 ಸಾವಿರಕ್ಕೂ ಅಧಿಕ ಜನರನ್ನು ಸ್ಥಳಾಂತರ ಮಾಡಲಾಗಿದೆ ಎಂದು ವರದಿಯಾಗಿದೆ. ಇನ್ನು  ವಾರ್ಷಿಕವಾಗಿ ಸುರಿಯುವ ಮಳೆಗೆ ಹೋಲಿಸಿದರೆ ಅದರ ಮೂರನೇ ಎರಡರಷ್ಟು ಮಳೆ ಒಂದೇ ವಾರದಲ್ಲೇ ಸುರಿದಿದ್ದು, ಭಾರೀ ಪ್ರವಾಹವಾಗುತ್ತಿದ್ದು ಜನರ ಸ್ಥಿತಿ ಶೋಚನೀಯವಾಗಿದೆ.

ಇದೇ ಹಿನ್ನೆಲೆಯಲ್ಲಿ ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್ ಮ್ಯಾರಿಸನ್ ಟ್ವಿಟ್ಟರ್ ನಲ್ಲಿ ವಿಡಿಯೋ ಒಂದನ್ನು ಶೇರ್ ಮಾಡಿದ್ದು, ಜನರಿಗೆ ಪ್ರವಾಹದಲ್ಲಿ ಸಿಲುಕದಂತೆ ಎಚ್ಚರಿಸಿದ್ದಾರೆ.

ಪ್ರಧಾನಿ ಶೇರ್ ಮಾಡಿರುವ ವಿಡಿಯೋದಲ್ಲಿ ಕಾರೊಂದು ಪ್ರವಾಹಕ್ಕೆ ಸಿಲುಕಿ ಕೊಚ್ಚಿ ಹೋಗುತ್ತಿದೆ. ಈ ಬಗ್ಗೆ ಬರೆದಿರುವ ಸ್ಟಾಟ್ ಮ್ಯಾರಿಸನ್, ಈದೇ ಕಾರಣದಿಂದ ನೀವು ಪ್ರವಾಹಕ್ಕೆ ಹೋಗಬಾರದು. ವಾಹನಗಳು ಪ್ರವಾಹದಲ್ಲಿ ಸಿಲುಗಿದರೆ ಅವುಗಳನ್ನು ಅಲ್ಲಿಯೇ ಬಿಟ್ಟುಬಿಡಿ. ಅದೃಷ್ಟವಶಾತ್, ಕಾರು ಚಾಲಕನು ಕಾರನ್ನು ಒಯ್ಯುವ ಮೊದಲು ಸುರಕ್ಷಿತವಾಗಿ ಹೊರಬಂದಿದ್ದಾರೆ ಎಂದು ಟ್ವೀಟ್ ನಲ್ಲಿ ಬರೆದಿದ್ದಾರೆ.

ಇತ್ತೀಚೆಗೆ ಒಂದು ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದ್ದು, ಪ್ರವಾಹಕ್ಕೆ ಸಿಲುಕಿರುವ ಹಾವು ಮತ್ತು ಜೇಡಗಳು ಕಾಡುಗಳನ್ನು ಬಿಟ್ಟು ಮನೆಗಳಿಗೆ ನುಗ್ಗುತ್ತಿವೆ. ಒಟ್ಟಾರೆಯಾಗಿ ಆಸ್ಟ್ರೇಲಿಯಾ ಸದ್ಯ ಭಾರೀ ಪ್ರವಾಹಕ್ಕೆ ಸಿಲುಕಿದ್ದು, ರಕ್ಷಣಾ ಕಾರ್ಯ ಮುಂದುವರೆದಿದೆ.