ಮತ್ತೆ ಆಸೀಸ್‌ ಜಯ; ಭಾರತಕ್ಕೆ ಸರಣಿ ಸೋಲು

ವಡೋದರ: ಆಸ್ಟ್ರೇಲಿಯ ತಂಡದ ಅಮೋಘ ಆಟಕ್ಕೆ ಭಾರತೀಯ ಮಹಿಳೆಯರು ಮತ್ತೂಮ್ಮೆ ತಲೆಬಾಗಿದ್ದಾರೆ. ಇಲ್ಲಿ ನಡೆದ 2ನೇ ಏಕದಿನ ಪಂದ್ಯದಲ್ಲಿ ಆತಿಥೇಯ ಭಾರತ 60 ರನ್‌ಗಳಿಂದ ಸೋತು 3 ಪಂದ್ಯಗಳ ಏಕದಿನ ಸರಣಿಯನ್ನು ಕಳೆದುಕೊಂಡಿತು. ಎರಡೂ ಪಂದ್ಯ ಗೆದ್ದ ಕಾಂಗರೂ ಪಡೆ 2-0 ಮುನ್ನಡೆಯಲ್ಲಿದೆ. ಕೊನೆಯ ಪಂದ್ಯ ಮಾ.18ರಂದು ನಡೆಯಲಿದೆ. ಮೊದಲು ಬ್ಯಾಟಿಂಗ್‌ ಮಾಡಿದ ಆಸ್ಟ್ರೇಲಿಯ 9 ವಿಕೆಟ್‌ ಕಳೆದುಕೊಂಡು 287 ರನ್‌ ಬಾರಿಸಿತು. ಈ ಮೊತ್ತವನ್ನು ಬೆನ್ನುಹತ್ತಿದ ಭಾರತ 49.2 ಓವರ್‌ಗಳಲ್ಲಿ 227 ರನ್ನಿಗೆ ತನ್ನೆಲ್ಲ ವಿಕೆಟ್‌ ಕಳೆದುಕೊಂಡಿತು.

ದೊಡ್ಡ ಮೊತ್ತವನ್ನು ಬೆನ್ನು ಹತ್ತಿದ ಭಾರತಕ್ಕೆ ಆರಂಭಿಕ ಆಟಗಾರ್ತಿಯರಾದ ಸ್ಮತಿ ಮಂಧನಾ ಮತ್ತು ಪೂನಂ ರಾವತ್‌ 17.5 ಓವರ್‌ಗಳಲ್ಲಿ 88 ರನ್‌ ಕಲೆಹಾಕಿ ಉತ್ತಮ ಅಡಿಪಾಯ ಹಾಕಿದ್ದರು. ದುರದೃಷ್ಟವಶಾತ್‌ ಈ ಹಂತದಲ್ಲಿ ಸ್ಫೋಟಕ ಬ್ಯಾಟಿಂಗ್‌ ಪ್ರದರ್ಶಿಸುತ್ತಿದ್ದ ಮಂಧನಾ ವಿಕೆಟ್‌ ಉರುಳಿತು. ಮಂಧನಾ 53 ಎಸೆತದಲ್ಲಿ 67 ರನ್‌ ಬಾರಿಸಿದರು. ಅವರ ಆಟದಲ್ಲಿ 12 ಬೌಂಡರಿ, ಒಂದು ಸಿಕ್ಸರ್‌ ಸೇರಿತ್ತು.

11 ರನ್‌ ಆಗುವಷ್ಟರಲ್ಲಿ ಪೂನಂ (27) ಪೆವಿಲಿಯನ್‌ ಸೇರಿದರು. ಅನಂತರ ಭಾರತದ ಕುಸಿತ ತೀವ್ರಗೊಳ್ಳತೊಡಗಿತು. ಸ್ಫೋಟಕ ಆಟಗಾರ್ತಿ ಯರಾದ ದೀಪ್ತಿ ಶರ್ಮ (26), ಮಿಥಾಲಿ ರಾಜ್‌ (15), ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ (17) ಅಲ್ಪ ಮೊತ್ತಕ್ಕೆ ವಿಕೆಟ್‌ ಕಳೆದುಕೊಂಡದ್ದು ಭಾರತಕ್ಕೆ ಮುಳುವಾಯಿತು. ಇದರಿಂದ ಚೇತರಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಕೊನೆಯ ಹಂತದಲ್ಲಿ ಬೌಲರ್‌ಗಳಾದ ಪೂಜಾ ವಸ್ತ್ರಾಕರ್‌ (30), ಶಿಖಾ ಪಾಂಡೆ (15) ಸಣ್ಣ ಮಟ್ಟದ ಹೋರಾಟ ನೀಡಿದರು. ಇದರಿಂದ ಯಾವುದೇ ಲಾಭವಾಗಲಿಲ್ಲ. ಆಸ್ಟ್ರೇಲಿಯ ಪರ ಸ್ಪಿನ್ನರ್‌ ಜೆಸ್‌ ಜೊನಾಸೆನ್‌ 3 ವಿಕೆಟ್‌, ಎಲಿಸ್‌ ಪೆರ್ರಿ ಮತ್ತು ಅಮಂಡಾ ವೆಲ್ಲಿಂಗ್ರಟನ್‌ ತಲಾ 2 ವಿಕೆಟ್‌ ಕಿತ್ತರು.

ಆಸ್ಟ್ರೇಲಿಯ ದೊಡ್ಡ ಮೊತ್ತ
ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಆಸ್ಟ್ರೇಲಿಯಾ ಆಟಗಾರ್ತಿಯರು ದಿಟ್ಟ ಬ್ಯಾಟಿಂಗ್‌ ಮೂಲಕ ಆತಿಥೇಯ ಬೌಲರ್‌ಗಳ ಬೆವರಿಳಿಸಿದರು. ಮೊದಲ ಪಂದ್ಯದಲ್ಲಿ ಶತಕ ಬಾರಿಸಿದ್ದ ಆರಂಭಿಕ ಆಟಗಾರ್ತಿ ನಿಕೋಲ್‌ ಬೋಲ್ಟನ್‌ 84 ರನ್‌ ಹೊಡೆದು ಮತ್ತೆ ಆತಿಥೇಯರಿಗೆ ಸಿಂಹಸ್ವಪ್ನರಾದರು. 88 ಎಸೆತಗಳನ್ನು ಎದುರಿಸಿದ ಬೋಲ್ಟನ್‌ 12 ಬೌಂಡರಿ ಸಿಡಿಸಿದರು. ಈ ಸಾಧನೆಗಾಗಿ ಅವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿಯೂ ಒಲಿದು ಬಂತು. ಎಲಿಸ್‌ ಪೆರ್ರಿ (ಅಜೇಯ 70), ಬೇತ್‌ ಮೂನಿ (56) ಭರ್ಜರಿ ಬ್ಯಾಟಿಂಗ್‌ ಪ್ರದರ್ಶನ ನೀಡಿದರು. ಭಾರತದ ಪರ ಶಿಖಾ ಪಾಂಡೆ 3 ವಿಕೆಟ್‌ ಪಡೆದರು.

ಸಂಕ್ಷಿಪ್ತ ಸ್ಕೋರ್‌
ಆಸ್ಟ್ರೇಲಿಯ-9 ವಿಕೆಟಿಗೆ 287 (ಬೋಲ್ಟನ್‌ 84, ಪೆರ್ರಿ ಔಟಾಗದೆ 70, ಮೂನಿ 56, ಶಿಖಾ ಪಾಂಡೆ 61ಕ್ಕೆ 3, ಪೂನಂ ಯಾದವ್‌ 52ಕ್ಕೆ 2). ಭಾರತ-49.2 ಓವರ್‌ಗಳಲ್ಲಿ 227 (ಮಂಧನಾ 67, ಪೂಜಾ 30, ಪೂನಂ 27, ಜೊನಾಸೆನ್‌ 51ಕ್ಕೆ 3, ಪೆರ್ರಿ 41ಕ್ಕೆ 2). ಪಂದ್ಯಶ್ರೇಷ್ಠ: ನಿಕೋಲ್‌ ಬೋಲ್ಟನ್‌.