ಬ್ಯಾಂಕುಗಳ 6 ಲಕ್ಷ ಕೋಟಿ ಎನ್‌ಪಿಎ ಹರಾಜು: ತಿದ್ದುಪಡಿ ಕಾನೂನು ಜಾರಿ

ಹೊಸದಿಲ್ಲಿ : ಕೇಂದ್ರ ಸರಕಾರ ಇಂದು ಶುಕ್ರವಾರ 2017ರ ಬ್ಯಾಂಕಿಂಗ್‌ ನಿಯಂತ್ರಣ (ತಿದ್ದುಪಡಿ) ಅಧ್ಯಾದೇಶವನ್ನು ಜಾರಿಗೆ ತಂದಿದ್ದು ಭಾರತೀಯ ಬ್ಯಾಂಕಿಂಗ್‌ ವ್ಯವಸ್ಥೆಯಲ್ಲಿನ ಆರು ಲಕ್ಷ ಕೋಟಿ ರೂ. ಮೌಲ್ಯದ ಅನುತ್ಪಾದಕ ಆಸ್ತಿಗಳ ಹರಾಜಿಗೆ ಹೊಸ ಚೌಕಟ್ಟನ್ನು ರೂಪಿಸಿದೆ. 

ಕೇಂದ್ರ ಸರಕಾರ ಹೊರಡಿಸಿರುವ ಅಧ್ಯಾದೇಶ ತತ್‌ಕ್ಷಣದಿಂದಲೇ ಜಾರಿಗೆ ಬಂದಿದೆ. ದಿವಾಳಿತನದ ಸಂಹಿತೆಯಡಿ ಸುಸ್ತಿಗಾರ ಕಂಪೆನಿಗಳ ವಿರುದ್ಧ ದಿವಾಳಿ ಉಪಕ್ರಮಗಳನ್ನು ಬ್ಯಾಂಕುಗಳು ಈ ಕೂಡಲೇ ಕೈಗೊಳ್ಳುವಂತೆ ಅವುಗಳಿಗೆ ನಿರ್ದೇಶನ ನೀಡುವ ಅಧಿಕಾರವು ಈ ಅಧ್ಯಾದೇಶದಿಂದ ಆರ್‌ಬಿಐ ಗೆ ಪ್ರಾಪ್ತವಾಗಿದೆ. 

ಬ್ಯಾಂಕುಗಳ ಲಕ್ಷಾಂತರ ಕೋಟಿ ರೂ. ಮೌಲ್ಯದ ನಿಷ್ಪ್ರಯೋಜಕ ಅನುತ್ಪಾದಕ ಸೊತ್ತುಗಳನ್ನು ನಿಭಾಯಿಸುವ ನಿರ್ಧಾರ ತೆಗೆದುಕೊಳ್ಳುವುದಕ್ಕೆ ಮತ್ತು ಕಠಿನ ಕ್ರಮ ತೆಗೆದುಕೊಳ್ಳುವುದಕ್ಕೆ  ಆರ್‌ಬಿಐ ಗೆ ಈ ಅಧ್ಯಾದೇಶದಡಿ ಅಧಿಕಾರ ಪ್ರಾಪ್ತವಾಗಿದೆ. 

ಆರ್‌ಬಿಐ ಈಗಿನ್ನು ಈ ವಿಷಯದಲ್ಲಿ ಹಲವು ಉಸ್ತುವಾರಿ ಸಮಿತಿಗಳನ್ನು ರೂಪಿಸಲಿದೆ ಮತ್ತು ಬ್ಯಾಂಕುಗಳು ಹಾಗೂ ಜಂಟಿ ಸಾಲ ನೀಡಿಕೆ ವೇದಿಕೆಗಳ ಅನುತ್ಪಾದಕ ಆಸ್ತಿಗಳನ್ನು ಈ ಸಮಿತಿಗಳು ನಿಭಾಯಿಸಲಿವೆ.