Gaza: ದಕ್ಷಿಣ ಭಾಗದಲ್ಲಿ ದಾಳಿ- ಇಸ್ರೇಲ್‌ ಸಂಧಾನಕಾರರು ವಾಪಸ್‌- ಸಾವಿನ ಸಂಖ್ಯೆ 15 ಸಾವಿರ

ಖಾನ್‌ ಯೂನಿಸ್‌: ತಾತ್ಕಾಲಿಕ ಕದನ ವಿರಾಮ ಶುಕ್ರವಾರಕ್ಕೆ ಮುಕ್ತಾಯಗೊಂಡಿ ರುವಂತೆಯೇ ಗಾಜಾ ಪಟ್ಟಿಯಲ್ಲಿ ಹಮಾಸ್‌ ಉಗ್ರರನ್ನು ಮಟ್ಟ ಹಾಕುವ ಕಾರ್ಯಾಚರಣೆ ಬಿರುಸುಗೊಳಿಸಿದೆ. ವಿಶೇಷವಾಗಿ ಗಾಜಾ ಪಟ್ಟಿಯ ದಕ್ಷಿಣ ಭಾಗವನ್ನು ಆರಿಸಿಕೊಂಡು, ವೈಮಾನಿಕ ದಾಳಿ ನಡೆಸಲಾಗುತ್ತಿದೆ. ಹೀಗಾಗಿ ಶುಕ್ರವಾರದಿಂದ ಶನಿವಾರದ ಅವಧಿಯಲ್ಲಿ ಸಾವಿನ ಸಂಖ್ಯೆ 200ನ್ನು ಮೀರಿಸಿದೆ. ಈ ನಡುವೆ ದಕ್ಷಿಣ ಲೆಬನಾನ್‌ನಲ್ಲಿಯೂ ಇಸ್ರೇಲ್‌ ದಾಳಿ ನಡೆಸಿದೆ.

ಈ ನಡುವೆ, ಗಾಜಾ ಪಟ್ಟಿಯ ಸರಕಾರ ನೀಡಿದ ಮಾಹಿತಿಯ ಪ್ರಕಾರ ಅ.7ರಿಂದ ಈಚೆಗೆ ನಡೆಯುತ್ತಿರುವ ಕಾರ್ಯಾಚರಣೆ ಯಲ್ಲಿ ಸಾವಿಗೀಡಾದವರ ಸಂಖ್ಯೆ 15, 200. ಈ ಪೈಕಿ ಶೇ.70 ಮಂದಿ ಮಹಿಳೆಯರು ಮತ್ತು ಮಕ್ಕಳೇ ಆಗಿದ್ದಾರೆ. ಜತೆಗೆ 40 ಸಾವಿರಕ್ಕೂ ಅಧಿಕ ಮಂದಿ ಗಾಯ ಗೊಂಡಿದ್ದಾರೆ.

ಸಂಧಾನಕಾರರು ವಾಪಸ್‌: ಹಮಾಸ್‌ ಉಗ್ರ ಸಂಘಟನೆಯ ಜತೆಗೆ ಕದನ ವಿರಾಮ ಸದ್ಯಕ್ಕೆ ಮುಕ್ತಾಯವಾಗಿರುವ ಹಿನ್ನೆಲೆಯಲ್ಲಿ ಇಸ್ರೇಲ್‌ ತನ್ನ ಕಡೆಯ ಸಂಧಾನ ಕಾರರನ್ನು ವಾಪಸ್‌ ಕರೆಯಿಸಿಕೊಳ್ಳಲು ತೀರ್ಮಾನಿಸಿದೆ. ಎಂಟು ವಾರಗಳ ಅವಧಿಯ ಕಾಳಗದಲ್ಲಿ ಗಾಜಾ ಪಟ್ಟಿಯ ಶೇ.80 ಮಂದಿ ನಿರ್ಗತಿಕರಾಗಿದ್ದಾರೆ ಎಂದು ವಿಶ್ವಸಂಸ್ಥೆ ಹೇಳಿದೆ.

ನಿಗಾ, ಶೋಧ ಮತ್ತು ಹತ್ಯೆ
ಜಗತ್ತಿನಾದ್ಯಂತ ಇರುವ ಇಸ್ರೇಲ್‌ನ ವೈರಿಗಳು ವಿಶೇಷವಾಗಿ ಹಮಾಸ್‌ ನಾಯಕರನ್ನು ಕೊಂದೇ ಬಿಡಲು ತೀರ್ಮಾನಿಸಲಾಗಿದೆ. ಅದಕ್ಕಾಗಿ ಗಾಜಾ ಪಟ್ಟಿಯ ಯುದ್ಧದ ಬಳಿಕ ನಿಗಾ, ಶೋಧ ಮತ್ತು ಹತ್ಯೆ ಎಂಬ ಯೋಚನೆಯನ್ನು ಕರಾರುವಾಕ್ಕಾಗಿ ಅನುಷ್ಠಾನಗೊಳಿಸುವಂತೆ ಗುಪ್ತಚರ ಸಂಸ್ಥೆ ಮೊಸಾದ್‌ಗೆ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಸೂಚಿಸಿದ್ದಾರೆ. ಟರ್ಕಿ, ಕತಾರ್‌ ಮತ್ತು ಲೆಬನಾನ್‌ಗಳಲ್ಲಿ ಇರುವ ಹಮಾಸ್‌ನ ವರಿಷ್ಠ ನಾಯಕರನ್ನು ಮುಗಿಸಲು ಯೋಜನೆ ಸಿದ್ಧಪಡಿಸಲಾಗುತ್ತಿದೆ ಎಂದು ಮೂಲಗಳನ್ನು ಉಲ್ಲೇಖೀಸಿ “ವಾಲ್‌ಸ್ಟ್ರೀಟ್‌ ಜರ್ನಲ್‌’ ಪತ್ರಿಕೆ ವರದಿ ಮಾಡಿದೆ.