ಜೋಡುಪಾಲ ಸಂತ್ರಸ್ತರಿಗೆ ಸಂಘ-ಸಂಸ್ಥೆಯಿಂದ ನೆರವು 

ನರಿಮೊಗರು: ಇಲ್ಲಿನ ಪ್ರಖ್ಯಾತಿ ಯುವತಿ ಮಂಡಲ ಮತ್ತು ಮುಕ್ವೆ ಫ್ರೆಂಡ್ಸ್‌ ಕ್ಲಬ್‌ ತಂಡವು ಜೋಡುಪಾಲ ಸಂತ್ರಸ್ತರಿಗೆ ಧನಸಹಾಯ ನೀಡಿತು. ನೆರೆಯಿಂದಾಗಿ ಸಂಪೂರ್ಣವಾಗಿ ಮನೆಯನ್ನು ಕಳೆದುಕೊಂಡ 2 ಕುಟುಂಬಗಳಿಗೆ ಈ ತಂಡವು ಜೋಡುಪಾಲಕ್ಕೆ ಭೇಟಿಯಿತ್ತು ಧನ ಸಹಾಯ ಮಾಡಿತು.

ಪ್ರಕೃತಿ ವಿಕೋಪಕ್ಕೆ ಜೋಡುಪಾಲದ ಹಲವಾರು ಮನೆಗಳು ಹಾನಿಗೀಡಾಗಿದ್ದು, ಮನೆಯನ್ನು ಕಳೆದು ಕೊಂಡವರಲ್ಲಿ ಜಾರಪ್ಪ ಹಾಗೂ ವಸಂತ ಅವರ ಕುಟುಂಬವೂ ಇದೆ. ಮನೆಯೊಂದಿಗೆ ಅಪಾಯ ಪ್ರಮಾಣದ ಬೆಳೆಯನ್ನು ಕಳೆದುಕೊಂಡಿರುವ ಈ ಕುಟುಂಬವು ನಿರಾಶ್ರಿತರ ಗಂಜಿ ಕೇಂದ್ರದಲ್ಲಿ ಆಶ್ರಯ ಪಡೆದಿತ್ತು. ಜಾರಪ್ಪ ಅವರ ಕುಟುಂಬದಲ್ಲಿ 7 ಜನ ಸದಸ್ಯರಿದ್ದರೆ, ವಸಂತ ಎಂಬವರ ಕುಟುಂಬದಲ್ಲಿ ಒಂದೂವರೆ ವರ್ಷದ ಮಗು ಸೇರಿದಂತೆ ಒಟ್ಟು 5 ಜನ ಸದಸ್ಯರಿದ್ದಾರೆ. ಈ ಕುಟುಂಬಕ್ಕೆ ಪ್ರಖ್ಯಾತಿ ಯುವತಿ ಮಂಡಲ ಹಾಗೂ ಮುಕ್ವೆ ಫ್ರೆಂಡ್ಸ್‌ ಕ್ಲಬ್‌ ಊರವರಿಂದ ಸಂಗ್ರಹಿಸಿದ 22 ಸಾವಿರ ರೂ. ನೆರವನ್ನು ನೀಡಿ ಸಾಂತ್ವನ ಹೇಳಿದರು.

ಯುವತಿ ಮಂಡಲದ ಗೌರವ ಸಲಹೆಗಾರರಾದ ವಿದ್ಯಾ ನಾಯಕ್‌, ಸರೋಜಿನಿ ಪುರುಷರಕಟ್ಟೆ, ಅಧ್ಯಕ್ಷೆ ಗುರುಪ್ರಿಯಾ ನಾಯಕ್‌, ಸದಸ್ಯರಾದ ಖುಷಿತಾ ನರಿಮೊಗರು, ಪ್ರಿಯಾ ಕೂಡುರಸ್ತೆ, ಫ್ರೆಂಡ್ಸ್‌ ಕ್ಲಬ್‌ನ ಅಧ್ಯಕ್ಷ ಕೀರ್ತೀಶ್‌ ಬಂಗೇರ, ಕಾರ್ಯದರ್ಶಿ ಸುಭಾಶ್‌ ಅಳಕೆ, ಸದಸ್ಯ ಅಭಿ ಪುರುಷರಕಟ್ಟೆ, ಪುತ್ತೂರು ತಾಲೂಕು ಯುವಜನ ಒಕ್ಕೂಟದ ಅಧ್ಯಕ್ಷ ಸುಬ್ರಹ್ಮಣ್ಯ ಕರುಂಬಾರು, ಶ್ರೀ ಷಣ್ಮುಖ ಯುವಕ ಮಂಡಲದ ಅಧ್ಯಕ್ಷ ಕಮಲೇಶ್‌ ಎಸ್‌.ವಿ., ಸವಣೂರು ಸರಕಾರಿ ಪದವಿ ಪೂರ್ವ ಕಾಲೇಜಿನ ಪ್ರಾಂಶುಪಾಲೆ ಪದ್ಮಾವತಿ ಉಪಸ್ಥಿತರಿದ್ದರು.