ಹುತಾತ್ಮ ಯೋಧನಿಗೆ ಅಶ್ರುತರ್ಪಣ

ಧಾರವಾಡ: ಮಹಾರಾಷ್ಟ್ರದ ಗಡಚಿರೊಲಿ ಅರಣ್ಯದಲ್ಲಿ ನಕ್ಸಲರ ಕೂಂಬಿಂಗ್‌ ನಡೆಸುವಾಗ ಹುತಾತ್ಮರಾದ ಸಿಆರ್‌ ಪಿಎಫ್‌ ಯೋಧ ಮನಗುಂಡಿ ಗ್ರಾಮದ ಮಂಜುನಾಥ ಶಿವಲಿಂಗಪ್ಪ ಜಕ್ಕಣ್ಣವರ ಅವರ ಅಂತ್ಯಕ್ರಿಯೆಯಲ್ಲಿ ಜಿಲ್ಲಾಧಿಕಾರಿ ಡಾ| ಎಸ್‌.ಬಿ. ಬೊಮ್ಮನಹಳ್ಳಿ, ಎಸ್ಪಿ ಸಂಗೀತಾ ಜಿ.,

ಸಿಆರ್‌ಪಿಎಫ್‌  ಡಿಐಜಿ ಬಿ.ಎಸ್‌.ಗುಜ್ರಾಲ್‌, ಕೋಬ್ರಾ ಪಡೆಯ ಕಮಾಂಡೊ ವಸಂತ ಥಾಪಾ, ಅಪರ ಜಿಲ್ಲಾ ಧಿಕಾರಿ ಇಬ್ರಾಹಿಂ ಮೈಗೂರ, ತಹಶೀಲ್ದಾರ ಪ್ರಕಾಶ ಕುದರಿ,  ತಾಪಂ ಇಒ ರುದ್ರಸ್ವಾಮಿ,ಜಿಪಂ ಸದಸ್ಯ ನಿಂಗಪ್ಪ ಘಾಟಿನ ಸೇರಿದಂತೆ ವಿವಿಧ ಗಣ್ಯರು, ಮಠಾಧೀಶರು, ಗ್ರಾಮಸ್ಥರು, ಸಹಸ್ರಾರು ಯುವಜನ, ವಿದ್ಯಾರ್ಥಿಗಳು ಭಾಗವಹಿಸಿದ್ದರು. 

ಇದಕ್ಕೂ ಮೊದಲು ಜಿಲ್ಲಾಧಿಕಾರಿ ಡಾ|ಎಸ್‌.ಬಿ.ಬೊಮ್ಮನಹಳ್ಳಿ, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ  ಜಿ.ಸಂಗೀತಾ, ಪೊಲೀಸ್‌ ಆಯುಕ್ತ ನಾಗರಾಜ್‌, ಮೇಯರ್‌ ಡಿ.ಕೆ.ಚೌಹಾಣ, ಮನಗುಂಡಿಯ ಶ್ರೀ ಬಸವಾನಂದ ಸ್ವಾಮೀಜಿ, ವಿಜಯ ಕುಲಕರ್ಣಿ ಸೇರಿದಂತೆ ಗಣ್ಯರು, ಶಾಲಾ ಮಕ್ಕಳು ಅಂತಿಮ ದರ್ಶನ ಪಡೆದರು. 

ಸಾಂತ್ವನ: ಸ್ಥಳೀಯ ಶಾಸಕರೂ ಆಗಿರುವ ಕಾರ್ಮಿಕ ಸಚಿವ ಸಂತೋಷ ಲಾಡ್‌, ಸಂಸದ ಪ್ರಹ್ಲಾದ ಜೋಶಿ ಅವರು ವೀರಯೋಧ ಮಂಜುನಾಥ ಅವರ ಮನೆಗೆ ಭೇಟಿ ನೀಡಿ ಕುಟುಂಬದ ಸದಸ್ಯರಿಗೆ ಸಾಂತ್ವನ ಹೇಳಿದರು.