ಕಾಸ್ಟಿಂಗ್‌ ಕೌಚ್‌: ನಟಿಯ ಟಾಪ್‌ಲೆಸ್‌ ಪ್ರತಿಭಟನೆ

ಹೈದರಾಬಾದ್‌: ಅವಕಾಶ ಕೇಳಿ ಬರುವ ನಟಿಯರನ್ನು ಚಿತ್ರರಂಗದಲ್ಲಿ ಲೈಂಗಿಕ ತೃಷೆಗಾಗಿ ಬಳಸುವ ಕೆಟ್ಟ ಚಾಳಿಯ (ಕಾಸ್ಟಿಂಗ್‌ ಕೌಚ್‌) ವಿರುದ್ಧ ಸಿಡಿದೆದ್ದಿರುವ ತೆಲುಗು ಚಿತ್ರನಟಿ ಶ್ರೀ ರೆಡ್ಡಿ, ಹೈದರಾಬಾದ್‌ನಲ್ಲಿರುವ ಚಲನಚಿತ್ರ ವಾಣಿಜ್ಯ ಮಂಡಳಿ ಕಚೇರಿ ಮುಂದೆ ಶನಿವಾರ ಬೆಳಗ್ಗೆ ಟಾಪ್‌ಲೆಸ್‌ ಆಗಿ ಕುಳಿತು ಪ್ರತಿಭಟಿಸಿದ್ದಾರೆ. ಈ ವರ್ತನೆಯ ಹಿನ್ನೆಲೆಯಲ್ಲಿ, ಅವರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. 

ತೆಲುಗು ಚಿತ್ರವೊಂದರಲ್ಲಿ ಅವಕಾಶ ಕೇಳಲು ಹೋಗಿದ್ದಾಗ, ಆ ಚಿತ್ರಕ್ಕೆ ಸಂಬಂಧಿಸಿದ ಕೆಲವರು, ತಮ್ಮ ಅಸಭ್ಯ ಫೋಟೋಗಳನ್ನು, ವಿಡಿಯೋಗಳನ್ನು ಮಾಡಿ ತಮಗೆ ಕಳುಹಿಸುವಂತೆ ಸಲಹೆ ನೀಡಿದ್ದಾರೆ. ಅವರ ಹೆಸರುಗಳನ್ನು ಸದ್ಯದಲ್ಲೇ ಬಹಿರಂಗಪಡಿಸುತ್ತೇನೆ. ಅವಕಾಶ ಕೇಳಲು ಬರುವ ಹುಡುಗಿಯರೇನು ಇವರ ಆಟದ ವಸ್ತುಗಳೇ ಎಂದು ಅವರು ಕಿಡಿಕಾರಿದ್ದಾರೆ. ಆದರೆ, ಅವರ ಈ ಆಪಾದನೆಗಳನ್ನು ತೆಲುಗು ಚಿತ್ರರಂಗ ಅಲ್ಲಗಳೆದಿದೆ.