ಕ್ಯಾನ್ಸರ್‌ಗೆ ಆ್ಯಸ್ಪ್ರಿನ್‌ ರಾಮಬಾಣ?

ಲಂಡನ್‌: ಆ್ಯಸ್ಪ್ರಿನ್‌ ಅಂಶವುಳ್ಳ ಮಾತ್ರೆ ಅಥವಾ ಔಷಧವನ್ನು ಗುಣಮುಖವಾಗದ ಸ್ತನ ಕ್ಯಾನ್ಸರ್‌ನ ಚಿಕಿತ್ಸೆಯಾಗಬಹುದೆಂದು ಮ್ಯಾಂಚೆಸ್ಟರ್‌ನ ಕ್ರಿಸ್ಟಿ ಎನ್‌ಎಚ್‌ಎಸ್‌ ಫೌಂಡೇಶ‌ನ್‌ ಟ್ರಸ್ಟ್‌ನ ತಜ್ಞರು ಹೇಳಿದ್ದಾರೆ.

ಟ್ರಿಪಲ್‌ ನೆಗೆಟಿವ್‌ ಆಗಿರುವ ಸ್ತನ ಕ್ಯಾನ್ಸರ್‌ ಜೀವಕಣಗಳು ಕ್ಯಾನ್ಸರ್‌ ನಿರ್ಮೂಲನ ಔಷಧಗಳಿಗೆ ಸ್ಪಂದಿಸುವುದಿಲ್ಲ. ಆದರೆ, ಆ್ಯಸ್ಪ್ರಿನ್‌ನಲ್ಲಿರುವ ಉರಿಯೂತ ನಿಗ್ರಹ (ಆ್ಯಂಟಿ ಇನ್ಫಾಮೇಟರಿ) ಗುಣ, ಅಂಥ ಕ್ಯಾನ್ಸರ್‌ ಕಣಗಳು ಔಷಧಗಳಿಗೆ ಸ್ಪಂದಿಸುವಂತೆ ಪ್ರೇರೇಪಿಸುತ್ತದೆ.

ಜತೆಗೆ ಕ್ಯಾನ್ಸರ್‌ ಕಣಗಳು ದೇಹದ ಬೇರೆಡೆಗೆ ವ್ಯಾಪಿಸದಂತೆ ತಡೆಯುತ್ತದೆ ಎಂದು ತಜ್ಞರು ವಿವರಿಸಿದ್ದಾರೆ. ಆದರೆ, ಇದನ್ನು ಮತ್ತಷ್ಟು ಸಂಶೋಧನೆಗಳ ಮೂಲಕ ದೃಢಪಡಿಸಿಕೊಳ್ಳಬೇಕಿದೆ ಎಂದು ತಜ್ಞರು ತಿಳಿಸಿದ್ದಾರೆ.