ಸ್ಟೀಪಲ್‌ಚೇಸ್‌: ರಜತ ಸುಧಾ

ಜಕಾರ್ತಾ: ಭಾರತದ ಪ್ರತಿಭಾವಂತ ಓಟಗಾರ್ತಿ ಸುಧಾ ಸಿಂಗ್‌ 3,000 ಮೀ. ಸ್ಟೀಪಲ್‌ಚೇಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ. ಇದು ಅವರಿಗೆ ಏಶ್ಯಾಡ್‌ನ‌ಲ್ಲಿ ಒಲಿದ 2ನೇ ಪದಕವಾಗಿದೆ. 2010ರಲ್ಲಿ ಮೊದಲ ಬಾರಿ ಏಶ್ಯಾಡ್‌ನ‌ಲ್ಲಿ ಸ್ಟೀಪಲ್‌ಚೇಸ್‌ ಅಳವಡಿಸಿದಾಗ ಅವರು ಚಿನ್ನ ಗೆದ್ದು ಶುಭಾರಂಭಗೈದಿದ್ದರು. 

ಆರಂಭದಲ್ಲಿ ಸುಧಾ ಬಿರುಗಾಳಿಯಂತೆ ಮುನ್ನುಗ್ಗಿದರು. 9 ನಿಮಿಷ 40.03 ಸೆಕೆಂಡ್‌ಗಳಲ್ಲಿ ಗುರಿ ತಲುಪಿದರು. ಇದು ಅವರಿಗೆ ಬೆಳ್ಳಿಯನ್ನು ತಂದುಕೊಟ್ಟಿತು. ಬಹ್ರೈನ್‌ನ ವಿನ್‌ಫ್ರೆಡ್‌ ಯಾವಿ ಚಿನ್ನ ಗೆದ್ದರು (9 ನಿಮಿಷ, 36.52 ಸೆಕೆಂಡ್‌). ಕಂಚು ವಿಯೆಟ್ನಾಮ್‌ನ ತಿ ಓನ್‌ ಎನ್‌ಗುಯೆನ್‌ ಪಾಲಾಯಿತು (9 ನಿಮಿಷ, 43.83 ಸೆಕೆಂಡ್‌).

3000 ಮೀ. ಸ್ಟೀಪಲ್‌ಚೇಸ್‌ನಲ್ಲಿ 32 ವರ್ಷದ ಸುಧಾ ಅವರ ವೈಯಕ್ತಿಕ ಗರಿಷ್ಠ ವೇಗ 9:26.55. ಏಶ್ಯಾಡ್‌ನ‌ಲ್ಲಿ ಈ ಸಾಧನೆಯನ್ನು ಸರಿದೂಗಿಸಲು ಸಾಧ್ಯವಾಗಿದ್ದರೆ ಸುಧಾ ಚಿನ್ನವನ್ನೇ ಗೆಲ್ಲುತ್ತಿದ್ದರು. ಆದರೆ ಇದರಲ್ಲಿ ಅವರು ವಿಫ‌ಲರಾದರು.