ಏಶ್ಯನ್‌ ಕಪ್‌ ಅರ್ಹತಾ ಪಂದ್ಯ ಭಾರತಕ್ಕೆ 1-0 ಗೆಲುವು

ಬೆಂಗಳೂರು: ನಾಯಕ ಸುನೀಲ್‌ ಚೇತ್ರಿ ಅವರ ಆಕರ್ಷಕ ಗೋಲಿನಿಂದಾಗಿ ಭಾರತವು ಏಶ್ಯನ್‌ ಕಪ್‌ ಅರ್ಹತಾ ಫ‌ುಟ್ಬಾಲ್‌ ಪಂದ್ಯದಲ್ಲಿ ಕಿರ್ಗಿಸ್ಥಾನ್‌ ತಂಡವನ್ನು 1-0 ಗೋಲಿನಿಂದ ಸೋಲಿಸಿದೆ.

2019ರ ಏಶ್ಯನ್‌ ಕಪ್‌ಗಾಗಿ ನಡೆಯುತ್ತಿರುವ “ಎ’ ಬಣದ ಮೂರನೇ ಸುತ್ತಿನ ಅರ್ಹತಾ ಕೂಟದ ತವರಿನ ಪಂದ್ಯದಲ್ಲಿ ಚೇತ್ರಿ ಗೆಲುವಿನ ರೂವಾರಿಯಾಗಿ ಕಾಣಿಸಿಕೊಂಡರು. ಪಂದ್ಯದ 69ನೇ ನಿಮಿಷದಲ್ಲಿ ಜೆಜೆ ಲಾಲ್ಪೆಕ್ಲುವ ನೀಡಿದ ಸುಂದರ ಪಾಸ್‌ರ ಲಾಭ ಪಡೆದ ಚೇತ್ರಿ ಬಲ ಕಾಲಿನಿಂದ ಚೆಂಡನ್ನು ಉರುಳಿಸಿಕೊಂಡು ಗೋಲಾಗಿ ಪರಿವರ್ತಿಸಿದರು. ತನ್ನ 94ನೇ ಪಂದ್ಯವನ್ನಾಡುತ್ತಿರುವ ಚೇತ್ರಿ 54ನೇ ಗೋಲು ಬಾರಿಸಿದರು.

ಈ ಗೆಲುವಿನಿಂದ ಭಾರತ ತನ್ನ ಬಣದಲ್ಲಿ ಆರು ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ಭಾರತ ಎರಡು ಪಂದ್ಯಗಳಲ್ಲಿ ಜಯ ಸಾಧಿಸಿದೆ. ಎರಡು ಪಂದ್ಯ ಆಡಿರುವ ಕಿರ್ಗಿಸ್ಥಾನ್‌ ಮತ್ತು ಮ್ಯಾನ್ಮಾರ್‌ ಮೂರಂಕ ಹೊಂದಿವೆ. ಮಕಾವ್‌ ಇನ್ನೂ ಖಾತೆ ತೆರೆದಿಲ್ಲ.  ಎಲ್ಲ ನಾಲ್ಕು ತಂಡಗಳು ತವರಿನಲ್ಲಿ ಮತ್ತು ವಿದೇಶದಲ್ಲಿ ಆಡಲಿದ್ದು ಅಗ್ರ ಎರಡು ತಂಡಗಳು ಯುಎಇನಲ್ಲಿ ನಡೆಯುವ 2019ರ ಏಶ್ಯನ್‌ ಕಪ್‌ ಕೂಟದಲ್ಲಿ ಆಡಲು ಅರ್ಹತೆ ಗಳಿಸಲಿವೆ.