Asia Cup 2023; ಮಳೆಯ ಕಾರಣದಿಂದ ಸೂಪರ್ 4, ಫೈನಲ್ ಪಂದ್ಯಗಳು ಸ್ಥಳಾಂತರ

ಕೊಲಂಬೊ: ಏಷ್ಯಾ ಕಪ್ 2023 ಸದ್ಯ ಶ್ರೀಲಂಕಾದ ಮತ್ತು ಪಾಕಿಸ್ತಾನದಲ್ಲಿ ನಡೆಯುತ್ತಿದೆ. ಪಾಕಿಸ್ತಾನದ ಪಂದ್ಯಗಳು ಸರಾಗವಾಗಿ ನಡೆಯುತ್ತಿದ್ದರೆ, ಶ್ರೀಲಂಕಾದಲ್ಲಿ ಮಳೆಯು ಪಂದ್ಯಗಳಿಗೆ ಅಡ್ಡಿಯಾಗುತ್ತಿದೆ.

ಗ್ರೂಪ್ ಹಂತದ ಪಂದ್ಯಗಳು ಇಂದು ಕೊನೆಯಾಗಲಿದೆ. ಇನ್ನು ಸೂಪರ್ ಫೋರ್ ಪಂದ್ಯಗಳು ನಡೆಯಲಿದೆ. ಸೂಪರ್ ಫೋರ್ ಪಂದ್ಯಗಳು ಲಂಕಾದ ರಾಜಧಾನಿಯಲ್ಲಿ ಕೊಲಂಬೊದಲ್ಲಿ ನಡೆಸಲು ಯೋಜಿಸಲಾಗಿತ್ತು. ಆದರೆ ಕೊಲಂಬೊದಲ್ಲಿ ಬಿಡದೆ ಮಳೆಯಾಗುತ್ತಿರುವ ಕಾರಣ ಇದೀಗ ಸ್ಥಳ ಬದಲಾವಣೆ ಮಾಡಲಾಗಿದೆ.

ಏಷ್ಯಾ ಕಪ್ ದಕ್ಷಿಣ ಶ್ರೀಲಂಕಾದ ಕರಾವಳಿ ಪಟ್ಟಣವಾದ ಹಂಬಂತೋಟಾಕ್ಕೆ ಸ್ಥಳಾಂತರಗೊಳ್ಳಲು ಸಿದ್ಧವಾಗಿದೆ. ಎಲ್ಲಾ ಸೂಪರ್ 4 ಗೇಮ್‌ಗಳು ಮತ್ತು ಫೈನಲ್ ಹಂಬಂತೋಟಾದಲ್ಲಿ ನಡೆಯಲಿದೆ.

ಇದನ್ನೂ ಓದಿ:G20 Summit: ದೆಹಲಿಯಲ್ಲಿ ಮೂರು ದಿನ ಸ್ವಿಗ್ಗಿ, ಝೊಮ್ಯಾಟೊ, ಅಮೆಜಾನ್ ಸೇವೆ ಇಲ್ಲ

ಭಾಗವಹಿಸುವ ಎಲ್ಲಾ ತಂಡಗಳಿಗೆ ಈ ಬದಲಾವಣೆಯ ಬಗ್ಗೆ ತಿಳಿಸಲಾಗಿದೆ. ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ಎಸಿಸಿ) ಶೀಘ್ರದಲ್ಲೇ ಅಧಿಕೃತ ಘೋಷಣೆ ಮಾಡುವ ನಿರೀಕ್ಷೆಯಿದೆ. ಪಾಕಿಸ್ತಾನದಲ್ಲಿ ತಮ್ಮ ಕೊನೆಯ ಲೀಗ್ ಪಂದ್ಯಗಳನ್ನು ಪೂರ್ಣಗೊಳಿಸಿದ ತಂಡಗಳು ಹಂಬಂತೋಟಕ್ಕೆ ಪ್ರಯಾಣಿಸಲಿವೆ. ಭಾರತ ತಂಡ ಈಗ ಪಲ್ಲೆಕೆಲೆಯಿಂದ ಅಲ್ಲಿಗೆ ತೆರಳಲಿದೆ.

ಯುಎಇಯಲ್ಲಿ ಪಂದ್ಯಗಳನ್ನು ನಡೆಸಲು ಸಹ ಪರಿಗಣಿಸಲಾಗಿದೆ ಎಂದು ಕ್ರಿಕ್‌ ಬಜ್ ವರದಿಯಾಗಿತ್ತು. ಆದರೆ ಆಟಗಾರರ ಆರೋಗ್ಯದ ಬಗ್ಗೆ ಕಳವಳದಿಂದಾಗಿ ಈ ಆಯ್ಕೆಯನ್ನು ಅಂತಿಮವಾಗಿ ತಿರಸ್ಕರಿಸಲಾಯಿತು. ವಿಶ್ವಕಪ್‌ಗೆ ಕೇವಲ ಮೂರು ವಾರಗಳ ಮೊದಲು ಯುಎಇಯ ಸುಡುವ ಮತ್ತು ತೀವ್ರವಾದ ಶಾಖದಲ್ಲಿ ಆಡುವುದು ಆಟಗಾರರಿಗೆ ಗಮನಾರ್ಹ ಆರೋಗ್ಯ ಅಪಾಯಗಳನ್ನು ಉಂಟು ಮಾಡುತ್ತದೆ ಎಂಬ ಕಾರಣದಿಂದ ಯುಎಇ ಆಯ್ಕೆ ತಿರಸ್ಕರಿಸಲಾಗಿದೆ.