ಏಶ್ಯನ್‌ ಚಾಂಪಿಯನ್ಸ್‌ ಟ್ರೋಫಿ ಹಾಕಿ: ಹರ್ಮನ್‌ಪ್ರೀತ್‌ ಹೀರೋ; ಪಾಕ್‌ ಪಲ್ಟಿ

ಢಾಕಾ: ಹರ್ಮನ್‌ಪ್ರೀತ್‌ ಸಿಂಗ್‌ ಅವರ ಅವಳಿ ಗೋಲು ಪರಾಕ್ರಮದಿಂದ ಪಾಕಿಸ್ಥಾನವನ್ನು ಬಗ್ಗುಬಡಿದ ಹಾಲಿ ಚಾಂಪಿಯನ್‌ ಭಾರತ “ಏಶ್ಯನ್‌ ಚಾಂಪಿಯನ್ಸ್‌ ಟ್ರೋಫಿ’ ಹಾಕಿ ಪಂದ್ಯಾವಳಿಯ ಸೆಮಿಫೈನಲ್‌ ಪ್ರವೇಶಿಸಿದೆ.

ಶುಕ್ರವಾರ ಇಲ್ಲಿನ “ನ್ಯಾಶನಲ್‌ ಸ್ಟೇಡಿಯಂ’ನಲ್ಲಿ ನಡೆದ ಹೈ ವೋಲ್ಟೇಜ್ ಮುಖಾಮುಖಿ ಯಲ್ಲಿ ಭಾರತ 3-1 ಅಂತರದಿಂದ ಮತ್ತೊಂದು ಹಾಲಿ ಚಾಂಪಿಯನ್‌ ಪಾಕಿಸ್ಥಾನವನ್ನು ಮಣಿಸಿತು. ಹರ್ಮನ್‌ಪ್ರೀತ್‌ ಸಿಂಗ್‌ ಎರಡು ಪೆನಾಲ್ಟಿ ಕಾರ್ನರ್‌ಗಳನ್ನು ಯಶಸ್ವಿಯಾಗಿ ಗೋಲಾಗಿಸಿ ಭಾರತದ ಗೆಲುವಿನ ಹೀರೋ ಎನಿಸಿದರು.

ಕಳೆದ ಪಂದ್ಯಾವಳಿಯ ಲೀಗ್‌ ಹಂತದಲ್ಲೂ (2018) ಭಾರತ 3-1 ಅಂತರದಿಂದ ಪಾಕಿಸ್ಥಾನವನ್ನು ಕೆಡವಿದ್ದನ್ನು ನೆನಪಿಸಿಕೊಳ್ಳಬಹುದು. ಆದರೆ ಇತ್ತಂಡಗಳ ನಡುವಿನ ಫೈನಲ್‌ ಪಂದ್ಯ ಮಳೆಯಿಂದ ವಾಶೌಟ್‌ ಆದ ಕಾರಣ ಜಂಟಿ ಚಾಂಪಿಯನ್ಸ್‌ ಎಂದು ಘೋಷಿಸಲಾಗಿತ್ತು.

13ನೇ ನಿಮಿಷದಲ್ಲೇ ಗೋಲು
ಹರ್ಮನ್‌ಪ್ರೀತ್‌ 13ನೇ ನಿಮಿಷದಲ್ಲೇ ಗೋಲು ಸಿಡಿಸಿ ಭಾರತಕ್ಕೆ ಮೇಲುಗೈ ಒದಗಿಸುವ ಜತೆಗೆ ತಂಡದ ಜೋಶ್‌ ಹೆಚ್ಚಿಸುವಂತೆ ಮಾಡಿದರು. 42ನೇ ನಿಮಿಷದಲ್ಲಿ ಆಕಾಶ್‌ದೀಪ್‌ ಸಿಂಗ್‌ ಪರಾಕ್ರಮದಿಂದ ಭಾರತ 2-0 ಮುನ್ನಡೆ ಸಾಧಿಸುವಲ್ಲಿ ಯಶಸ್ವಿಯಾಯಿತು.

3ನೇ ಕ್ವಾರ್ಟರ್‌ ಮುಕ್ತಾಯಕ್ಕೆ ಇನ್ನೇನು 27 ಸೆಕೆಂಡ್ಸ್‌ ಬಾಕಿ ಇದೆ ಎನ್ನುವಾಗ ಜುನೇದ್‌ ಮನ್ಸೂರ್‌ ಫೀಲ್ಡ್‌ ಗೋಲೊಂದನ್ನು ಬಾರಿಸಿ ಪಾಕಿಸ್ಥಾನದ ಖಾತೆ ತೆರೆದರು. ಅಂತಿಮ ಕ್ವಾರ್ಟರ್‌ನ ಆಟ ಅತ್ಯಂತ ರೋಚಕ ವಾಗಿತ್ತು. ಮುನ್ನುಗ್ಗಿ ಬಂದ ಪಾಕಿಸ್ಥಾನಕ್ಕೆ ಎರಡು ಪೆನಾಲ್ಟಿ ಕಾರ್ನರ್‌ ಲಭಿಸಿತಾದರೂ ಭಾರತದ ಗೋಲ್‌ ಕೀಪರ್‌ ಸೂರಜ್‌ ಕರ್ಕೇರ ಅವರ ಅಮೋಘ ಸಾಹಸದ ಮುಂದೆ ಎದುರಾಳಿಯ ಆಟ ನಡೆಯಲಿಲ್ಲ.

ಇದನ್ನೂ ಓದಿ:ಬಾಂಗ್ಲಾದಲ್ಲಿ ಕಾಳಿ ಮಂದಿರ ಉದ್ಘಾಟಿಸಿದ ರಾಷ್ಟ್ರಪತಿ ಕೋವಿಂದ್‌

ಇದಾದ ಒಂದೇ ನಿಮಿಷದಲ್ಲಿ ಹರ್ಮನ್‌ಪ್ರೀತ್‌ ಸಿಂಗ್‌ ಮತ್ತೂಂದು ಪೆನಾಲ್ಟಿ ಕಾರ್ನರನ್ನು ಗೋಲಾಗಿಸಿದರು. ಇದರೊಂದಿಗೆ ಕೂಟದಲ್ಲಿ ಲಭಿಸಿದ ಎಲ್ಲ ಪೆನಾಲ್ಟಿ ಕಾರ್ನರ್‌ಗಳನ್ನೂ ಅವರು ಗೋಲಾಗಿಸುವಲ್ಲಿ ಯಶಸ್ಸು ಕಂಡಂತಾಯಿತು.

ಅಗ್ರಸ್ಥಾನದ ಗೌರವ
ಇದು 3 ಪಂದ್ಯಗಳಲ್ಲಿ ಭಾರತ ಸಾಧಿಸಿದ 2ನೇ ಜಯ. ಒಂದು ಪಂದ್ಯ ಡ್ರಾಗೊಂಡಿತ್ತು. 6 ಅಂಕ ಹೊಂದಿರುವ ಮನ್‌ಪ್ರೀತ್‌ ಸಿಂಗ್‌ ಪಡೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿದೆ. ಪಾಕಿಸ್ಥಾನ 4ನೇ ಸ್ಥಾನ ಬಿಟ್ಟು ಮೇಲೆದ್ದಿಲ್ಲ.