ಅರುಣಕುಮಾರ ಪಾಟೀಲ ಹಠಾವೋ: ಮುಸ್ತಾಜರ

ಸೇಡಂ: ಶಾಸಕ ಮಾಲೀಕಯ್ಯ ಗುತ್ತೇದಾರ ಅವರನ್ನು  ಅವಾಚ್ಯ ಶಬ್ದಗಳಿಂದ ನಿಂದಿಸುವ ಭರದಲ್ಲಿ ಆರ್ಯ ಈಡಿಗ ಸಮಾಜದ ಬಗ್ಗೆ ಹಗುರವಾಗಿ ಮಾತನಾಡಿದ ಜಿಪಂ ಸದಸ್ಯ ಅರುಣಕುಮಾರ ಪಾಟೀಲ ಅವರನ್ನು ಜಿಪಂ ಸ್ಥಾನದಿಂದ ರದ್ದುಗೊಳಿಸಿ, ಜೈಲಿಗಟ್ಟಬೇಕು ಎಂದು ಆರ್ಯ ಈಡಿಗ ಸಮಾಜದ ತಾಲೂಕು ಅಧ್ಯಕ್ಷ ವೆಂಕಟಯ್ಯ ಗೌಡ ಮುಸ್ತಾಜರ ಒತ್ತಾಯಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈಡೀಗ ಸಮಾಜದಧೀಮಂತ ನಾಯಕರಾಗಿ ಗುರುತಿಸಿಕೊಳ್ಳುವ ಶಾಸಕ ಮಾಲೀಕಯ್ಯ ಗುತ್ತೇದಾರ ಅವರ ಕುರಿತು ಮನಸ್ಸಿಗೆ ಬಂದಂತೆ ಅರುಣಕುಮಾರ ಪಾಟೀಲ ಮಾತನಾಡಿದ್ದಾರೆ. ಅಲ್ಲದೆ ಈಡೀಗ ಕೋಣ ಕಡಿಬೇಕು ಎಂದು ಬೆದರಿಕೆ ಹಾಕಿದರಲ್ಲದೆ, ಅವಾಚ್ಯ ಶಬ್ದಗಳಿಂದ ಬಹಿರಂಗವಾಗಿ ನಿಂದಿಸಿದ್ದಾರೆ. ಈ ರೀತಿಯ ಬೆಳವಣಿಗೆ ಇಡೀ ರಾಜ್ಯದ ಈಡೀಗ ಸಮಾಜಕ್ಕೆ ಅವಮಾನ ಮಾಡಿದಂತಾಗಿದೆ. ಕೂಡಲೇ ಅವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ಮುಖಂಡ ಪಾಪಯ್ಯ ಗೌಡ ಮಾತನಾಡಿ, ಪ್ರತಿ ಬಾರಿ ಒಂದಿಲ್ಲೊಂದು ಕಾರಣಗಳಿಂದ ಈಡೀಗ ಸಮಾಜವನ್ನು ನಿಂದಿಸಲಾಗುತ್ತಿದೆ. ಅಂತವರನ್ನು ಪೊಲೀಸರು ಬಂಧಿ ಸುವಲ್ಲಿ ವಿಫಲರಾಗುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. 

ನಂತರ ಸಹಾಯಕ ಆಯುಕ್ತರ ಕಚೇರಿಗೆ ತೆರಳಿ ಎಸ್ಪಿಗೆ ಬರೆದ ಪತ್ರವನ್ನು ತಹಶೀಲ್ದಾರ್‌ ಕೀರ್ತಿ ಚಾಲಾಕ ಅವರಿಗೆ ಸಲ್ಲಿಸಿದರು. ನೀರಾ ಘಟಕ ಅಧ್ಯಕ್ಷ ಶರಣಯ್ಯ ಕಲಾಲ, ಪ್ರಧಾನ ಕಾರ್ಯದರ್ಶಿ ಜಗನ್ನಾಥ ಗುತ್ತೇದಾರ ಮದರಿ, ಹುಸೇನಯ್ಯಗೌಡ, ಸತ್ತಯ್ಯಗೌಡ ಇಟಕಾಲ, ಅಂಜಯ್ಯಗೌಡ ಕುರಕುಂಟಾ, ಅನಂತಯ್ಯ ಕಡಚರ್ಲಾ, ಬಾಲರಾಜಗೌಡ, ಅಂಜಯ್ಯಗೌಡ ಮದಕಲ್‌, ಪ್ರಶಾಂತ ಸೂರವಾರ, ರಾಜು ಸೇಡಂ, ಕೊಟ್ರೇಶಗೌಡ ಸೂರವಾರ ಹಾಗೂ ಇನ್ನಿತರರು ಇದ್ದರು.