ತಲೆಮರೆಸಿಕೊಂಡಿದ್ದ ಮೂವರು ಆರೋಪಿಗಳ ಬಂಧನ

ಮಂಗಳೂರು: ಮಂಗಳೂರು, ಬಂಟ್ವಾಳ, ಪಣಂಬೂರು ಸೇರಿದಂತೆ ವಿವಿಧ ಪೊಲೀಸ್‌ ಠಾಣೆಗಳಲ್ಲಿ ದಾಖಲಾಗಿರುವ ಹಲವು ಪ್ರಕರಣಗಳಲ್ಲಿ ಆರೋಪಿಗಳಾಗಿ ತಲೆಮರೆಸಿಕೊಂಡಿದ್ದ ಮೂವರನ್ನು ಪೊಲೀಸರು ಬಂಧಿಸಿದ್ದಾರೆ.

ಕಣ್ಣೂರು ಬೋರುಗುಡ್ಡೆ ಎಫ್.ಎ. ಮಂಜಿಲ್‌ನ ಫ‌ಝಲ್‌ ಆಲಿಯಾಸ್‌ ಮಹಮ್ಮದ್‌ ಫ‌ಝಲ್‌ ಆಲಿಯಾಸ್‌ ಪಚ್ಚು ಮಲ್ಲೂರು (32), ಅಡ್ಯಾರ್‌ಪದವು ಮುಹಿಯುದ್ದೀನ್‌ ಜುಮ್ಮಾ ಮಸೀದಿ ಬಳಿ ನಿವಾಸಿ ಮಹಮ್ಮದ್‌ ಅಶ್ರಫ್ ಆಲಿಯಾಸ್‌ ಅಚ್ಚ (42) ಮತ್ತು ಮಂಗಳೂರು ಅರ್ಕುಳ ಗ್ರಾಮದ ವಳಚ್ಚಿಲ್‌ ಜರಿಗುಡ್ಡೆ ರೈಲ್ವೆ ಗೇಟಿನ ಬಳಿಯ ನಿವಾಸಿ ಮೊಹಮ್ಮದ್‌ ಅಲ್ತಾಫ್(26) ಬಂಧಿತರು.

ಫ‌ಝಲ್‌ ಮೇಲೆ ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಠಾಣೆ, ಮಂಗಳೂರು ಗ್ರಾಮಾಂತರ ಪೊಲೀಸ್‌ ಠಾಣೆ, ಕಂಕನಾಡಿ ನಗರ, ಮಂಗಳೂರು ಉತ್ತರ, ಬಜಪೆ, ಬರ್ಕೆ, ಮಂಗಳೂರು ಗ್ರಾಮಾಂತರ ಠಾಣೆಗಳಲ್ಲಿ ಒಟ್ಟು 7 ಪ್ರಕರಣಗಳು, ಮಹಮ್ಮದ್‌ ಅಶ್ರಫ್ ಮೇಲೆ ಮಂಗಳೂರು ಗ್ರಾಮಾಂತರದಲ್ಲಿ ಮೂರು ಪ್ರಕರಣಗಳು ದಾಖಲಾಗಿವೆ. ಮೊಹಮ್ಮದ್‌ ಅಲ್ತಾಫ್ ಮೇಲೆ ಬರ್ಕೆ ಠಾಣೆಯಲ್ಲಿ 7, ಪಣಂಬೂರು ಮತ್ತು ಮಂಗಳೂರು ರೈಲ್ವೆ ಠಾಣೆಗಳಲ್ಲಿ ತಲಾ ಒಂದು ಪ್ರಕರಣ ದಾಖಲಾಗಿತ್ತು.