ವಾಸ್ತುಶಿಲ್ಪ ಕೋರ್ಸ್‌ ಫ‌ಲಿತಾಂಶ ಪ್ರಕಟ; ಟಾಪ್‌ 10ರಲ್ಲಿ ರಾಜ್ಯದ 7 ಮಂದಿ

ಬೆಂಗಳೂರು: ಬಿ.ಆರ್ಕಿಟೆಕ್ಚರ್‌ (ವಾಸ್ತುಶಿಲ್ಪ) ಕೋರ್ಸ್‌ ಪ್ರವೇಶಕ್ಕಾಗಿ ನಡೆಸಿರುವ ನಾಟಾ ಪರೀಕ್ಷೆ-2022ರ ಫ‌ಲಿತಾಂಶ ಪಟ್ಟಿಯನ್ನು ಪ್ರಕಟಿಸಿದ್ದು, ರಾಷ್ಟ್ರಮಟ್ಟದ ಟಾಪ್‌ 10ರಲ್ಲಿ ರಾಜ್ಯದ 7 ವಿದ್ಯಾರ್ಥಿಗಳು ಸ್ಥಾನ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ನ್ಯಾಷನಲ್‌ ಆಪ್ಟಿಟ್ಯೂಡ್‌ ಟೆಸ್ಟ್‌ ಇನ್‌ ಆರ್ಕಿಟೆಕ್ಚರ್‌-2022 (ನಾಟಾ) ಪರೀಕ್ಷೆ ಫ‌ಲಿತಾಂಶ ಪ್ರಕಟವಾಗಿದೆ. ಇದರಲ್ಲಿ ರಾಜ್ಯದ 1,063 ವಿದ್ಯಾರ್ಥಿಗಳು ನೋಂದಣಿ ಮಾಡಿಕೊಂಡಿದ್ದರು. ಈ ಪೈಕಿ 1,031 ಅಭ್ಯರ್ಥಿಗಳು ಪರೀಕ್ಷೆಯಲ್ಲಿ ಅರ್ಹತೆ ಪಡೆದಿದ್ದಾರೆಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು (ಕೆಇಎ) ಕಾರ್ಯನಿರ್ವಾಹಕ ನಿರ್ದೇಶಕಿ ಎಸ್‌. ರಮ್ಯಾ ಮಾಹಿತಿ ನೀಡಿದರು.

ಟಾಪ್‌ 10ರಲ್ಲಿ 7 ವಿದ್ಯಾರ್ಥಿಗಳು ರಾಜ್ಯ ಪಠ್ಯಕ್ರಮ, ಇಬ್ಬರು ಸಿಬಿಎಸ್‌ಇ ಹಾಗೂ ಒಬ್ಬರು ಐಸಿಎಸ್‌ಇ ವಿದ್ಯಾರ್ಥಿಗಳಾಗಿದ್ದಾರೆ. ಮೊದಲ 2 ಸ್ಥಾನಗಳನ್ನು ಕ್ರಮವಾಗಿ ರಾಜ್ಯಪಠ್ಯಕ್ರಮದ ವಿದ್ಯಾರ್ಥಿಗಳಾದ ಮರಿಯಾ ಬಿನ್ಸನ್‌ ಮೆನಚೆರಿ ಹಾಗೂ ರೂಪಶ್ರೀ ಕೆ. ಪಡೆದುಕೊಂಡಿದ್ದಾರೆ. ತೃತೀಯ ಸ್ಥಾನವನ್ನು ಸಿಬಿಎಸ್‌ಇ ವಿದ್ಯಾರ್ಥಿನಿ ವೈಷ್ಣವಿ ಆರ್‌.ಪಡೆದಿದ್ದಾರೆ.

ರೂಪಶ್ರೀ ವಿದ್ಯಾರ್ಥಿನಿಯು ಬೆಂಗಳೂರಿನ ಪದ್ಮನಾಭನಗರದ ಶ್ರೀ ಕುಮಾರನ್ಸ್‌ ಚಿಲ್ಡ್ರನ್ಸ್‌ ಹೋಮ್‌ ಕಾಂಪೋಸಿಟ್‌ ಕಾಲೇಜಿನವರಾಗಿದ್ದಾರೆ. ನ್ಯಾಷನಲ್‌ ಇನ್‌ಸ್ಟಿಟ್ಯೂಟ್‌ ಆಫ್ ಅಹಮದಾಬಾದ್‌ನಲ್ಲಿ ಪ್ರವೇಶ ಪಡೆಯುತ್ತಿದ್ದಾರೆಂದು ತಿಳಿದು ಬಂದಿದೆ.