ಆಸೀಸ್‌ ಟೆಸ್ಟ್‌ ತಂಡದಲ್ಲಿ ಏಳರ ಹರೆಯದ ಲೆಗ್‌ಸ್ಪಿನ್ನರ್‌!

ಮೆಲ್ಬರ್ನ್: ಬುಧವಾರದಿಂದ ಮೆಲ್ಬರ್ನ್ನಲ್ಲಿ ಭಾರತ-ಆಸ್ಟ್ರೇಲಿಯ ನಡುವಿನ 3ನೇ ಟೆಸ್ಟ್‌ ಪಂದ್ಯ ಆರಂಭವಾಗಲಿದೆ. ಅಷ್ಟರಲ್ಲಿ ಆಸ್ಟ್ರೇಲಿಯ ಕ್ರಿಕೆಟ್‌ ತಂಡದಿಂದ ಮಾನವೀಯ ಸುದ್ದಿಯೊಂದು ಹೊರಬಿದ್ದಿದೆ. ಕೇವಲ ಏಳರ ಹರೆಯದ ಲೆಗ್‌ಸ್ಪಿನ್ನರ್‌ ಆರ್ಚಿ ಶಿಲ್ಲರ್‌ನನ್ನು ತನ್ನ 15ರ ಬಳಗಕ್ಕೆ ಸೇರಿಸಿಕೊಂಡಿದೆ.

ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿಯನ್ನು ಔಟ್‌ ಮಾಡುವ ಗುರಿಯಿಟ್ಟುಕೊಂಡಿರುವ ಶಿಲ್ಲರ್‌ಗೆ ಹೃದಯರೋಗವಿದೆ. ಇದನ್ನು ಗಮನಿಸಿರುವ ಆಸ್ಟ್ರೇಲಿಯ ಕ್ರಿಕೆಟ್‌ ಮಂಡಳಿಯೇ ಈತನನ್ನು ತಂಡಕ್ಕೆ ಆಯ್ಕೆ ಮಾಡಿದೆ. ಕೊಹ್ಲಿಯನ್ನು ಔಟ್‌ ಮಾಡುವುದು ಮಾತ್ರವಲ್ಲ, ಆಸೀಸ್‌ ತಂಡದ ನಾಯಕತ್ವ ವಹಿಸುವುದೂ ಶಿಲ್ಲರ್‌ ಕನಸು.

ಈ ಹುಡುಗನನ್ನು ಭಾರತ ವಿರುದ್ಧದ ಮೊದಲ ಟೆಸ್ಟ್‌ ಪಂದ್ಯಕ್ಕೆ ಮುನ್ನವೇ ತಂಡದ ಅಭ್ಯಾಸದಲ್ಲಿ ಸೇರಿಸಿಕೊಳ್ಳಲಾಗಿತ್ತು. ಈಗ ಅಂತಿಮ 15ರ ಬಳಗಕ್ಕೆ ಆಯ್ಕೆ ಮಾಡಿಕೊಳ್ಳಲಾಗಿದೆ. ಶಿಲ್ಲರ್‌ 11ರ ಬಳಗದಲ್ಲಿ ಕಾಣಿಸಿಕೊಂಡು, ಕೆಲನಿಮಿಷಗಳ ಮಟ್ಟಿಗೆ ಆಡುವ ಸಾಧ್ಯತೆಯನ್ನೂ ತಳ್ಳಿ ಹಾಕುವಂತಿಲ್ಲ.