ಮಕ್ಕಳ ಸಂತೆ: ವಿದ್ಯಾರ್ಥಿಗಳಿಗೆ ವ್ಯವಹಾರ, ಗಣಿತ ಶಿಕ್ಷಣ

ಅರಂತೋಡು: ಅರಂತೋಡು ನೆಹರೂ ಸ್ಮಾರಕ ಪದವಿಪೂರ್ವ ಕಾಲೇಜಿನಲ್ಲಿ ಏರ್ಪಡಿಸಲಾಗಿದ್ದ ವಿದ್ಯಾರ್ಥಿ ಗ್ರಾಹಕ ಸಂತೆಯಲ್ಲಿ ಅನೇಕ ವಿದ್ಯಾರ್ಥಿಗಳು ವ್ಯಾಪಾರ ನಡೆಸಿ, ವ್ಯಾಪಾರ, ವ್ಯವಹಾರ, ಗಣಿತ ಜ್ಞಾನವನ್ನು ಹೆಚ್ಚಿಸಿಕೊಂಡರು.

ಅರಂತೋಡು ನೆಹರೂ ಸ್ಮಾರಕ ಕಾಲೇಜು, ಪಾಪ್ಯುಲರ್‌ ಎಜುಕೇಶನ್‌ ಸೊಸೈಟಿ, ದ.ಕ. ಜಿಲ್ಲಾ ಗ್ರಾಹಕರ ಸಂಘಗಳ ಒಕ್ಕೂಟ ಹಾಗೂ ಜಾಗೃತಿ ವಿದ್ಯಾರ್ಥಿ ಕ್ಲಬ್‌ ಆಶ್ರಯದಲ್ಲಿ ಗ್ರಾಹಕರ ಸಂತೆ ನಡೆಯಿತು. ಹೈಸ್ಕೂಲ್‌ ವಿಭಾಗದ ಒಟ್ಟು 308 ವಿದ್ಯಾರ್ಥಿಗಳ ಪೈಕಿ ಸುಮಾರು 72 ಮಕ್ಕಳನ್ನು ತಲಾ 6 ಜನರ ಗುಂಪುಗಳಲ್ಲಿ ಸೇರಿಸಿ, ವಿವಿಧ ವ್ಯಾಪಾರಗಳನ್ನು ನಡೆಸಲು ಸೂಚಿಸಲಾಗಿತ್ತು. ತರಕಾರಿ, ತಿಂಡಿಗಳು, ಬಟ್ಟೆ, ಆಲಂಕಾರಿಕ ವಸ್ತುಗಳು, ಬೆತ್ತದ ಕುಡುಪು, ಬುಟ್ಟಿ, ಹಸಿರು ಸೊಪ್ಪುಗಳು, ವೀಳ್ಯದೆಲೆ, ಐಸ್‌ಕ್ರೀಮ್‌ ಇತ್ಯಾದಿಗಳು ಸಂತೆಯಲ್ಲಿ ಮಾರಾಟಕ್ಕಿದ್ದವು. 

ಕಾಲೇಜು ವಿಭಾಗದ ವಿದ್ಯಾರ್ಥಿಗಳು, ಹೆತ್ತವರು, ಹೈಸ್ಕೂಲು ವಿಭಾಗದ ವ್ಯಾಪಾರಸ್ಥರನ್ನು ಹೊರತುಪಡಿಸಿ ಉಳಿದ ವಿದ್ಯಾರ್ಥಿಗಳು, ಶಿಕ್ಷಕರು ಗ್ರಾಹಕರಾಗಿದ್ದರು. ಸಂತೆಯಲ್ಲಿ ವ್ಯಾಪಾರಕ್ಕಾಗಿ ಗ್ರಾಹಕರನ್ನು ಕೂಗಿ ಕರೆಯುವುದು, ವಸ್ತುಗಳ ವ್ಯಾಪಾರಕ್ಕಾಗಿ ದರದಲ್ಲಿ ಹೆಚ್ಚು ಕಡಿಮೆ ಮಾಡಿ ಚೌಕಾಸಿ ನಡೆಸುವುದು, ಗ್ರಾಹಕರನ್ನು ತಮ್ಮತ್ತ ಸೆಳೆಯುವಲ್ಲಿ ವಿದ್ಯಾರ್ಥಿಗಳು ಅನುಸರಿಸಿದ ತಂತ್ರಗಳು ಗಮನ ಸೆಳೆದವು. ಲಾಭ – ನಷ್ಟಗಳನ್ನು ವಿದ್ಯಾರ್ಥಿಗಳು ಹಾಕಿರುವ ಬಂಡಾವಳಕ್ಕೆ ಅನುಗುಣವಾಗಿ ಶಿಕ್ಷಕರು ಹಂಚಿಕೊಟ್ಟರು. 

ವಿದ್ಯಾರ್ಥಿ ಸಂತೆ ಉದ್ಘಾಟನೆ
ಪಾಪ್ಯುಲರ್‌ ಎಜುಕೇಶನ್‌ ಸೊಸೈಟಿ ಅಧ್ಯಕ್ಷ ಪಿ.ಬಿ. ದಿವಾಕರ ರೈ ವಿದ್ಯಾರ್ಥಿ ಗ್ರಾಹಕ ಸಂತೆಯನ್ನು ಉದ್ಘಾಟಿಸಿದರು. ಕಾಲೇಜಿನ ಪ್ರಭಾರ ಪ್ರಾಂಶುಪಾಲ ರಮೇಶ್‌ ಎಸ್‌. ಅಧ್ಯಕ್ಷತೆ ವಹಿಸಿದ್ದರು. ಸೊಸೈಟಿ ಕಾರ್ಯದರ್ಶಿ ಕೆ.ಆರ್‌. ಪದ್ಮನಾಭ, ಸಂಚಾಲಕ ಕೆ.ಆರ್‌. ಗಂಗಾಧರ, ದ.ಕ. ಜಿಲ್ಲಾ ಗ್ರಾಹಕ ಸಂಘಟನೆಗಳ ಒಕ್ಕೂಟದ ಕಾರ್ಯದರ್ಶಿ ವಿಷ್ಣು ಪಿ. ನಾಯಕ್‌, ಅರಂತೋಡು – ತೊಡಿಕಾನ ವ್ಯವಸಾಯ ಸೇವಾ ಸಹಕಾರಿ ಬ್ಯಾಂಕ್‌ ಅಧ್ಯಕ್ಷ ಸಂತೋಷ್‌ ಕುತ್ತಮೊಟ್ಟೆ, ಹೈಸ್ಕೂಲ್‌ ವಿಭಾಗದ ಮುಖ್ಯ ಶಿಕ್ಷಕ ವೈ.ಎ. ಆನಂದ, ಸಿ.ಆರ್‌.ಪಿ. ಗೋಪಾಲಕೃಷ್ಣ ಉಪಸ್ಥಿತರಿದ್ದರು.ಕಾರ್ಯಕ್ರಮದ ಸಂಯೋಜಕ ಕಿಶೋರ್‌ ಸ್ವಾಗತಿಸಿ, ಕಾರ್ಯಕ್ರಮ ನಿರೂಪಿಸಿದರು. ವಿದ್ಯಾರ್ಥಿ ಗ್ರಾಹಕ ಕ್ಲಬ್‌ ಅಧ್ಯಕ್ಷೆ ರಕ್ಷಾ ಬಿ.ಆರ್‌. ವಂದಿಸಿದರು.

ಆಗಾಗ ನಡೆಯಲಿ
ಆಧುನಿಕ ಕಾಲದಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚಾಗಿ ಕಾಲ ಕಳೆಯುವ ವಿದ್ಯಾರ್ಥಿಗಳಲ್ಲಿ ಮಕ್ಕಳ ಸಂತೆ ಸಹಬಾಳ್ವೆ, ಸಹಜೀವನದ ಕಲ್ಪನೆಯನ್ನು ಮೂಡಿಸಿತು. ತರಗತಿಯ ನಾಲ್ಕು ಗೋಡೆಯ ಮದ್ಯೆ ಶಿಕ್ಷಣ ಪಡೆಯುವ ವಿದ್ಯಾರ್ಥಿಗಳಿಗೆ ಇದು ಗಣಿತದ ಪ್ರಾಯೋಗಿಕ ಪಾಠ ಹೇಳಿತು. ವೃತ್ತಿ ಶಿಕ್ಷಣಕ್ಕೆ ಉತ್ತೇಜನ ನೀಡಿತು. ಇಂತಹ ಕಾರ್ಯಕ್ರಮಗಳು ಶಾಲೆ, ಕಾಲೇಜುಗಳಲ್ಲಿ ಆಗಾಗ ನಡೆದರೆ ಒಳ್ಳೆಯದು.
– ಆನಂದ ವೈ.ಎ., 
ಮುಖ್ಯ ಶಿಕ್ಷಕರು, ಪ್ರೌಢಶಾಲಾ
ವಿಭಾಗ, ನೆಹರೂ ಸ್ಮಾರಕ ಪ.ಪೂ.ಕಾಲೇಜು, ಅರಂತೋಡು